PM Modi:భారత్ పరిశోధన-అభివృద్ధిలో నూతన దశకు శ్రీకారం.. రూ.లక్ష కోట్ల ఫండ్ ప్రారంభించిన ప్రధాని మోదీ
ఈ వార్తాకథనం ఏంటి
భారత్ అత్యాధునికం, క్లిష్టతరం,అత్యధిక ప్రభావం కలిగిన పరిశోధన-అభివృద్ధి ప్రాజెక్టులకు పూర్తి స్థాయిలో మద్దతు అందిస్తున్నట్లు ప్రధానమంత్రి నరేంద్ర మోదీ తెలిపారు. సైన్స్ అండ్ టెక్నాలజీ రంగం మరింత దృఢంగా ఎదగాలన్న లక్ష్యంతో, భారత్ను టెక్ పవర్హౌస్గా తీర్చిదిద్దేందుకు ప్రైవేటు పెట్టుబడులను ప్రోత్సహిస్తున్నట్టు ఆయన వివరించారు. న్యూదిల్లీలోని భారత్ మండపం వేదికగా రూ.లక్ష కోట్ల విలువైన పరిశోధన-అభివృద్ధి నిధిని ప్రారంభించిన అనంతరం ప్రధానమంత్రి మోదీ ప్రసంగించారు. దేశంలో ఆధునిక ఆవిష్కరణలను పెంచడం తమ ప్రభుత్వ ప్రధాన లక్ష్యమని పేర్కొన్నారు. గతంతో పోలిస్తే ప్రస్తుతం భారతదేశం పరిశోధన, అభివృద్ధి ఖర్చును రెట్టింపు చేసిందని వెల్లడించారు. ఈ చర్యలు భారత భవిష్యత్తు ఆవిష్కరణలపై తమ ప్రభుత్వ నిబద్ధతను స్పష్టంగా చూపిస్తున్నాయని అన్నారు.
వివరాలు
దేశం మరింత గొప్ప విజయాలను అందుకుంటుంది: మోదీ
విశ్వవిద్యాలయాల్లో పరిశోధన, ఆవిష్కరణలను విస్తరించేందుకు, కొత్త అవకాశాలను తెరవడంలో భాగంగా "అనుసంధాన్ రీసెర్చ్ ఫౌండేషన్"ను స్థాపించినట్లు మోదీ తెలిపారు. అంతరిక్ష పరిశోధనల్లోనూ భారత్ గణనీయమైన పురోగతి సాధిస్తున్నదని, ఈ రంగంలో అహర్నిశలు కృషి చేస్తున్న ఇస్రో శాస్త్రవేత్తలను ప్రశంసించారు. ఆవిష్కరణలు దేశవ్యాప్తంగా వ్యాపించి, సాంకేతికత కొత్త రూపం దాల్చినప్పుడు, దేశం మరింత గొప్ప విజయాలను అందుకుంటుందని మోదీ నమ్మకం వ్యక్తం చేశారు. ప్రైవేటు రంగం కూడా పరిశోధనల్లో ముందడుగు వేయాలన్న ఉద్దేశంతో, ప్రభుత్వం రూ.లక్ష కోట్ల పరిశోధన-అభివృద్ధి నిధిని ఏర్పాటు చేసిందని ఆయన తెలిపారు.