Billionaires: 2025లో $745 బిలియన్లు పెరిగిన టాప్ 18 బిలియనీర్ల సంపద

వ్రాసిన వారు Sirish Praharaju

Dec 29, 2025

12:19 pm

ఈ వార్తాకథనం ఏంటి

2025లో ప్రపంచంలోని అతి సంపన్నుల సంపద భారీగా పెరిగింది. గ్లోబల్ ఈక్విటీ మార్కెట్లు స్థిరంగా పెరుగుతుండటంతో బిలియనీర్ల సంపద కొత్త రికార్డులకు చేరింది. ముఖ్యంగా ఆర్టిఫిషియల్ ఇంటెలిజెన్స్ (AI) కంపెనీల్లోకి భారీగా పెట్టుబడులు రావడం, బలమైన ఆర్థిక గణాంకాలు, వడ్డీ రేట్లు తగ్గుతాయనే అంచనాలు, విదేశీ పెట్టుబడులు నిలకడగా రావడం వంటి అంశాలు మార్కెట్లలో జోష్ పెంచాయి. ఈ నేపథ్యంలో $100 బిలియన్లకు పైగా సంపద ఉన్న బిలియనీర్ల పరిస్థితిని ఈ నివేదిక ట్రాక్ చేసింది.

$100 బిలియన్లు

$100 బిలియన్లకు పైగా సంపద ఉన్నవారు 18 మంది

ప్రస్తుతం ప్రపంచవ్యాప్తంగా $100 బిలియన్లకు మించిన సంపద కలిగిన బిలియనీర్లు మొత్తం 18 మంది ఉన్నారు. వీరిలో ఒకరిని తప్పితే మిగతా అందరి సంపద 2025లో పెరిగింది. బిల్ గేట్స్ మాత్రం మినహాయింపు. బిల్ & మెలిండా గేట్స్ ఫౌండేషన్ ద్వారా తన సంపదలో పెద్ద భాగాన్ని దానం చేయాలనే నిర్ణయం వల్ల ఆయన నికర సంపద సుమారు 26 శాతం తగ్గి $118 బిలియన్లకు చేరింది.

వివరాలు

అమెరికా బిలియనీర్లదే ఆధిపత్యం

ఈ 18 మంది బిలియనీర్లు కలిసి 2025లో తమ సంపదకు సుమారు $745 బిలియన్లు జోడించారు. వీరిలో 14 మంది అమెరికాకు చెందినవారు కాగా, ఫ్రాన్స్, స్పెయిన్, మెక్సికో, భారత్ నుంచి ఒక్కొక్కరు ఉన్నారు. అత్యధికంగా లాభపడిన వారిలో గూగుల్ మాతృసంస్థ ఆల్ఫాబెట్ సహ-వ్యవస్థాపకులు సెర్గీ బ్రిన్, లారీ పేజ్ ఉన్నారు. బ్రిన్ సంపద 59 శాతం పెరిగి $252 బిలియన్లకు చేరగా, పేజ్ సంపద 57 శాతం పెరిగి $280 బిలియన్లకు చేరింది.

వివరాలు

$700 బిలియన్ల మైలురాయిని దాటిన ఎలాన్ మస్క్

బిలియనీర్లలో మూడో అతిపెద్ద లాభం ఎలాన్ మస్క్‌దే. ఆయన సంపద 50 శాతం కంటే ఎక్కువగా పెరిగింది. దీంతో చరిత్రలో తొలిసారిగా $700 బిలియన్ల సంపదను దాటిన వ్యక్తిగా మస్క్ నిలిచారు. టెస్లా, స్పేస్‌ఎక్స్, xAI కంపెనీల విలువలు పెరగడం దీనికి ప్రధాన కారణం. ముఖ్యంగా స్పేస్‌ఎక్స్ 2026లో ఐపీఓకి వెళ్లే లక్ష్యంతో, దాని విలువను దాదాపు $1.5 ట్రిలియన్లుగా అంచనా వేస్తున్నారు. ఫోర్బ్స్ రియల్ టైమ్ బిలియనీర్ల జాబితా ప్రకారం, ప్రస్తుతం మస్క్ సంపద $744 బిలియన్లకు పైగా ఉంది.

వివరాలు

ఇతర బిలియనీర్ల సంపద కూడా భారీగా పెరుగుదల

అమెరికా మొవిల్ అధినేత కార్లోస్ స్లిమ్, ఎన్‌విడియా సీఈఓ జెన్సెన్ హువాంగ్ నాలుగో, ఐదో స్థానాల్లో అత్యధిక లాభాలు పొందారు. స్లిమ్ సంపద 41 శాతం పెరిగి $112 బిలియన్లకు చేరగా, హువాంగ్ సంపద 37 శాతం పెరిగి $157 బిలియన్లకు చేరింది. వీరి కంపెనీల షేర్ల ధరలు పెరగడం ఇందుకు కారణం. అలాగే వాల్మార్ట్ షేర్లు దాదాపు 23 శాతం పెరగడంతో, వాల్టన్ కుటుంబానికి చెందిన రాబ్, జిమ్, అలీస్ వాల్టన్‌ల సంపద కూడా సుమారు 22 శాతం మేర పెరిగింది.