96 movie: '96' సినిమాలో జాను పాత్ర కోసం ఎవరిని అనుకున్నారో తెలుసా? అసలు విషయం చెప్పిన దర్శకుడు!
ఈ వార్తాకథనం ఏంటి
కోలీవుడ్‌ నటుడు విజయ్‌ సేతుపతి (Vijay Sethupathi), నటి త్రిష (Trisha) ప్రధాన పాత్రల్లో నటించిన బ్లాక్‌బస్టర్‌ రొమాంటిక్‌ డ్రామా '96' (96 Movie) మరోసారి థియేటర్లలో సందడి చేస్తోంది. ప్రేమ్‌కుమార్‌ దర్శకత్వం వహించిన ఈ చిత్రం తమిళనాడులో అక్టోబర్‌ 9న రీ-రిలీజ్‌ అయింది. అయితే, ఈ సినిమాలో 'జాను' పాత్ర కోసం తొలుత నటి జ్యోతిక (Jyotika)ను సంప్రదించారంటూ గతంలో వార్తలు ప్రచారంలోకి వచ్చాయి. తాజాగా ఈ వదంతులపై దర్శకుడు ప్రేమ్‌కుమార్‌ స్పందించారు. ఇటీవల ఓ ఇంటర్వ్యూలో మాట్లాడిన ఆయన.. ఆ వార్తల్లో నిజం లేదని స్పష్టం చేశారు.
వివరాలు
జాను పాత్రకు త్రిషే తొలి ఎంపిక
'జాను' పాత్ర కోసం మొదటి నుంచీ తన ఎంపిక త్రిషేనని ప్రేమ్‌కుమార్‌ వెల్లడించారు. అయితే, అప్పట్లో ఆమె వరుస సినిమాలతో బిజీగా ఉండటంతో డేట్స్‌ కుదరలేదని తెలిపారు.
దీంతో మరో హీరోయిన్‌ను ఎంపిక చేసుకోవాలంటూ ఒత్తిడి పెరిగిందన్నారు. చివరకు త్రిష తన షెడ్యూల్‌ను మార్చుకోవడంతో సమస్య పరిష్కారమైందని వివరించారు.
సినిమాల్లోని పాత్రలను ప్రేక్షకులకు కళ్లకు కట్టినట్లు చూపించాలనే ఉద్దేశంతో కొందరు నటీనటులను మనసులో పెట్టుకుని కథలు రాస్తుంటానని ఆయన చెప్పారు.
'96' స్క్రిప్ట్‌ రాసే సమయంలోనే విజయ్‌ సేతుపతి, త్రిషలను ప్రధాన పాత్రల్లో ఊహించుకున్నానని వెల్లడించారు.
అలాగే ఇటీవల తెలుగులో 'సత్యం సుందరం'గా విడుదలైన 'మెయ్యళగన్‌' కథ రాస్తున్నప్పుడు తన మనసులో రజనీకాంత్‌, కమల్‌ హాసన్‌ ఉన్నారని ప్రేమ్‌కుమార్‌ తెలిపారు.
వివరాలు
'96'కు వస్తున్న ఆదరణపై దర్శకుడి ఆనందం
'96' సినిమాకు ప్రేక్షకుల నుంచి ఇప్పటికీ లభిస్తున్న ఆదరణ తనను ఆశ్చర్యపరుస్తోందని దర్శకుడు ఆనందం వ్యక్తం చేశారు.
సినిమా విడుదలై ఎన్నేళ్లు గడిచినా.. ప్రతి వార్షికోత్సవం సందర్భంగా పోస్టర్‌ విడుదల చేస్తే ప్రేక్షకుల నుంచి విశేష స్పందన వస్తోందని తెలిపారు.
2015 డిసెంబరులో చెన్నైలో భారీ వరదలు వచ్చిన సమయంలో '96' కథ రాశానని ప్రేమ్‌కుమార్‌ గుర్తుచేసుకున్నారు. కథలే తనను ఎంచుకుంటాయని తాను బలంగా నమ్ముతానని చెప్పారు.
ఒక్కోసారి కథ ఆలోచన వచ్చినప్పటికీ, దాన్ని సినిమాగా తెరకెక్కించడానికి సమయం పడుతుందని వివరించారు.
2002లో వచ్చిన ఓ ఆలోచన ఆధారంగా ఇటీవలే ఒక స్క్రిప్ట్‌ను పూర్తి చేసినట్లు వెల్లడించారు. త్వరలోనే ఆ సినిమాకు సంబంధించిన షూటింగ్‌ ప్రారంభిస్తానని తెలిపారు.