IRCTC booking: ముందస్తు రైల్వే రిజర్వేషన్‌పై కీలక నిర్ణయం.. నవంబర్ 1 నుంచి కొత్త రూల్స్ అమల్లోకి!
ఈ వార్తాకథనం ఏంటి
దసరా, దీపావళి, సంక్రాంతి వంటి ముఖ్యమైన పండుగల సమయంలో ప్రయాణికులు ముందుగానే రిజర్వేషన్లు చేసుకుంటారు. అలా చేయకపోతే, ట్రైన్‌లో కూడా సీట్లు అందుబాటులో ఉండకపోవచ్చు. పండుగల సమయంలో రిజర్వేషన్ బోగీలు దట్టంగా కిక్కిరిసిపోతుంటాయి. అందువల్ల, ప్రయాణికులు నాలుగు నెలల ముందుగానే అడ్వాన్స్ బుకింగ్ చేసుకుని రిలాక్స్ అవుతుంటారు. దీనిని బట్టి రైల్వేలో రిజర్వేషన్లకు ఎంత డిమాండ్ ఉందో తెలుస్తుంది. అయితే, తాజాగా రైల్వే శాఖ ఒక కీలక నిర్ణయం తీసుకుంది. గతంలో 120 రోజులు ముందుగా రిజర్వేషన్ చేసుకునే అవకాశం ఉండేది.
వివరాలు
విదేశీ పర్యాటకులకు 365 రోజుల పరిమితి విషయంలో ఎలాంటి మార్పు లేదు
కానీ ఇప్పుడు ఆ కాలాన్ని తగ్గించడం జరిగి, రైల్వే శాఖ 60 రోజులకు ముందుగానే రిజర్వేషన్ చేసుకునేలా ఆదేశాలు జారీ చేసింది. నవంబర్ 1 నుంచి ఈ కొత్త నిబంధన అమల్లోకి రానుంది. అయితే, ఈ నిబంధన గతంలోనే 120 రోజులకు ముందుగానే రిజర్వేషన్లు చేసుకున్న ప్రయాణికులకు వర్తించదు. నవంబర్ 1 నుంచి కొత్తగా రిజర్వేషన్ చేసుకునే ప్రయాణికులకు మాత్రమే ఈ కొత్త ఆదేశాలు అమలులో ఉంటాయని రైల్వే శాఖ పేర్కొంది. అంటే అక్టోబర్ 31 వరకు అడ్వాన్స్ బుకింగ్‌లకు ఎలాంటి ఇబ్బందులు ఉండవు. అలాగే, విదేశీ పర్యాటకులకు 365 రోజుల పరిమితి విషయంలో ఎలాంటి మార్పు ఉండదని రైల్వే మంత్రిత్వ శాఖ స్పష్టం చేసింది.