Aadhaar Card: ఆధార్ సేవలు మరింత సులభం.. గూగుల్ మ్యాప్స్లో కనిపించనున్న సెంటర్లు
ఈ వార్తాకథనం ఏంటి
భారతదేశంలో నివసించే ప్రతి పౌరుడికి అత్యంత కీలకమైన గుర్తింపు పత్రం ఆధార్ కార్డ్. ఇది లేకుండా దేశంలో అనేక ప్రభుత్వ, ప్రైవేట్ సేవలను పొందడం సాధ్యం కాదు. ప్రభుత్వ పథకాల లబ్ధులు పొందడం నుంచి హోటళ్లలో చెక్-ఇన్ చేయడం వరకు దాదాపు ప్రతి సందర్భంలో గుర్తింపు ధృవీకరణగా ఆధార్ను వినియోగిస్తారు. అందువల్ల ఎప్పుడు అవసరం వస్తుందో తెలియక ప్రతి ఒక్కరూ తమ వెంట ఆధార్ను తప్పనిసరిగా ఉంచుకోవాల్సి వస్తోంది. ప్రజలకు ఆధార్ సంబంధిత సేవలను మరింత సులభంగా అందించేందుకు భారత విశిష్ట గుర్తింపు ప్రాధికార సంస్థ (UIDAI) తరచుగా కొత్త సౌకర్యాలను ప్రవేశపెడుతోంది. తాజాగా వినియోగదారుల సౌలభ్యం కోసం మరో కొత్త సదుపాయాన్ని అందుబాటులోకి తీసుకువచ్చింది.
వివరాలు
గూగుల్ మ్యాప్స్లో ఆధార్ సేవా కేంద్రాలు
కొత్త ఆధార్ కార్డు పొందాలన్నా లేదా ఇప్పటికే ఉన్న వివరాల్లో మార్పులు చేయించుకోవాలన్నా సమీపంలోని ఆధార్ సేవా కేంద్రాన్ని సందర్శించాల్సిందే. ఈ ప్రక్రియను సులభతరం చేయడానికి దేశవ్యాప్తంగా ఉన్న ధృవీకరించిన ఆధార్ సేవా కేంద్రాలను గూగుల్ మ్యాప్స్లో నమోదు చేయనున్నారు. ఇప్పటివరకు అనేక కేంద్రాల యజమానులు తమ వివరాలను గూగుల్ మ్యాప్స్లో నమోదు చేయకపోవడం లేదా కొంతమంది తప్పుదోవ పట్టించే సమాచారం ఇవ్వడం వల్ల సరైన లొకేషన్ను గుర్తించడం ప్రజలకు ఇబ్బందిగా మారింది. ఈ సమస్యకు పరిష్కారంగా ఎలక్ట్రానిక్స్ మరియు సమాచార సాంకేతిక మంత్రిత్వ శాఖ, యూఐడీఏఐ కలిసి గూగుల్తో భాగస్వామ్యం చేసి దేశంలోని ప్రతి ఆధార్ సేవా కేంద్రాన్ని గూగుల్ మ్యాప్స్లో నమోదు చేయాలని నిర్ణయించాయి.
వివరాలు
లొకేషన్తో పాటు పూర్తి వివరాలు
కేవలం చిరునామా మాత్రమే కాకుండా, ఆయా కేంద్రాల్లో అందుబాటులో ఉన్న సేవల వివరాలను కూడా ప్రజలు గూగుల్ మ్యాప్స్లో చూడగలరు. బాలల ఆధార్ నమోదు, పెద్దల ఆధార్ సేవలు, మొబైల్ నంబర్ నవీకరణ, చిరునామా సవరణ వంటి సేవలు అందుబాటులో ఉన్నాయా లేదా అన్న సమాచారం రియల్ టైమ్లో తెలుసుకునే వీలుంటుంది. దీంతో తమ అవసరానికి తగిన సేవ ఏ కేంద్రంలో లభిస్తుందో ముందుగానే తెలుసుకుని వెళ్లవచ్చు.
వివరాలు
లొకేషన్తో పాటు పూర్తి వివరాలు
అదనంగా కేంద్రాల పని వేళలు, పార్కింగ్ సౌకర్యం, దివ్యాంగులకు వీల్చైర్ వంటి సదుపాయాల సమాచారం కూడా అందుబాటులో ఉంటుంది. భవిష్యత్తులో ఆధార్ కేంద్రాలను సందర్శించేందుకు ముందస్తుగా అపాయింట్మెంట్ బుక్ చేసుకునే అవకాశం కూడా గూగుల్ మ్యాప్స్ ద్వారా కల్పించనున్నారు. దీనివల్ల ఇంటి నుంచే సమయం ఖరారు చేసుకుని నిర్దిష్ట సమయంలో కేంద్రాన్ని సందర్శించవచ్చు. దీంతో క్యూల్లో నిల్చోవాల్సిన అవసరం తగ్గి సమయం ఆదా అవుతుంది.