SpaceX IPO: స్పేస్‌ఎక్స్‌ IPOతో.. ఎలాన్ మస్క్ సన్నిహితుడికి లక్షల కోట్ల సంపద!

వ్రాసిన వారు Sirish Praharaju

May 21, 2026

05:21 pm

ఈ వార్తాకథనం ఏంటి

భారతీయ మూలాలున్న ఇన్వెస్టర్ ఆంటోనియో గ్రాసియాస్‌కు స్పేస్‌-X IPO భారీ అదృష్టాన్ని తీసుకురానున్నట్లు తెలుస్తోంది. ఎలాన్ మస్క్‌కు అత్యంత సన్నిహితుడిగా పేరున్న గ్రాసియాస్, స్పేస్‌ఎక్స్‌ కంపెనీలో భారీ వాటాలు కలిగి ఉన్నట్లు కంపెనీ తాజాగా దాఖలు చేసిన S-1 ఫైలింగ్‌లో వెల్లడైంది. వాలర్ ఈక్విటీ పార్ట్‌నర్స్ సంస్థ ద్వారా ఆయన వద్ద 50 కోట్లకు పైగా స్పేస్‌-X షేర్లు ఉన్నట్లు సమాచారం. ఇవి కంపెనీ క్లాస్-A షేర్లలో దాదాపు 7.3 శాతం వాటాను సూచిస్తున్నాయి. స్పేస్‌ఎక్స్‌ IPO విలువ సుమారు 1.5 ట్రిలియన్ డాలర్లుగా అంచనా వేస్తుండగా, గ్రాసియాస్ వాటాల విలువ దాదాపు 91.6 బిలియన్ డాలర్లకు చేరవచ్చని విశ్లేషకులు చెబుతున్నారు.

వివరాలు

రెండు దశాబ్దాలకుపైగా స్నేహం

ఆంటోనియో గ్రాసియాస్, ఎలాన్ మస్క్‌తో రెండు దశాబ్దాలకుపైగా స్నేహం కొనసాగిస్తున్నారు. 2000 దశకంలో పేపాల్ సంస్థ ఈబేకు అమ్ముడైన సమయంలో ఇద్దరూ సిలికాన్ వ్యాలీలో కలిసి పనిచేశారు. 1995లో స్థాపించిన వాలర్ ఈక్విటీ పార్ట్‌నర్స్ ద్వారా గ్రాసియాస్ టెస్లాలో కూడా పెట్టుబడులు పెట్టారు. టెస్లా ఆర్థిక ఇబ్బందుల్లో ఉన్న సమయంలో మస్క్‌కు కీలకంగా అండగా నిలిచిన వ్యక్తుల్లో గ్రాసియాస్ ఒకరని చెబుతారు. అనంతరం రాకెట్లు, శాటిలైట్లు, AI రంగాల్లో మస్క్ విస్తరణలో కూడా ఆయన పాత్ర కొనసాగింది.

వివరాలు

20 బిలియన్ డాలర్ల లీజ్ ఒప్పందాలు

ఫైలింగ్ ప్రకారం, మస్క్‌కు చెందిన xAI సంస్థతో కూడా వాలర్‌కు చెందిన కంపెనీలు భారీ ఒప్పందాలు కుదుర్చుకున్నాయి. AI మౌలిక సదుపాయాలు, కంప్యూటింగ్ సిస్టమ్స్ కోసం దాదాపు 20 బిలియన్ డాలర్ల లీజ్ ఒప్పందాలు జరిగినట్లు వెల్లడైంది. 2025, 2026 ప్రారంభంలో వీటి ద్వారా వందల మిలియన్ల డాలర్ల చెల్లింపులు జరిగినట్లు సమాచారం. స్పేస్‌ఎక్స్‌లో మస్క్‌కు సన్నిహితులైన పలువురు ప్రారంభ పెట్టుబడిదారులు కూడా భారీ వాటాలు కలిగి ఉన్నారు. పేపాల్ కాలం నాటి సహచరుడు ల్యూక్ నోసెక్ వద్ద దాదాపు 3.3 కోట్ల షేర్లు ఉండగా,వాటి విలువ సుమారు 6 బిలియన్ డాలర్లుగా అంచనా వేస్తున్నారు.

వివరాలు

ఇప్పటికి ప్రారంభ పెట్టుబడిదారుల ఆధిపత్యమే..

అలాగే స్పేస్‌-X ప్రెసిడెంట్ గ్విన్ షాట్‌వెల్ వద్ద 1.26 కోట్ల షేర్లు ఉన్నాయి. ఆమె వాటాల విలువ దాదాపు 2.3 బిలియన్ డాలర్లుగా చెప్పబడుతోంది. ఇక టెస్లా బోర్డు సభ్యుడు ఐరా ఎహ్రెన్‌ప్రైస్‌, DFJ గ్రోత్ వ్యవస్థాపకుడు రాండీ గ్లైన్ వంటి ప్రముఖ పెట్టుబడిదారులు కూడా స్పేస్‌ఎక్స్‌లో గణనీయమైన వాటాలు కలిగి ఉన్నారు. స్పేస్‌-X IPOకు కంపెనీ చేరువవుతున్న వేళ.. సంస్థలో ఇప్పటికీ ఎలాన్ మస్క్‌కు అత్యంత సన్నిహితులైన వ్యక్తులు, ప్రారంభ పెట్టుబడిదారుల ఆధిపత్యమే కొనసాగుతున్నట్లు ఈ ఫైలింగ్ వెల్లడిస్తోంది.