TCS ends layoffs: ఉద్యోగుల తగ్గింపుల తర్వాత టీసీఎస్ కీలక ప్రకటన - ఇక లేఆఫ్స్ లేవు, భారీ నియామకాలపై దృష్టి
ఈ వార్తాకథనం ఏంటి
భారత్లో మార్కెట్ విలువ పరంగా అగ్రస్థానంలో ఉన్న టాటా కన్సల్టెన్సీ సర్వీసెస్ గత ఆర్థిక సంవత్సరం 2025-26లో భారీ స్థాయిలో ఉద్యోగుల సంఖ్యను తగ్గించుకుంది. మార్చి నెల చివరి నాటికి సంస్థలో మొత్తం ఉద్యోగుల సంఖ్య 5,84,519గా నమోదైంది. అంతకుముందు ఆర్థిక సంవత్సరంతో పోలిస్తే 23,460 మంది ఉద్యోగులు తగ్గడం గమనార్హం. సాధారణంగా టాటా బ్రాండ్లో భాగమైన టీసీఎస్ను ఐటీ రంగంలో ప్రమాణంగా భావిస్తారు. అలాంటి సంస్థలోనే ఈ స్థాయి తగ్గుదల కనిపించడం రంగంపై ప్రభావాన్ని చూపుతోంది. ఇతర సంస్థలు కూడా ఖర్చులను తగ్గించుకునే క్రమంలో ఉద్యోగులను తగ్గిస్తున్నప్పటికీ,టీసీఎస్పై దీని ప్రభావం ఎక్కువగా కనిపించింది. ఈ పరిస్థితుల్లో టీసీఎస్ నుంచి లేఆఫ్స్పై కీలక సమాచారం వెలువడింది.సంస్థలో పునర్వ్యవస్థీకరణ దశ పూర్తయిందని సంకేతాలు ఇచ్చింది.
వివరాలు
ప్రాంగణ నియామకాలు ఉంటాయని స్పష్టం
అదే సమయంలో ప్రాంగణ నియామకాల విషయంలో మరింత వేగంగా ముందుకు వెళ్లనున్నట్లు తెలిపింది. ఇకపై లేఆఫ్స్ ఉండబోవని స్పష్టం చేయడం ఉద్యోగులకు, కొత్తగా ఉద్యోగాల కోసం ఎదురు చూస్తున్న వారికి ఊరటనిస్తోంది. ఇప్పటికే 25 వేలకుపైగా ప్రాంగణ ఆఫర్లు ఇచ్చామని, ఈ ఏడాది మొత్తం 40 వేల మంది కొత్తవారిని నియమించుకోవాలని లక్ష్యంగా పెట్టుకున్నామని సంస్థ మానవ వనరుల విభాగం అధికారి సుదీప్ కున్నుమల్(Sudeep Kunnumal) వెల్లడించారు. 2025-26 ఆర్థిక సంవత్సరంలో టీసీఎస్ సుమారు 44 వేల మంది శిట్రైనీలను నియమించుకుంది. జనవరి నుంచి మార్చి వరకు జరిగిన చివరి త్రైమాసికంలో ఇతర విభాగాల నుంచి నియామకాలు, కొత్తవారిని చేర్చుకోవడం వల్ల ఉద్యోగుల సంఖ్య నికరంగా 2,356 పెరిగినట్లు ఆయన వివరించారు.
వివరాలు
ఇక లేఆఫ్స్ లేవు
టీసీఎస్ గతంలో ప్రకటించిన ఉద్యోగాల కోత ప్రక్రియ ఇప్పుడు ముగిసిందని సంస్థ స్పష్టం చేసింది. మొత్తం ఉద్యోగుల్లో సుమారు 2 శాతం వరకు తగ్గించాలని, కఠినమైన విధానాలను అమలు చేయాలని 2025లో నిర్ణయించిన విషయం తెలిసిందే. ఈ చర్యలు ముఖ్యంగా మధ్యస్థాయి, ఉన్నతస్థాయి ఉద్యోగులపై ప్రభావం చూపించాయి. ఐటీ రంగంలో కృత్రిమ మేధ ప్రభావంపై కూడా సంస్థ స్పందించింది. కృత్రిమ మేధ అభివృద్ధి చెందుతున్న కొద్దీ సాంకేతిక భాగస్వాములపై ఆధారపడాల్సిన అవసరం పెరుగుతుందని పేర్కొంది. ఈ ప్రయోజనాలను పూర్తిగా పొందాలంటే వ్యక్తులు, సంస్థలు టీసీఎస్ వంటి సంస్థల సహకారం అవసరమని తెలిపింది. డిజిటల్ మార్పు కొత్త దశలో టీసీఎస్ కీలక పాత్ర పోషిస్తుందని సంస్థ భావిస్తోంది.
వివరాలు
త్రైమాసిక ఫలితాలు
ఏప్రిల్ 9న టీసీఎస్ 2025-26 ఆర్థిక సంవత్సరం చివరి త్రైమాసిక ఫలితాలను ప్రకటించింది. ఈ కాలంలో సంస్థ నికర లాభం సంవత్సర ప్రాతిపదికన 12 శాతం పెరిగి రూ. 13,718 కోట్లకు చేరుకుంది. ఆదాయం 9.6 శాతం పెరిగి రూ. 70,698 కోట్లుగా నమోదైంది. త్రైమాసిక ప్రాతిపదికన చూస్తే నికర లాభం 19.4 శాతం, ఆదాయం 5.4 శాతం పెరిగాయి.