Stock Market: 500 పాయింట్లు పెరిగిన సెన్సెక్స్.. 24,150 దాటిన నిఫ్టీ.. నేటి మార్కెట్ జోష్‌కు 6 ప్రధాన కారణాలు ఇవే..

వ్రాసిన వారు Sirish Praharaju

Jun 22, 2026

11:13 am

ఈ వార్తాకథనం ఏంటి

దేశీయ స్టాక్ మార్కెట్లు సోమవారం బలంగా పుంజుకున్నాయి. అంతర్జాతీయ మార్కెట్ల నుంచి వచ్చిన సానుకూల సంకేతాలు, ముడి చమురు ధరలు తగ్గడం, విదేశీ పెట్టుబడుల ప్రవాహం పెరగడం, రిలయన్స్ ఇండస్ట్రీస్‌లో భారీ కొనుగోళ్లు జరగడం వంటి అంశాలు మార్కెట్‌కు ఊతమిచ్చాయి. ఉదయం 11 గంటల సమయానికి సెన్సెక్స్ 503 పాయింట్లు లాభపడి 77,306 వద్ద ట్రేడవగా, నిఫ్టీ 152 పాయింట్లు పెరిగి 24,165 స్థాయికి చేరుకుంది. మార్కెట్ ర్యాలీకి ప్రధాన కారణాల్లో అమెరికా-ఇరాన్ మధ్య జరిగిన తొలి విడత శాంతి చర్చలు ఒకటి. రెండు దేశాలు 60రోజుల్లో తుది ఒప్పందానికి చేరుకునే రోడ్‌మ్యాప్‌పై పురోగతి సాధించినట్లు వార్తలు రావడంతో ఇన్వెస్టర్లలో విశ్వాసం పెరిగింది.

వివరాలు

బ్రెంట్ క్రూడ్ ధర బ్యారెల్‌కు 79.36 డాలర్లు

వర్షాభావ పరిస్థితులు మినహా ప్రస్తుతం మార్కెట్‌కు పెద్దగా ప్రతికూల అంశాలు కనిపించడం లేదని మార్కెట్ నిపుణులు పేర్కొన్నారు. మరోవైపు, అంతర్జాతీయ కమోడిటీ మార్కెట్లలో బ్రెంట్‌ క్రూడ్‌ చమురు ధర బ్యారెల్‌కు 79.36 డాలర్లకు పడిపోవడం పెట్టుబడిదారులకు ఊరటనిచ్చింది. చమురు ధరలు తగ్గడం భారత ఆర్థిక వ్యవస్థకు అనుకూలంగా భావిస్తున్నారు. విదేశీ సంస్థాగత పెట్టుబడిదారులు (FIIs) కూడా మార్కెట్‌కు బలాన్నిచ్చారు. శుక్రవారం ఒక్కరోజే రూ.4,859 కోట్ల విలువైన షేర్లను కొనుగోలు చేశారు. ఫిబ్రవరి ప్రారంభం తర్వాత ఇదే అతిపెద్ద కొనుగోలు. జూన్ 15 తర్వాత విదేశీ పెట్టుబడిదారుల ధోరణిలో స్పష్టమైన మార్పు కనిపిస్తోందని విశ్లేషకులు చెబుతున్నారు. రూపాయి స్థిరంగా ఉండటం, క్రమంగా బలపడటం ఇందుకు ప్రధాన కారణమని అభిప్రాయపడుతున్నారు.

వివరాలు

2.5శాతం వరకు లాభపడిన రిలయన్స్ ఇండస్ట్రీస్

రిలయన్స్ ఇండస్ట్రీస్ షేర్లు కూడా 2.5శాతం వరకు లాభపడటంతో మార్కెట్‌కు మరింత మద్దతు లభించింది. వార్షిక సాధారణ సమావేశం (AGM) అనంతరం జియో ప్లాట్‌ఫార్మ్స్, కృత్రిమ మేధస్సు (AI), నూతన ఇంధన రంగాల్లో కంపెనీ వృద్ధి అవకాశాలు మెరుగ్గా ఉన్నాయని బ్రోకరేజ్ సంస్థలు పేర్కొన్నాయి. టెలికాం, రిటైల్, ఎనర్జీ, కొత్త వ్యాపారాల్లో రిలయన్స్‌కు విస్తృత అవకాశాలు ఉన్నాయని విశ్లేషణలు వెల్లడించాయి. ఆసియా మార్కెట్లలో కూడా సానుకూల ధోరణి కొనసాగింది. దక్షిణ కొరియా కోస్పీ, జపాన్ నిక్కీ-225, చైనా షాంఘై సూచీలు లాభాల్లో ట్రేడవడంతో భారత మార్కెట్లకు మద్దతు లభించింది. అమెరికా మార్కెట్లు సెలవు కారణంగా మూతపడినా, గత ట్రేడింగ్ సెషన్‌లో నాస్‌డాక్, ఎస్&పీ 500 సూచీలు బలంగా పెరగడం పెట్టుబడిదారుల సెంటిమెంట్‌ను మెరుగుపరిచింది.

వివరాలు

గత రెండు రోజులుగా ఒత్తిడిలో ఉన్న ఐటీ షేర్లు

గత రెండు రోజులుగా ఒత్తిడిలో ఉన్న ఐటీ షేర్లు కూడా సోమవారం కోలుకున్నాయి. శుక్రవారం భారీ నష్టాల తర్వాత నిఫ్టీ ఐటీ సూచీ 1.2 శాతం వరకు పెరిగింది. ఇటీవల అమ్మకాల ఒత్తిడి ఎదుర్కొన్న ఐటీ రంగంలో మళ్లీ కొనుగోళ్లు ప్రారంభం కావడం మార్కెట్‌కు అదనపు బలం ఇచ్చింది. సాంకేతిక విశ్లేషణ ప్రకారం, మార్కెట్‌లో ఇంకా పైస్థాయిలకు వెళ్లే అవకాశాలు ఉన్నాయని నిపుణులు చెబుతున్నారు. ఈ వారంలో నిఫ్టీ 24,300 నుంచి 24,600 స్థాయిలను పరీక్షించే అవకాశం ఉందని, అదే సమయంలో 23,800 స్థాయిని కీలక మద్దతు స్థాయిగా పరిగణించాలని సూచిస్తున్నారు.