US Stock Market Crash: అమెరికా స్టాక్ మార్కెట్లో భారీ పతనం.. 56 ఏళ్ల చరిత్రలో తొలిసారి కుప్పకూలిన ఇంటెల్ షేర్లు!

వ్రాసిన వారు Jayachandra Akuri

Oct 31, 2026

11:17 am

ఈ వార్తాకథనం ఏంటి

అమెరికా స్టాక్ మార్కెట్లలో అమ్మకాల ఒత్తిడి రోజురోజుకూ పెరుగుతోంది. మధ్యంతర ఎన్నికలకు ముందు అక్కడి ప్రధాన సూచీలు వరుస సెషన్లలో నష్టాలను చవిచూస్తున్నాయి. ముఖ్యంగా అక్టోబర్ 30న మార్కెట్లు భారీ పతనాన్ని నమోదు చేశాయి. ఏఐ (Artificial Intelligence) రంగంలో టెక్ దిగ్గజాలు పెడుతున్న భారీ పెట్టుబడులు, వాటి నుంచి ఆశించిన స్థాయిలో ఆదాయాలు రాకపోవడం ఇన్వెస్టర్లను ఆందోళనకు గురిచేస్తోంది. దీనికి తోడు ప్రముఖ చిప్ తయారీ సంస్థ ఇంటెల్ (Intel) షేర్లు కుప్పకూలడం మార్కెట్లపై తీవ్ర ప్రభావం చూపింది. అక్టోబర్ 30 ట్రేడింగ్ సెషన్‌లో నాస్‌డాక్ సూచీ ఏకంగా 2.86 శాతం (747.73 పాయింట్లు) పతనమై 25,437 వద్ద ముగిసింది.

వివరాలు

ఏఐ పెట్టుబడులతో పెరుగుతున్న ఆందోళనలు

డౌ జోన్స్ ఇండస్ట్రియల్ యావరేజ్ 1.09 శాతం నష్టపోయి 51,770.31 వద్ద స్థిరపడింది. ఎస్ అండ్ పీ 500 సూచీ సైతం 1.82 శాతం తగ్గి 7,580.07 వద్ద సెషన్‌ను ముగించింది.

అక్టోబర్ నెలలో ఇప్పటివరకు నాస్‌డాక్ 100 ఇండెక్స్ దాదాపు 5 శాతం మేర పడిపోయింది.

అమెరికా స్టాక్ మార్కెట్ల పతనానికి ప్రధాన కారణాల్లో ఏఐ రంగంపై పెరుగుతున్న భారీ పెట్టుబడులు ఒకటి.

మైక్రోసాఫ్ట్ (Microsoft), మెటా (Meta), గూగుల్ (Google) వంటి ప్రముఖ టెక్ కంపెనీలు ఏఐ మౌలిక సదుపాయాల అభివృద్ధి కోసం భారీ మొత్తంలో ఖర్చు చేస్తున్నాయి.

డేటా సెంటర్లు, కంప్యూటింగ్ సామర్థ్యం, ఇతర సాంకేతిక మౌలిక సదుపాయాల కోసం పెద్ద ఎత్తున నిధులను వెచ్చిస్తున్నాయి.

వివరాలు

లాభాలపై ఇన్వెస్టర్ల సందేహాలు

అయితే ఈ స్థాయిలో పెట్టుబడులు పెడుతున్నప్పటికీ, వాటికి అనుగుణంగా తక్షణ ఆదాయాలు, లాభాలు కంపెనీల త్రైమాసిక ఫలితాల్లో కనిపించడం లేదు.

పెట్టుబడులపై ఆశించిన రాబడులు ఎప్పుడు వస్తాయనే విషయంలో ఇన్వెస్టర్లలో సందేహాలు పెరుగుతున్నాయి.

దీంతో టెక్ కంపెనీల షేర్లలో అమ్మకాలు వెల్లువెత్తుతున్నాయి. ఇదే సమయంలో ఇంటెల్ షేర్లలో భారీ పతనం మార్కెట్ సెంటిమెంట్‌ను మరింత దెబ్బతీసింది.

వివరాలు

ఒక్కరోజే 28.58 శాతం పడిపోయిన ఇంటెల్ షేర్లు

ప్రముఖ చిప్ తయారీ సంస్థ ఇంటెల్ (Intel)షేర్లు అక్టోబర్ 30న చరిత్రలోనే ఎన్నడూ లేనంత భారీ పతనాన్ని నమోదు చేశాయి.

కంపెనీకి చెందిన క్లయింట్ కంప్యూటింగ్, ఫిజికల్ ఏఐ గ్రూప్ ఆదాయాలు గత ఏడాది ఇదే కాలంతో పోలిస్తే 5 శాతం తగ్గడం దీనికి ప్రధాన కారణంగా నిలిచింది.

అక్టోబర్ 29న ఇంటెల్ షేరు ధర 92.07 డాలర్ల వద్ద ముగిసింది. అయితే అక్టోబర్ 30న ట్రేడింగ్ ప్రారంభమైన వెంటనే దాదాపు 23 శాతం పతనంతో 68.36 డాలర్ల వద్ద ప్రారంభమైంది.

ఇంట్రాడేలో అమ్మకాల ఒత్తిడి మరింత పెరగడంతో ఏకంగా 30 శాతానికిపైగా పడిపోయి 63.20 డాలర్ల కనిష్ఠ స్థాయిని తాకింది. చివరకు 28.58 శాతం నష్టంతో 65.76 డాలర్ల వద్ద స్థిరపడింది.

వివరాలు

ఒక్కరోజులోనే భారీగా పడిపోయిన షేర్ విలువ

ఇంటెల్ షేరు 52 వారాల గరిష్ఠ ధర 142.34 డాలర్లుగా ఉండగా, కనిష్ఠ ధర 32.89 డాలర్లుగా ఉంది.

ఒక్కరోజులోనే షేరు విలువ భారీగా పడిపోవడంతో కంపెనీ మార్కెట్ క్యాపిటలైజేషన్‌లో 140 బిలియన్ డాలర్లకు పైగా తగ్గుదల నమోదైంది.

భారత కరెన్సీలో ఈ మొత్తం రూ.13 లక్షల కోట్లకు పైమాటే. దీంతో ఒక్కరోజులోనే ఇన్వెస్టర్ల సంపద భారీగా ఆవిరైంది.

1970 తర్వాత అంటే గత 56 ఏళ్లలో ఇంటెల్ షేరు ఒక్కరోజులో ఈ స్థాయిలో పతనం కావడం ఇదే తొలిసారి.

కంపెనీ భవిష్యత్తు ఆదాయాలపై వెల్లడించిన నిరాశాజనక అంచనాలు, వ్యక్తిగత కంప్యూటర్ల (PC) మార్కెట్లో మందగమనం ఈ భారీ పతనానికి ప్రధాన కారణాలుగా నిలిచాయి.

వివరాలు

అంచనాలను అందుకోని ఇంటెల్ ఆదాయాలు

ఇంటెల్ సంస్థ తదుపరి త్రైమాసికం (Q4) కోసం ఆదాయ అంచనాలను 15 బిలియన్ డాలర్ల నుంచి 16 బిలియన్ డాలర్ల మధ్య ప్రకటించింది.

అయితే ఈ అంచనాలు వాల్‌స్ట్రీట్ విశ్లేషకులు ముందుగా వేసిన అంచనాల కంటే చాలా తక్కువగా ఉన్నాయి. దీనికి తోడు కంపెనీ లాభాల మార్జిన్లు కూడా తగ్గనున్నట్లు వెల్లడించింది.

ప్రస్తుతం ఉన్న 44 శాతం లాభాల మార్జిన్లు తదుపరి త్రైమాసికంలో 38 శాతానికి పడిపోవచ్చని అంచనా వేసింది. ఈ పరిణామాలు ఇన్వెస్టర్లలో మరింత ఆందోళన పెంచాయి.

వివరాలు

పీసీ మార్కెట్ మందగమనం.. పెరిగిన చిప్స్ ధరలు

ప్రపంచ మార్కెట్లో మెమొరీ చిప్స్ ధరలు భారీగా పెరగడం కూడా ఇంటెల్‌కు ప్రతికూలంగా మారింది.

చిప్స్ ధరలు పెరగడంతో ల్యాప్‌టాప్‌లు, పర్సనల్ కంప్యూటర్ల తయారీ వ్యయం అధికమైంది. ఫలితంగా పీసీల ధరలు పెరిగి వాటికి డిమాండ్ తగ్గింది.

మరోవైపు పలు కంపెనీలు తమ ఐటీ బడ్జెట్లను తగ్గించుకోవడంతో కంప్యూటర్ల కొనుగోళ్లు మందగించాయి.

ఈ పరిణామాలన్నీ ఇంటెల్ ప్రధాన ఆదాయ వనరుగా ఉన్న పీసీ చిప్స్ విభాగంపై తీవ్ర ప్రభావం చూపాయి. ఇప్పటికే ఆదాయాల విషయంలో ఒత్తిడిని ఎదుర్కొంటున్న సంస్థకు ఇది మరో ఎదురుదెబ్బగా మారింది.

వివరాలు

ఇజ్రాయెల్ ప్లాంట్‌లో అగ్నిప్రమాదం

ఇంటెల్ ఎదుర్కొంటున్న సమస్యలకు ఇజ్రాయెల్‌లోని చిప్ తయారీ ప్లాంట్‌లో జరిగిన అగ్నిప్రమాదం కూడా తోడైంది. ఈ ప్రమాదం కారణంగా అక్కడి ప్లాంట్‌లో దాదాపు రెండు వారాల పాటు ఉత్పత్తి నిలిచిపోయింది.

దీంతో చిప్స్ తయారీ, సరఫరాపై ప్రభావం పడటంతో కంపెనీ ఆదాయానికి గండి పడింది.

మొత్తంగా ఏఐ రంగంలో భారీ పెట్టుబడులపై రాబడుల విషయంలో నెలకొన్న అనిశ్చితి, పీసీ మార్కెట్ మందగమనం, చిప్స్ తయారీ ఖర్చుల పెరుగుదల, ఉత్పత్తి అంతరాయాలు అమెరికా టెక్ రంగాన్ని ఒత్తిడిలోకి నెట్టాయి.

ఈ ప్రభావంతో ఇంటెల్ షేర్లు చారిత్రక పతనాన్ని నమోదు చేయగా, అమెరికా ప్రధాన స్టాక్ మార్కెట్ సూచీలు సైతం భారీ నష్టాలతో ముగిశాయి.