Paytm Wallet Services: పేటీఎంకు ఆర్బీఐ గ్రీన్ సిగ్నల్.. మళ్లీ అందుబాటులోకి వాలెట్ సేవలు!
ఈ వార్తాకథనం ఏంటి
డిజిటల్ చెల్లింపుల రంగంలో పేటీఎంకు మరోసారి మంచి రోజులు వచ్చే సూచనలు కనిపిస్తున్నాయి. తన డిజిటల్ వాలెట్ వ్యాపారం తిరిగి ప్రారంభించేందుకు పేటీఎం అనుబంధ సంస్థ పేటీఎం పేమెంట్స్ సర్వీసెస్ లిమిటెడ్‌కు రిజర్వ్ బ్యాంక్ ఆఫ్ ఇండియా (ఆర్బీఐ) సూత్రప్రాయ అనుమతి ఇచ్చింది. దీంతో నిలిచిపోయిన వాలెట్ సేవలను పునరుద్ధరించే దిశగా సంస్థ కీలక అడుగు వేసినట్లయింది. అయితే వినియోగదారులకు సేవలు అందించాలంటే ఆర్బీఐ నుంచి తుది అనుమతి కూడా రావాల్సి ఉంది.
Details
ఆరు నెలల్లో ఆడిట్ పూర్తి చేయాలి
వాలెట్లతో పాటు ఇతర ప్రీపెయిడ్ పేమెంట్ ఇన్‌స్ట్రుమెంట్లను జారీ చేసి నిర్వహించేందుకు అవసరమైన వ్యవస్థను ఏర్పాటు చేసుకోవడానికి ఈ అనుమతి వీలు కల్పిస్తుంది.
దీనికోసం పేటీఎం పేమెంట్స్ సర్వీసెస్ ఆరు నెలల్లో సిస్టమ్స్ ఆడిట్ పూర్తి చేయాలి.
ఇందులో సైబర్ సెక్యూరిటీ ఆడిట్ కూడా ఉంటుంది. ఆడిట్ నివేదికను ఆర్బీఐకి సమర్పించాలి. నిర్ణీత గడువులో ఈ ప్రక్రియ పూర్తి కాకపోతే సూత్రప్రాయ అనుమతి ఆటోమేటిక్‌గా రద్దవుతుంది.
Details
2024 ఆంక్షలతో నిలిచిన వాలెట్ టాప్‌అప్స్
గతంలో పేటీఎం వాలెట్ సేవలను పేటీఎం పేమెంట్స్ బ్యాంక్ నిర్వహించేది. అయితే నిబంధనల అమలులో లోపాల కారణంగా 2024 జనవరిలో ఆర్బీఐ ఆ బ్యాంకుపై ఆంక్షలు విధించింది.
కొత్త డిపాజిట్లు, వాలెట్ టాప్‌అప్స్‌పై పరిమితులు రావడంతో వినియోగదారులు కొత్తగా డబ్బులు జమ చేసుకోలేకపోయారు.
ఇప్పటికే ఉన్న బ్యాలెన్స్‌ను మాత్రం వినియోగించుకునే అవకాశం కల్పించారు.
Details
బ్యాంక్‌తో సంబంధం లేకుండా కొత్త ప్రయత్నం
2026 ఏప్రిల్ 24న పేటీఎం పేమెంట్స్ బ్యాంక్ లైసెన్స్‌ను ఆర్బీఐ రద్దు చేసింది.
దీంతో వాలెట్ వ్యాపారాన్ని తిరిగి ప్రారంభించేందుకు పేటీఎం మాతృ సంస్థ వన్ 97 కమ్యూనికేషన్స్ తన అనుబంధ సంస్థ పేటీఎం పేమెంట్స్ సర్వీసెస్ ద్వారా కొత్త అనుమతి కోసం దరఖాస్తు చేసింది.
తాజా పరిణామం ఆ ప్రయత్నానికి ఊతమిచ్చింది. తుది అనుమతి వచ్చిన తర్వాతే కొత్త వాలెట్ సేవలు ప్రారంభమవుతాయి.
వినియోగదారులకు మరిన్ని డిజిటల్ చెల్లింపు అవకాశాలు అందించాలన్నది సంస్థ లక్ష్యం.