ఆదిపురుష్ ప్రీమియర్ షో రద్దు: నిరాశలో ప్రభాస్ ఫ్యాన్స్
ప్రభాస్ రాముడిగా బాలీవుడ్ నటి క్రితి సనన్ సీతగా నటిస్తున్న చిత్రం ఆదిపురుష్. వాల్మీకీ రామాయణాన్ని వెండితెర అద్భుతంగా ఆవిష్కరించబోతున్నాడు దర్శకుడు ఓం రౌత్. ఈ సినిమా, జూన్ 16వ తేదీన ప్రపంచ వ్యాప్తంగా రిలీజ్ అవుతుంది. అయితే జూన్ 13,15,17 తేదీలలో అమెరికాలోని ట్రిబెకా ఫిలిమ్ ఫెస్టివల్ లో ఆదిపురుష్ ప్రీమియర్లు పడనున్నాయని మేకర్స్ తెలియజేసారు. ప్రస్తుత సమాచారం ప్రకారం జూన్ 13న జరిగే ప్రీమియర్ షో రద్దయ్యింది. 15, 17తేదీల్లోని షోస్ మాత్రం యధావిధిగా జరగనున్నాయట. మరి 13వ తేదీన జరిగే షోని ఎందుకు క్యాన్సిల్ చేసారనేది ఇంకా తెలియలేదు. ఆదిపురుష్ చిత్రంపై అభిమానుల్లో భారీ అంచనాలు ఉన్నాయి. ట్రైలర్ రిలీజైనప్పటి నుండి ఈ అంచనాలు మరింత పెరిగాయి.
గ్రాఫిక్స్ రిపేర్లకు 100కోట్లు
టీజర్ రిలీజ్ అయినపుడు జరిగిన ట్రోలింగ్, ట్రైలర్ రిలీజ్ కావడంతో పూర్తిగా ఆగిపోయింది. పైగా ట్రైలర్ పై ప్రశంసలు కురిసాయి. టీజర్ లోని లోపాలను ట్రైలర్ లో సరిదిద్దారు. గ్రాఫిక్స్ రిపేర్లు చేయడానికి అదనంగా 100కోట్లు అయ్యాయని సమాచారం. త్రీడీలో రిలీజ్ అవుతున్న ఈ సినిమా, తెలుగు సహా హిందీ, తమిళం, కన్నడ, మళయాలం భాషల్లో విడుదలవుతోంది. ఈ సినిమాలో రావణాసురుడిగా బాలీవుడ్ నటుడు సైఫ్ ఆలీ ఖాన్, లక్ష్మణుడిగా సన్నీ సింగ్ నటిస్తున్నారు. టీ సిరీస్, రెట్రో ఫైల్స్ బ్యానర్లు సంయుక్తంగా తెరకెక్కించిన ఈ సినిమాను భూషణ్ కుమార్, ఓం రౌత్, క్రిషన్ కుమార్, ప్రసాద్ సుతార్, రాజేష్ నాయర్, వంశీ ప్రమోద్ నిర్మిస్తున్నారు.
