Shreyas Iyer ODI Captaincy: సచిన్‌ రికార్డ్‌పై కన్నేసిన శ్రేయస్
ఈ వార్తాకథనం ఏంటి
టీమిండియాకు కెప్టెన్‌గా అరంగేట్రం చేయబోతున్న శ్రేయస్ అయ్యర్‌ ముందు ఇప్పుడు ఓ అరుదైన రికార్డు నిలిచింది. న్యూజిలాండ్‌తో జరగనున్న నాలుగో వన్డేలో భారత జట్టును నడిపించే అవకాశం అతడికి దక్కింది. రెగ్యులర్‌ కెప్టెన్‌ శుభ్‌మన్‌ గిల్‌తో పాటు పలువురు కీలక ఆటగాళ్లు చివరి రెండు వన్డేలకు దూరం కావడంతో ఈ బాధ్యతలు శ్రేయస్‌కు అప్పగించారు. ఈ మ్యాచ్‌లో నాయకత్వం వహిస్తే భారత వన్డే జట్టుకు కెప్టెన్సీ చేసిన 29వ ఆటగాడిగా అతడు గుర్తింపు పొందుతాడు. అయితే, కెప్టెన్‌గా తొలి మ్యాచ్‌లోనే ఓ అరుదైన ఘనత సాధించే అవకాశం కూడా అతడి ముందుంది.
Details
సచిన్‌ సాధించిన ఘనతపై ఆసక్తి
భారత క్రికెట్‌ చరిత్రలో కెప్టెన్‌గా తొలి వన్డేలోనే సెంచరీ చేసిన ఆటగాడిగా సచిన్‌ టెండూల్కర్‌ ప్రత్యేకంగా నిలిచాడు.
1996 ఆగస్టు 28న శ్రీలంకతో జరిగిన మ్యాచ్‌లో తొలిసారి భారత జట్టుకు నాయకత్వం వహించిన సచిన్‌ 110 పరుగులతో శతకం బాదాడు.
అయితే, అతడి అద్భుత ఇన్నింగ్స్‌ జట్టుకు విజయాన్ని అందించలేకపోయింది. ఇప్పటివరకు ఈ ఘనత సాధించిన ఏకైక భారత ఆటగాడిగా సచిన్‌ కొనసాగుతున్నాడు.
Details
సెంచరీతో పాటు విజయం సాధిస్తే..
నవంబర్‌ 13న జరగనున్న నాలుగో వన్డే శ్రేయస్‌కు ప్రత్యేకంగా మారనుంది.
కెప్టెన్‌గా తొలి మ్యాచ్‌లోనే సెంచరీ సాధిస్తే సచిన్‌ సరసన నిలుస్తాడు. అంతేకాదు, ఆ శతకానికి జట్టు విజయాన్ని కూడా జోడిస్తే మరో అరుదైన రికార్డు సృష్టించినట్లే.
కెప్టెన్‌గా తొలి వన్డేలో సెంచరీ చేసి, అదే మ్యాచ్‌లో భారత్‌ను గెలిపించిన తొలి ఆటగాడిగా చరిత్రలో నిలిచే అవకాశం అతడికి ఉంది.
Details
శ్రేయస్ ఏం చేస్తాడో?
నవంబర్‌ 19 నుంచి న్యూజిలాండ్‌తో రెండు టెస్టుల సిరీస్‌ ప్రారంభం కానున్న నేపథ్యంలో కీలక ఆటగాళ్లకు విశ్రాంతి ఇచ్చారు.
ఈ పరిస్థితుల్లో శ్రేయస్‌కు దక్కిన కెప్టెన్సీ అవకాశం అతడి నాయకత్వ ప్రతిభను నిరూపించుకునేందుకు ఉపయోగపడనుంది.
మరి సచిన్‌ రికార్డును అందుకోవడంతో పాటు జట్టుకు విజయాన్ని అందించి శ్రేయస్ చరిత్ర సృష్టిస్తాడా? అన్నది ఆసక్తికరంగా మారింది.