Tollywood: ఫిల్మ్‌ ఛాంబర్ కీలక నిర్ణయం.. జూనియర్‌ ఆర్టిస్టుల వేతనాల్లో భారీ పెంపు!
ఈ వార్తాకథనం ఏంటి
తెలుగు సినీ పరిశ్రమలోని కార్మికులకు పెద్ద శుభవార్త అందింది. వేతనాల పెంపుపై గత కొంతకాలంగా జరుగుతున్న చర్చలు చివరకు ఫలితమిచ్చాయి. ఫిల్మ్‌ ఛాంబర్ తాజాగా చేసిన కీలక ప్రకటనలో కార్మికుల వేతనాలను 22.5 శాతం పెంచుతున్నట్లు అధికారికంగా వెల్లడించింది. ఈ నిర్ణయం, ఆగస్టు 22న కార్మికశాఖ సమక్షంలో సినిమారంగంలోని 13 కార్మిక సంఘాలతో కుదిరిన ఒప్పందానికి అనుగుణంగా తీసుకున్నారు. ఒప్పందం ప్రకారం ఆగస్టు 22, 2025 వరకు 15% పెంపు అమలులోకి వస్తుంది. మిగిలిన 7.5% పెంపును దశలవారీగా మూడు విడతలుగా అమలు చేయనున్నారు. రోజుకు రూ.2,000 కన్నా తక్కువగా సంపాదించే కార్మికులకు మాత్రమే ఈ పెంపు వర్తిస్తుంది.
Details
ఫుల్‌ కాల్‌షీట్‌కు రూ.1,470
మొదటి ఏడాది 15%, రెండో, మూడో సంవత్సరాల్లో ఒక్కోసారి 5% చొప్పున పెరుగుతాయని ఫిల్మ్‌ ఛాంబర్ కార్యదర్శి దామోదర్‌ ప్రసాద్‌ వెల్లడించారు. జూనియర్‌ ఆర్టిస్టుల వర్గీకరణ ప్రకారం 'ఏ' కేటగిరీకి రూ.1,420, 'బి' కేటగిరీకి రూ.1,175, 'సి' కేటగిరీకి రూ.930 వేతనం ఇవ్వాలని నిర్ణయించారు. ఉదయం అల్పాహారం అందించని పరిస్థితిలో రూ.70, మధ్యాహ్న భోజనం ఇవ్వనప్పుడు రూ.100 అదనంగా చెల్లించాలని నిబంధన అమలు చేస్తారు. ఉదయం 9 నుంచి రాత్రి 9 వరకు ఫుల్‌ కాల్‌షీట్‌కు రూ.1,470, హాఫ్‌ కాల్‌షీట్‌కు రూ.735గా వేతనం నిర్ణయించారు. 4 గంటల పని సమయం దాటితేనే పూర్తి వేతనం చెల్లించాల్సి ఉంటుందని ఛాంబర్ స్పష్టం చేసింది.
Details
13 కార్మిక సంఘాలకు సమానంగా వేతనాలివ్వాలి
వేతనాల అమలులో తలెత్తే సమస్యలను పరిష్కరించేందుకు తెలంగాణ ప్రభుత్వం త్వరలోనే ప్రత్యేక కమిటీని ఏర్పాటు చేయనుంది. అప్పటివరకు నిర్మాతలు ఆగస్టు 21న కార్మికశాఖ సిద్ధం చేసిన మినిట్స్‌లో పేర్కొన్న మార్గదర్శకాలను పాటించాలని సూచించారు. అలాగే పనివేళలు, అలవెన్సులు వంటి ఇతర షరతులు 2022లో కుదిరిన ఒప్పందం ప్రకారం కొనసాగుతాయని స్పష్టం చేశారు. అయితే నిర్మాతల ఈ నిర్ణయాన్ని ఫెడరేషన్‌ నేతలు తిరస్కరించారు. 13 కార్మిక సంఘాలకు సమానంగా వేతనాలు పెంచాలని వారు డిమాండ్‌ చేస్తున్నారు. చిన్న సినిమాలకు పాత వేతనాలు కొనసాగించడం అన్యాయం అని పేర్కొన్నారు. నిర్మాతలు విధించిన షరతులు అంగీకారయోగ్యం కావని, యూనియన్ల ఐక్యతను దెబ్బతీసేలా ఈ చర్యలు ఉన్నాయంటూ ఫెడరేషన్‌ ఆరోపించింది.