Lufthansa layoffs: ఉద్యోగులకు బిగ్ షాకిచ్చిన లుఫ్తాన్సా.. 4వేల మందికి ఉద్వాసన!
ఈ వార్తాకథనం ఏంటి
జర్మనీ దిగ్గజ ఎయిర్లైన్స్ లుఫ్తాన్సా వచ్చే ఐదేళ్లలో 4,000 ఉద్యోగాలను తొలగించేందుకు సిద్ధమైంది. ఈ కోతలో ప్రధానంగా అడ్మినిస్ట్రేటివ్‌ పోస్టులు ప్రభావితమవుతాయని కంపెనీ పేర్కొంది. పైలట్లు, కేబిన్‌ క్రూ, గ్రౌండ్‌స్టాఫ్ వంటి ఆపరేషనల్‌ ఉద్యోగాలపై తక్కువ ప్రభావం ఉంటుందని తెలిపింది. ఆర్థిక సమస్యలతోపాటు అంతర్జాతీయ విమానయాన రంగంలో తీవ్రమైన పోటీ కారణంగా ఈ నిర్ణయం తీసుకోవడం జరిగిందని వివరించింది. లుఫ్తాన్సా ఎయిర్‌లైన్స్‌కు యూరోవింగ్స్‌, ఆస్ట్రియన్‌ ఎయిర్లైన్స్, స్విస్‌, బ్రస్సెల్స్‌ ఎయిర్లైన్స్ వంటి అనుబంధ సంస్థలు ఉన్నాయి. మొత్తం 1.03 లక్షల సిబ్బందితో ప్రపంచవ్యాప్తంగా కార్యకలాపాలు నిర్వహిస్తున్న ఈ కంపెనీ, జర్మనీ రెండో ఏడాది మాంద్యంలోకి వెళ్తుండటంతో ఉద్యోగాల కోతకు సిద్ధమవుతోంది.
Details
తగ్గనున్న మానవ వనరుల అవసరం
జర్మనీలో నిరుద్యోగం 10 ఏళ్ల గరిష్ఠానికి చేరింది. అంతే కాక, మరో జర్మన్‌ దిగ్గజం బాష్‌ కూడా 13,000 ఉద్యోగాలను తొలగించనున్నట్లు ప్రకటించింది. లుఫ్తాన్సా ప్రకటన ప్రకారం, డిజిటలైజేషన్‌, ఆర్టిఫిషియల్‌ ఇంటెలిజెన్స్‌ వాడకం పెరగడం వల్ల కొన్ని ప్రాసెస్‌లు ఆటోమేటిక్‌గా మారతాయి. అందువల్ల అడ్మినిస్ట్రేటివ్‌ పనులకు మానవ వనరుల అవసరం తగ్గిపోతుందని పేర్కొంది. 2028 నుంచి 2030 మధ్యకాలానికి 8-10 శాతం ఆపరేటింగ్‌ మార్జిన్‌ సాధించడం లక్ష్యమని తెలిపింది. కంపెనీ అంతర్జాతీయ విమానయాన రంగంలో ఎదుర్కొనే ప్రతికూల ఆర్థిక పరిస్థితులు, తీవ్రమైన పోటీ వలన ఈ నిర్ణయం తప్పనిసరిగా తీసుకోవలసిందని స్పష్టం చేసింది.