PNB fraud: పీఎన్‌బీ కుంభకోణం.. హాంకాంగ్‌లో ఉన్న జయేశ్‌ షాపై నాన్‌ బెయిలబుల్‌ వారెంట్
ఈ వార్తాకథనం ఏంటి
దేశవ్యాప్తంగా సంచలనం సృష్టించిన పంజాబ్‌ నేషనల్‌ బ్యాంక్ (PNB) కుంభకోణం కేసులో కీలక పరిణామం చోటుచేసుకుంది. ఈ కేసులో నిందితుడిగా ఉన్న హాంకాంగ్‌కు చెందిన జయేశ్‌ షాపై ప్రత్యేక సీబీఐ (CBI) కోర్టు నాన్‌ బెయిలబుల్‌ వారెంట్ జారీ చేసింది. ఈ వారెంట్‌కు గడువు లేకుండా (Open-ended) ఆదేశాలు ఇచ్చింది. దర్యాప్తులో భాగంగా భారత్‌కు తిరిగి రావాలని పలుమార్లు కోరినా ఆయన స్పందించకపోవడంతో కోర్టు ఈ నిర్ణయం తీసుకుంది. ఇప్పటికే ఆయనపై రెడ్‌ కార్నర్‌ నోటీసు కూడా జారీ అయింది.
వివరాలు
రూ.13,579 కోట్ల కుంభకోణంలో ఆరోపణలు
మెహుల్‌ చోక్సీకి చెందిన గీతాంజలి గ్రూప్‌ సంస్థలకు సంబంధించిన రూ.13,579 కోట్ల బ్యాంకింగ్‌ మోసంలో జయేశ్‌ షా పాత్ర ఉన్నట్లు సీబీఐ ఆరోపిస్తోంది.
హాంకాంగ్‌కు చెందిన 4C's Diamonds Distributors సంస్థలో భాగస్వామిగా ఉన్న ఆయన.. బ్యాంకింగ్‌ నిబంధనలను పక్కనపెట్టి గీతాంజలి గ్రూప్‌ సంస్థలకు అక్రమంగా లెటర్స్‌ ఆఫ్‌ అండర్‌టేకింగ్‌ (LoUs) జారీ అయ్యేలా కార్యకలాపాలను నిర్వహించినట్లు అభియోగాలు నమోదయ్యాయి.
ఈ కేసులో సీబీఐ జులైలో దాఖలు చేసిన అనుబంధ ఛార్జ్‌షీట్‌లో జయేశ్‌ షా పేరును కూడా చేర్చింది.
ఆయనతో పాటు పీఎన్‌బీ మాజీ అంతర్గత చీఫ్‌ ఆడిటర్‌ బిష్ణుబ్రత మిశ్రా, గీతాంజలి జెమ్స్‌ సంస్థ దిగుమతి-ఎగుమతుల మేనేజర్‌ అజిత్‌ భేడా తదితరుల పేర్లను కూడా ఛార్జ్‌షీట్‌లో పేర్కొంది.
వివరాలు
విచారణకు హాజరుకావాలని ఈ-మెయిల్‌, ఫోన్‌ ద్వారా సమాచారం
జయేశ్‌ షా నేరం నమోదవ్వడానికి ముందే హాంకాంగ్‌లో నివసిస్తున్నట్లు కోర్టు గుర్తించింది.
2021 మార్చి 3న సీబీఐ ఆయనకు ఈ-మెయిల్‌ పంపడంతో పాటు ఫోన్‌ చేసి దర్యాప్తులో భాగంగా భారత్‌కు వచ్చి విచారణకు హాజరుకావాలని కోరింది.
అయితే ఆయన భారత్‌కు వచ్చేందుకు నిరాకరించినట్లు న్యాయమూర్తి పేర్కొన్నారు. ఆ తర్వాత జయేశ్‌ షాపై రెడ్‌ కార్నర్‌ నోటీసు జారీ చేశారు.
అయినప్పటికీ ఆయన విచారణకు హాజరుకాకపోవడంతో అదనపు సెషన్స్‌ జడ్జి ఎస్‌.కె. కర్హాలే తాజాగా గడువు లేని నాన్‌ బెయిలబుల్‌ వారెంట్ జారీ చేశారు.
వివరాలు
ప్రాసిక్యూషన్‌కు దూరంగా ఉండేందుకే విదేశాల్లో నివాసం
జయేశ్‌ షా కావాలనే విదేశాల్లో నివసిస్తూ విచారణ, ప్రాసిక్యూషన్‌ నుంచి తప్పించుకునేందుకు ప్రయత్నిస్తున్నారని కోర్టు అభిప్రాయపడింది.
ఈ-మెయిల్‌, ఫోన్‌ ద్వారా సంప్రదించినప్పటికీ ఆయన దర్యాప్తునకు సహకరించేందుకు నిరాకరించారని సీబీఐ కోర్టు దృష్టికి తీసుకెళ్లింది.
ఈ వాదనలను పరిశీలించిన అనంతరం కోర్టు వారెంట్ జారీ చేసింది. కాగా పంజాబ్‌ నేషనల్‌ బ్యాంక్ కుంభకోణం మొత్తం విలువ సుమారు రూ.23,000 కోట్లుగా అంచనా.
ఈ భారీ మోసంలో మెహుల్‌ చోక్సీకి చెందిన సంస్థలతో పాటు ఆయన మేనల్లుడు, వజ్రాల వ్యాపారి నీరవ్‌ మోదీకి సంబంధం ఉన్న సంస్థల పేర్లు కూడా ఉన్నాయి. ఈ కేసులో జయేశ్‌ షాపై తాజా వారెంట్ జారీ కావడం ప్రాధాన్యం సంతరించుకుంది.