మంచు మనోజ్ పోస్ట్ తో బయటపడ్డ అన్నదమ్ముల గొడవలు, స్పందించిన మోహన్ బాబు
ఈ వార్తాకథనం ఏంటి
మంచు మనోజ్, మంచు విష్ణుల మధ్య మనస్పర్థలు ఉన్నాయనే వార్త గత కొన్ని రోజులుగా చక్కర్లు కొడుతూనే ఉంది. ఇప్పుడా విషయం నిజమేనని మంచు మనోజ్ పోస్ట్ తో తేలిపోయింది. వారిద్దరి మనస్పర్థలు ఎందుకు వచ్చాయన్న సంగతి తెలియదు కానీ, మంచు మనోజ్ పెట్టిన పోస్ట్ ప్రకారం, మనోజ్ కి కావాల్సిన మనిషైన సారథి దగ్గరకు వచ్చిన మంచు విష్ణు,అతనితో గొడవ పడినట్లు వీడియోలో కనిపిస్తుంది. అంతేకాదు, నా ఇష్టం అంటూ మంచు విష్ణు మాటలు వినిపించాయి. ఈ వీడియోను తన ఫేస్ బుక్ స్టోరీగా మనోజ్ పెట్టడంతో ఈ గొడవంతా బయటకు వచ్చేసింది. దీంతో సోషల్ మీడియాలో ఈ విషయమై పెద్ద చర్చ నడుస్తోంది.
మంచు మనోజ్
మనోజ్ పెళ్ళికి అతిథిలా వచ్చిన మంచు విష్ణు
మొన్నటికి మొన్న మనోజ్ పెళ్ళిలో మంచు విష్ణు యాక్టివ్ గా కనిపించలేదనీ, కేవలం పెళ్ళి రోజు మాత్రమే విష్ణు కనిపించారనీ, పెళ్ళి కూడా మంచు లక్ష్మీ నివాసంలో జరిగిందనీ వార్తలు వచ్చాయి. మనోజ్ పెళ్ళికి అతిథిగా మంచు విష్ణు రావడంతో, వీరిద్దరి మధ్య ఏదో జరుగుతుందని, గొడవలు బాగా పెరిగాయన్న మాటలు విరివిగా వినిపించాయి. ప్రస్తుతం ఈ గొడవలు నిజమేనని తేలిపోయింది. అయితే మనోజ్ పోస్ట్ పై మోహన్ బాబు స్పందించారని, అన్నదమ్ముల మధ్య గొడవలు సహజమే అనీ, ఆవేశం తెచ్చుకుంటే ఇద్దరికీ అనర్థమనీ, సర్ది చెప్పే ప్రయత్నం చేస్తున్నానని మోహన్ బాబు తెలిపినట్లు టీవీ 9 రాసుకొచ్చింది. ప్రస్తుతం ఆ వీడియోను మంచు మనోజ్, ఫేస్ బుక్ నుండి డిలీట్ చేసారు.