IT stocks rebound: మళ్లీ పుంజుకున్న ఐటీ షేర్లు.. ఆరు శాతం వరకు జంప్.. కారణాలు ఇవే!
ఈ వార్తాకథనం ఏంటి
దేశీయ ఐటీ రంగ షేర్లు మంగళవారం మార్కెట్లో బలమైన పుంజుకోవడం కనిపించాయి. గత కొన్ని వారాలుగా వరుస నష్టాలతో ఒత్తిడిలో ఉన్న ప్రముఖ ఐటీ సంస్థల షేర్లు ఒక్కసారిగా లాభాల బాట పట్టాయి. కోఫోర్జ్, ఎంఫసిస్, పర్సిస్టెంట్ సిస్టమ్స్, టెక్ మహీంద్రా, ఇన్ఫోసిస్, టీసీఎస్ వంటి ప్రధాన కంపెనీల షేర్లలో కొనుగోళ్లు భారీగా పెరగడంతో ఆరు శాతం వరకు పెరిగాయి. దీనితో నిఫ్టీ ఐటీ సూచీ దాదాపు నాలుగు శాతం వరకు లాభపడింది. ముఖ్యంగా కోఫోర్జ్ షేరు అత్యధికంగా ఆరు శాతం పెరిగింది. ఇన్ఫోసిస్, టెక్ మహీంద్రా, పర్సిస్టెంట్ సిస్టమ్స్ షేర్లు నాలుగు నుంచి ఐదు శాతం మధ్య లాభాలను నమోదు చేశాయి.
వివరాలు
2008 ఆర్థిక సంక్షోభ కాలాన్ని గుర్తు చేసే స్థాయికి కంపెనీల విలువలు
ఇటీవల కృత్రిమ మేధస్సు సాంకేతికత వేగంగా విస్తరిస్తుండటంతో సంప్రదాయ సాఫ్ట్వేర్ సేవలు, కోడింగ్ ఉద్యోగాల భవిష్యత్తుపై మార్కెట్లో ఆందోళనలు నెలకొన్నాయి. ఓపెన్ఏఐ, ఆంత్రోపిక్ సంస్థలు విడుదల చేసిన కొత్త కృత్రిమ మేధస్సు ఆధారిత వ్యవస్థలు ఐటీ కంపెనీల ఔట్సోర్సింగ్ వ్యాపారంపై ప్రభావం చూపవచ్చన్న భయాలతో ఐటీ షేర్లు భారీగా పడిపోయాయి. ఈ ప్రభావంతో అనేక కంపెనీల విలువలు 2008 ఆర్థిక సంక్షోభ కాలాన్ని గుర్తు చేసే స్థాయికి చేరాయి. అయితే ప్రస్తుతం నాణ్యమైన ఐటీ షేర్లు తక్కువ ధరల్లో లభిస్తున్నాయని భావించిన పెట్టుబడిదారులు కొనుగోళ్లకు ముందుకు రావడంతో రంగం మళ్లీ కోలుకుంది.
వివరాలు
ఐటీ షేర్ల పెరుగుదలకు ప్రధాన కారణాలు..
రూపాయి పతనం: అమెరికా డాలర్తో పోలిస్తే భారత రూపాయి విలువ భారీగా పడిపోయి రూ.96.40 వద్ద కనిష్ఠ స్థాయికి చేరింది. ఐటీ సంస్థలకు వచ్చే ఆదాయంలో ఎక్కువ భాగం డాలర్ల రూపంలోనే ఉండటంతో రూపాయి బలహీనపడటం ఈ రంగానికి లాభదాయకంగా మారింది. బేర్ మార్కెట్ షార్ట్ కవరింగ్: ఈ ఏడాది ఐటీ రంగం తీవ్ర ఒత్తిడిని ఎదుర్కొనడంతో అనేక మంది వ్యాపారులు షేర్లు ఇంకా పడిపోతాయని భావించి షార్ట్ పొజిషన్లు తీసుకున్నారు. కానీ మార్కెట్లో స్థిరత్వ సంకేతాలు కనిపించడంతో వారు ఒక్కసారిగా తమ పొజిషన్లను ముగించుకోవడం ప్రారంభించారు. దీంతో కొనుగోళ్ల ఒత్తిడి పెరిగి షేర్లు మరింత ఎగిశాయి.
వివరాలు
ఐటీ షేర్ల పెరుగుదలకు ప్రధాన కారణాలు..
తక్కువ వాల్యుయేషన్లు: భారీ పతనం తర్వాత టీసీఎస్, ఇన్ఫోసిస్, విప్రో వంటి ప్రధాన కంపెనీల షేర్ల విలువలు గణనీయంగా తగ్గాయి. గత నాలుగేళ్ల గరిష్ఠ స్థాయిలతో పోలిస్తే ప్రస్తుతం వాటి ధరలు సగం స్థాయిలో ఉండటంతో దీర్ఘకాలిక పెట్టుబడిదారులు కొనుగోళ్లకు ఆసక్తి చూపించారు. అమెరికా బాండ్ ఈల్డ్స్ తగ్గడం: అమెరికా ట్రెజరీ బాండ్ దిగుబడులు తగ్గడం, అక్కడ వడ్డీ రేట్ల పెంపు తీవ్రంగా ఉండకపోవచ్చన్న అంచనాలు ప్రపంచ మార్కెట్లలో ఊరటనిచ్చాయి.ముఖ్యంగా ఎగుమతులపై ఆధారపడే భారత ఐటీ రంగానికి ఇది అనుకూల సంకేతంగా మారింది. పశ్చిమాసియాలో ఉద్రిక్తతలు తగ్గడం: అమెరికా-ఇరాన్ మధ్య చర్చలకు అవకాశం ఉందన్న సంకేతాలతో అంతర్జాతీయ మార్కెట్లలో భయాందోళనలు కొంత తగ్గాయి. దీంతో పెట్టుబడిదారులు మళ్లీ ఐటీ రంగంపై దృష్టి సారించారు.