India's economy: ఆరు త్రైమాసికాల గరిష్ఠానికి జీడీపీ.. క్యూ2లో 8.2%
ఈ వార్తాకథనం ఏంటి
భారత ఆర్థిక వ్యవస్థ అనుకున్న అంచనాలను మించి అద్భుతంగా ప్రదర్శించింది. ప్రస్తుత ఆర్థిక సంవత్సరంలో రెండో త్రైమాసికంలో జీడీపీ (GDP) గణాంకాలు మెరుగ్గా నమోదయ్యాయి. జులై-సెప్టెంబర్ (Q2) త్రైమాసికంలో ఆర్థిక వృద్ధి 8.2 శాతంగా నమోదు కాగా, ఇది ఆరు త్రైమాసికాలలో అత్యధిక స్థాయికి చేరిందని చెప్పవచ్చు. గత సంవత్సరం అదే త్రైమాసికంలో వృద్ధి 5.6 శాతంగా నమోదు కావడం గమనార్హం. ప్రస్తుత ఆర్థిక సంవత్సరం మొదటి త్రైమాసికంలో జీడీపీ వృద్ధి 7.8 శాతంగా నమోదైంది. ప్రైవేట్ రంగంలోని మూలధన వ్యయం మితంగా ఉన్నప్పటికీ, గ్రామీణ ప్రాంతాల్లో వినియోగంలో పెరుగుదల, ప్రభుత్వ వ్యయం పెరగడం వలన జీడీపీ వృద్ధికి ప్రధాన తోడ్పాటుగా నిలిచాయి.
వివరాలు
తయారీ రంగం 9.1 శాతం వృద్ధి
పండగ సీజన్ ప్రారంభానికి ముందు కేంద్ర ప్రభుత్వం జీఎస్టీ రేట్లను తగ్గించడం (GST rate cut) ద్వారా ప్రేరణ ఇచ్చిన సంగతి తెలిసిందే. సెప్టెంబర్ 22న ఈ తగ్గింపులు అమల్లోకి వచ్చాయి. ఆర్థికవేత్తలు భావిస్తున్నట్లుగా, పండగ సీజన్‌లో కొనుగోళ్లు పెరుగడం ద్వారా దేశీయ వినియోగం,ఆర్థిక వృద్ధికి ఊరట కలిగే అవకాశం ఉంది. అయితే, జీఎస్టీ రేట్ల ప్రభావం పూర్తిగా కనిపించే ముందు,ఇప్పటికే మెరుగైన జీడీపీ గణాంకాలు వెల్లడవడం విశేషం. ముఖ్యంగా, జీడీపీలో సుమారు 14 శాతం వాటా కలిగిన తయారీ రంగం 9.1 శాతంగా వృద్ధి సాధించింది, ఇది గత సంవత్సరం 2.2 శాతంతో పోలిస్తే భారీగా పెరుగుదలగా చెప్పుకోవచ్చు.