IPO: ఇండో-మిమ్ ఐపీఓ నేడు ప్రారంభం.. గ్రే మార్కెట్‌లో 38.5% ప్రీమియంతో భారీ ఆసక్తి

వ్రాసిన వారు Moogati Shabari

Jul 23, 2026

12:16 pm

ఈ వార్తాకథనం ఏంటి

ఇండో-మిమ్ లిమిటెడ్ (Indo-MIM Ltd) తన తొలి పబ్లిక్ ఇష్యూ (IPO)ను నేడు ప్రారంభించింది. ఈ ఐపీఓలో పెట్టుబడులు పెట్టేందుకు జూలై 27 వరకు అవకాశం ఉంటుంది. కంపెనీ ఒక్కో ఈక్విటీ షేర్‌కు రూ.461 నుంచి రూ.485 వరకు ధరను నిర్ణయించింది. ఈ ఐపీఓ ద్వారా మొత్తం రూ.3,811 కోట్ల నిధులను సమీకరించాలని లక్ష్యంగా పెట్టుకుంది. ఈ ఇష్యూలో కొత్త షేర్ల జారీ (Fresh Issue)తో పాటు ఆఫర్ ఫర్ సేల్ (Offer for Sale - OFS) కూడా ఉంది. ఈ పబ్లిక్ ఇష్యూ షేర్లు బీఎస్‌ఈ (BSE), ఎన్‌ఎస్‌ఈ (NSE) స్టాక్ ఎక్స్చేంజ్‌లలో లిస్ట్ కానున్నాయి. ప్రస్తుత షెడ్యూల్ ప్రకారం జూలై 30న షేర్లుమార్కెట్‌లో లిస్టింగ్ అయ్యే అవకాశం ఉంది.

వివరాలు

గ్రే మార్కెట్‌లో భారీ ప్రీమియం.. పెట్టుబడిదారుల నుంచి బలమైన స్పందన

ఐపీఓ ప్రారంభానికి ముందే ఇండో-మిమ్ షేర్లు గ్రే మార్కెట్‌లో ఒక్కో షేర్‌కు రూ.187 ప్రీమియంతో, అంటే సుమారు 38.5 శాతం అధిక ధరకు ట్రేడవుతున్నాయి.

ఇది కంపెనీ షేర్లపై పెట్టుబడిదారుల్లో బలమైన ఆసక్తి నెలకొన్నట్లు సూచిస్తోంది.

నేడు ఉదయం 10:15 గంటల నాటికి ఈ ఐపీఓ మొత్తం 0.05 రెట్లు సబ్‌స్క్రైబ్ అయింది.

ఇందులో రిటైల్ ఇన్వెస్టర్ల విభాగం 0.05 రెట్లు, నాన్-ఇన్‌స్టిట్యూషనల్ ఇన్వెస్టర్ల (NII) విభాగం 0.11 రెట్లు సబ్‌స్క్రైబ్ కాగా, క్వాలిఫైడ్ ఇన్‌స్టిట్యూషనల్ బయ్యర్స్ (QIB) విభాగంలో ఆ సమయానికి ఎలాంటి సబ్‌స్క్రిప్షన్ నమోదు కాలేదు.

వివరాలు

ఉద్యోగులకు ప్రత్యేక రాయితీ..

ఈ ఐపీఓలో ఉద్యోగుల కోసం కేటాయించిన కోటా కింద దరఖాస్తు చేసుకునే వారికి ఒక్కో షేర్‌పై రూ.45 తగ్గింపు ఇవ్వనున్నారు.

ఈ పబ్లిక్ ఇష్యూకు లాట్ సైజు 30 షేర్లుగా నిర్ణయించారు. షేర్ల కేటాయింపు (అలాట్‌మెంట్) జూలై 28న జరిగే అవకాశం ఉంది.

ఈ బుక్-బిల్డ్ ఇష్యూకు ఎంయూఎఫ్‌జీ ఇంటైమ్ ఇండియా ప్రైవేట్ లిమిటెడ్ (MUFG Intime India Private Ltd) అధికారిక రిజిస్ట్రార్‌గా వ్యవహరిస్తుంది.

వివరాలు

కంపెనీ గురించి వివరాలివే..

1996లో స్థాపించబడిన ఇండో-మిమ్ లిమిటెడ్, మెటల్ ఇంజెక్షన్ మోల్డింగ్ (Metal Injection Molding - MIM) సాంకేతికతలో ప్రత్యేక నైపుణ్యం కలిగిన ప్రిసిషన్ ఇంజినీరింగ్ విడిభాగాల తయారీలో ప్రపంచవ్యాప్తంగా ప్రముఖ సంస్థగా గుర్తింపు పొందింది.

అచ్చుల రూపకల్పన (Mold Design), టూలింగ్, ప్రిసిషన్ మెషినింగ్, ఫినిషింగ్, అసెంబ్లీ వరకు పూర్తి స్థాయి ఎండ్-టు-ఎండ్ తయారీ పరిష్కారాలను ఈ సంస్థ అందిస్తోంది.

2025-26 ఆర్థిక సంవత్సరంలో ఇండో-మిమ్ అత్యుత్తమ ఆర్థిక ఫలితాలను నమోదు చేసింది.

కంపెనీ మొత్తం ఆదాయం 28.1 శాతం పెరిగి రూ.3,373.97 కోట్ల నుంచి రూ.4,320.70 కోట్లకు చేరుకుంది. అదే సమయంలో పన్నుల అనంతర లాభం (PAT) కూడా 25.9 శాతం వృద్ధితో రూ.423.73 కోట్ల నుంచి రూ.533.54 కోట్లకు పెరిగింది.