బాలయ్య భగవంత్ కేసరి సినిమాలో ఊర మాస్ సాంగ్: రచ్చ రచ్చ చేయడానికి అందరూ రెడీ
ఇప్పటివరకు అపజయమన్న మాటెరుగని అనిల్ రావిపూడి దర్శకత్వంలో, వరుసగా రెండు విజయాలు అందుకున్న బాలయ్య భగవంత్ కేసరి అనే సినిమాలో నటిస్తున్న సంగతి తెలిసిందే. ఈ సినిమాపై అభిమానుల్లో అంచనాలు పీక్స్ లో ఉన్నాయి. అంచనాలను మరింత పెంచడానికి క్రేజీ న్యూస్ బయటకు వచ్చింది. భగవంత్ కేసరి సినిమాలో ఊర మాస్ సాంగ్ ని షూట్ చేస్తున్నారట. రామోజీ ఫిలిమ్ సిటీలో వేసిన భారీ సెట్ లో ఈ పాట చిత్రీకరణ సాగుతోందని తెలుస్తోంది. ఈ పాటలో బాలయ్య, కాజల్ అగర్వాల్, శ్రీలీల స్టెప్పులు వేయనున్నారని అంటున్నారు. ఈ పాట మరో లెవెల్లో ఉండబోతుందని, తెర మీద మ్యాజిక్ చేయబోతుందని చెబుతున్నారు.
దసరా కానుకగా విడుదలవుతున్న భగవంత్ కేసరి
ఈ పాటకు ప్రతీ ప్రేక్షకుడు తమ సీట్లలోంచి లేచి డ్యాన్స్ వేస్తాడని అంటున్నారు. ఒక పాటకే ఈ రేంజ్ లో హైప్ ఇస్తున్నారంటే నిజంగా ఆ పాటలో ఆమాత్రం ఉండి ఉంటుందని నెటిజన్లు అనుకుంటున్నారు. భగవంత్ కేసరి సినిమాలో బాలయ్య కూతురుగా శ్రీలీల కనిపిస్తోంది. ఇంతకుముందెన్నడూ చూడని పాత్రలో బాలయ్య కొత్తగా కనిపిస్తారని, తెలంగాణ యాసలో పలికే డైలాగులు అదిరిపోతాయని ఫిలిమ్ నగర్ వర్గాల నుండి సమాచారం అందుతోంది. ఈ సినిమాలో బాలీవుడ్ నటుడు అర్జున్ రాంపాల్ విలన్ గా కనిపిస్తున్నాడు. షైన్ స్క్రీన్స్ బ్యానర్ పై రూపొందుతున్న ఈ సినిమాను, సాహు గారపాటి, హరిష్ పెద్ది నిర్మిస్తున్నారు. దసరా కానుకగా అక్టోబర్ 19న రిలీజ్ అవుతుంది.
