బాహుబలి 2: భారతీయ సినిమా రంగాన్ని తెలుగు సినిమా వైపు తిప్పిన చిత్రానికి ఆరేళ్ళు
ఈ వార్తాకథనం ఏంటి
బాహుబలి సినిమా రాకపోతే పాన్ ఇండియా అన్న పదమే వచ్చి ఉండేది కాదేమో! భారతీయ సినిమా రంగంలో బాహుబలి ఒక పెద్ద సంచలనం. రాజమౌళి సృష్టించిన అద్భుతానికి ఔరా అనని వాళ్ళు లేరంటే అతిశయోక్తి కాదు. బాహుబలి 2 సినిమా రిలీజై నేటికి ఆరేళ్ళు పూర్తవుతుంది. తెలుగు సినిమా చరిత్రను మార్చిన సినిమా విడుదలయ్యి అర్థపుష్కరం గడిచింది. ఈ నేపథ్యంలో బాహుబలి 2 గురించి మాట్లాడుకుందాం. లక్షల మందిని ఎదురుచూసేలా చేసిన ఒక్క మాట: బాహుబలిని కట్టప్ప ఎందుకు చంపాడు? అనే మాట సినీ అభిమానుల్లో మాత్రమే కాదు సినిమాలు పెద్దగా చూడని వారిలోనూ ఆసక్తిని కలిగించింది. ఎప్పుడూ సినిమాలు చూడని వారు సైతం బాహుబలి చూడాలనుకున్నారు.
Details
హిందీలో ఎక్కువ కలెక్షన్లు సాధించిన చిత్రంగా బాహుబలి 2
బాహుబలి రిలీజైన రెండేళ్ల తర్వాత బాహుబలి 2 చిత్రం రిలీజైంది. విడుదలైన అన్ని చోట్లా బాహుబలి 2 సినిమాకు మంచి ఆదరణ లభించింది. మొత్తం ఫుల్ రన్ లో బాహుబలి 2 సినిమాకు 1800కోట్ల వసూళ్ళు వచ్చాయి. తెలుగులో రూపొందిన ఈ సినిమా, హిందీలో అత్యంత ఎక్కువ కలెక్షన్లు సాధించిన చిత్రంగా నిలిచింది. ఇటు కన్నడలోనూ, అటు తమిళంలోనూ అదే పరిస్థితి. ఒక డబ్బింగ్ చిత్రానికి ఆ స్థాయి కలెక్షన్లు వస్తాయని అప్పట్లో ఎవ్వరూ ఊహించలేదు. అదే మరి రాజమౌళి మ్యాజిక్ అంటే. బాహుబలి చిత్రంలో ప్రభాస్, రానా దగ్గుబాటి, అనుష్క శెట్టి, నాజర్, రమ్యకృష్ణ, సత్యరాజ్, సుబ్బరాజు, తమన్నా ప్రధాన పాత్రల్లో నటించారు.