Paytm: టెన్షన్ అవసరం లేదు.. పేటియం బ్యాంక్ మూసినా మీ డబ్బు సురక్షితం!
ఈ వార్తాకథనం ఏంటి
ఫిన్టెక్ రంగంలో కీలక స్థానంలో ఉన్న పేటియంకు భారీ ఎదురుదెబ్బ తగిలింది. రిజర్వ్ బ్యాంక్ ఆఫ్ ఇండియా (ఆర్బీఐ) పేటియం పేమెంట్స్ బ్యాంక్ లిమిటెడ్ (PPBL) లైసెన్స్ను రద్దు చేస్తున్నట్లు ప్రకటించింది. ఈ నిర్ణయం తక్షణమే అమల్లోకి వస్తుందని ఆర్బీఐ స్పష్టం చేసింది. అంతేకాకుండా ఈ వ్యవహారంపై తదుపరి చర్యల కోసం హైకోర్టును ఆశ్రయించనున్నట్లు తెలిపింది.
వివరాలు
ఖాతాదారుల డబ్బు సురక్షితమేనా?
లైసెన్స్ రద్దు వార్తలతో ఖాతాదారుల్లో ఆందోళన నెలకొన్నప్పటికీ, పేటియం పేమెంట్స్ బ్యాంక్ తమ అధికారిక ప్రకటనలో డిపాజిటర్ల సొమ్ము పూర్తిగా సురక్షితమని హామీ ఇచ్చింది. ఖాతాదారులందరికీ డిపాజిట్లను తిరిగి చెల్లించేందుకు తగినంత నిధులు తమ వద్ద ఉన్నాయని పేర్కొంది. డబ్బును ఎలా, ఎప్పుడు తిరిగి ఇస్తారనే అంశంపై పూర్తి విధివిధానాలను త్వరలో వెల్లడిస్తామని తెలిపింది.
వివరాలు
ఆర్బీఐ ఎందుకు ఈ నిర్ణయం తీసుకుంది?
పేటియం పేమెంట్స్ బ్యాంక్ పనితీరుపై ఆర్బీఐ చాలా కాలంగా అసంతృప్తిగా ఉన్నట్లు సమాచారం. బ్యాంకింగ్ నిబంధనలను సరైన విధంగా పాటించకపోవడం, యాజమాన్యంపై నమ్మకం కోల్పోవడం, ఖాతాదారుల ప్రయోజనాలకు ముప్పు వాటిల్లే పరిస్థితులు ఏర్పడవచ్చనే ఆందోళనల నేపథ్యంలో ఈ కఠిన నిర్ణయం తీసుకున్నట్లు తెలుస్తోంది. ఇప్పటికే 2022లో కొత్త కస్టమర్లను చేర్చకుండా ఆంక్షలు విధించగా, 2024లో ఖాతాల్లో డిపాజిట్లు స్వీకరించడాన్ని కూడా నిలిపివేసిన విషయం తెలిసిందే. ఈ పరిణామాల ప్రభావం పేటియం ఫాస్టాగ్ సేవలపై కూడా పడింది.