Stock Market: స్టాక్ మార్కెట్‌కు సరికొత్త జోష్.. ఆల్‌ టైమ్ రికార్డ్ సృష్టించిన నిఫ్టీ
ఈ వార్తాకథనం ఏంటి
దేశీయ స్టాక్ మార్కెట్‌ సూచీలు గురువారం కూడా లాభాల దిశలోనే కదులుతున్నాయి. అంతర్జాతీయ మార్కెట్ల నుంచి వచ్చిన సానుకూల సంకేతాలు పెట్టుబడిదారుల్లో నమ్మకాన్ని పెంచడంతో కొనుగోళ్లు మరింత ఊపందుకున్నాయి. దాంతో మార్కెట్‌ సూచీలు వేగంగా ఎగబాకుతున్నాయి.సెన్సెక్స్‌ 85,700 స్థాయిని దాటగా,నిఫ్టీ కూడా సుమారు 14 నెలల తరువాత కొత్త రికార్డు స్థాయిని తాకింది. ఉదయం 9.45కు సెన్సెక్స్‌ (Sensex) 140 పాయింట్లు పెరిగి 85,750 వద్ద నిలువగా,నిఫ్టీ (Nifty) 30 పాయింట్ల లాభంతో 26,235 వద్ద ట్రేడ్‌ అవుతోంది. ట్రేడింగ్‌ మొదట్లో నిఫ్టీ ఒక దశలో 26,295.55 వరకు చేరి కొత్త ఆల్‌టైమ్‌ హైను నమోదు చేసింది. ఇది గత ఏడాది సెప్టెంబర్‌లో నమోదైన 26,277 పాయింట్ల జీవనకాల రికార్డును అధిగమించినట్టైంది.
వివరాలు
డాలర్‌తో పోలిస్తే రూపాయి మారకం విలువ 89.24గా నమోదు
ఇదిలా ఉండగా, డాలర్‌తో పోలిస్తే రూపాయి మారకం విలువ 2 పైసలు బలహీనపడి 89.24 వద్ద కొనసాగుతోంది. నిఫ్టీ లిస్టులో హిందాల్కో, ఎల్‌అండ్‌టీ, ఎన్టీపీసీ, జియో ఫైనాన్షియల్‌, బజాజ్‌ ఫైనాన్స్‌ వంటి షేర్లు బలంగా కనిపిస్తున్నాయి. వేరొక వైపు టైటాన్‌, అపోలో హాస్పిటల్స్‌, మ్యాక్స్ హెల్త్‌కేర్‌, డాక్టర్‌ రెడ్డీస్‌ ల్యాబ్స్‌, టెక్‌ మహీంద్రా షేర్లు ఒత్తిడిని ఎదుర్కొంటున్నాయి. రంగాల వారీగా చూస్తే ఆటో, ఫైనాన్షియల్‌ సర్వీసెస్‌, మెటల్‌, ఫార్మా, బ్యాంకింగ్‌ రంగాలకు చెందిన సూచీలు మొత్తం లాభాల్లో కదులుతున్నాయి.
వివరాలు
భారీ లాభాలతో ముగిసిన అమెరికా మార్కెట్లు
బుధవారం అమెరికా మార్కెట్లు కూడా భారీ లాభాలతో ముగిశాయి. డౌజోన్స్‌ 0.67%, ఎస్‌అండ్‌పీ 500 0.69%, నాస్‌డాక్‌ 0.82% వరకూ ఎగిసాయి. ఆసియా-పసిఫిక్‌ మార్కెట్లు కూడా ఇదే ధోరణిని కొనసాగిస్తున్నాయి. అమెరికా రిటైల్‌ విక్రయాలు అంచనాల కంటే తక్కువగా రావడంతో వినియోగదారుల ఖర్చు తగ్గుతున్నదనే సంకేతాలు స్పష్టమయ్యాయి. దీని ఫలితంగా డిసెంబరులో ఫెడరల్‌ రిజర్వ్‌ వడ్డీ రేట్లను తగ్గించే అవకాశం ఉందనే అంచనాలు బలపడ్డాయి. ఈ పరిణామాలు మార్కెట్‌ సెంటిమెంట్‌ను మరింత బలోపేతం చేశాయి.