Anil Ravipudi: చిరంజీవి పాత్ర ప్రేక్షకులను ఆశ్చర్యపరుస్తుంది.. అనిల్‌ రావిపూడి ఆసక్తికర వ్యాఖ్యలు
ఈ వార్తాకథనం ఏంటి
సంక్రాంతికి 'మన శంకర వరప్రసాద్‌ గారు'గా ప్రేక్షకుల ముందుకు రాబోతున్నాడు మెగాస్టార్‌ చిరంజీవి (Chiranjeevi). అనిల్‌ రావిపూడి (Anil Ravipudi) దర్శకత్వంలో రూపొందుతున్న ఈ చిత్రంపై భారీ అంచనాలు నెలకొన్నాయి. తాజాగా ఒక ఈవెంట్‌లో పాల్గొన్న దర్శకుడు ఈ సినిమాకు సంబంధించిన కీలక విషయాలను వెల్లడించారు. ఈసారి సంక్రాంతి ప్రేక్షకులకు డబుల్‌ బొనాంజా అందుతుందని, చిరంజీవి ఎప్పటినుండో అభిమానులు చూడాలని కోరుకునే పాత్రలో కనిపించబోతున్నారని తెలిపారు. అనిల్‌ రావిపూడి మాట్లాడుతూ గత సంక్రాంతి కంటే ఈసారి డబుల్‌ బొనాంజానీ అందించబోతున్నాం. చిరంజీవిగారు చాలా కాలం తర్వాత ఆయనకు అత్యంత నచ్చిన జానర్‌లో నటిస్తున్నారు. కంప్లీట్‌ ఫ్యామిలీ ఎంటర్‌టైనర్‌లో ఆయన చివరిసారి నటించి ఇరవై సంవత్సరాలు దాటింది.
Details
'మీసాల పిల్ల' సాంగ్ కు అద్భుతమైన స్పందన
ఇన్నేళ్ల తర్వాత మళ్లీ అదే జానర్‌తో వస్తుండటంతో ప్రేక్షకులు ఖచ్చితంగా సర్‌ప్రైజ్ అవుతారు. ఇలాంటి పాత్రలతో ఆయన ఎన్నో బ్లాక్‌బస్టర్లు సృష్టించిన సంగతి తెలిసిందే. ప్రస్తుతం విడుదలైన 'మీసాల పిల్ల' పాట అద్భుత స్పందన అందుకుంది. త్వరలోనే మరో పాటను విడుదల చేస్తాం. షూటింగ్‌ పూర్తయ్యాక భారీగా ప్రమోషన్స్‌ను ప్రారంభించనున్నాం. ప్రేక్షకుల ప్రేమతోనే ప్రతి సంక్రాంతికి ఒక సినిమాతో వారి ముందుకు వస్తున్నానన్నారు. ప్రస్తుతం 'మన శంకర వరప్రసాద్‌ గారు' షూటింగ్‌ వేగంగా కొనసాగుతోంది. అనిల్‌ మార్క్‌ ఫ్యామిలీ ఎంటర్‌టైనర్‌గా రూపొందుతున్న ఈ సినిమాలో నయనతార హీరోయిన్‌గా నటిస్తుండగా, ప్రముఖ నటుడు వెంకటేశ్‌ ప్రత్యేక పాత్రలో కనిపించనున్నారు. ఈ కాంబినేషన్‌ కారణంగా చిత్రంపై మరింత హైప్‌ ఏర్పడింది.