Michelle Trachtenberg: అనుమానాస్పద స్థితిలో హాలీవుడ్ నటి మిచెల్ ట్రాచ్టెన్‌బర్గ్ మృతి
ఈ వార్తాకథనం ఏంటి
హాలీవుడ్ నటి మిచెల్ ట్రాచ్టెన్‌బర్గ్ (39) అనుమానాస్పద స్థితిలో మృతి చెందారు.
న్యూయార్క్‌లోని మాన్‌హట్టన్ అపార్ట్‌మెంట్‌లో అపస్మారకంగా పడి ఉన్న ఆమెను గుర్తించినట్టు న్యూయార్క్ టైమ్స్ పేర్కొంది. మిచెల్ బాలనటిగా తన ప్రయాణాన్ని మూడేళ్ల వయసులోనే ప్రారంభించారు.
'బఫీ ది వాంపైర్ స్లేయర్', 'గాసిప్ గర్ల్' వంటి ప్రసిద్ధ టీవీ సిరీస్‌లలో నటించి మంచి గుర్తింపు తెచ్చుకున్నారు. ఆమెను అభిమానులు ముద్దుగా 'బఫీ' అని పిలుచుకునే వారు.
బుధవారం ఉదయం మిచెల్ మృతిచెందినట్లు యూఎస్ మీడియా నివేదించింది.
Details
ఇటీవల కాలేయ మార్పడి చేయించుకున్న మిచెల్
పోలీసులు సంఘటనాస్థలికి చేరుకొని ఆమెను ఆస్పత్రికి తరలించగా, అప్పటికే ఆమె మృతిచెందినట్లు వైద్యులు ధృవీకరించారు.
అయితే మృతికి గల కారణాలను ఇప్పటి వరకు వెల్లడించలేదు. ఇటీవల మిచెల్ కాలేయ మార్పిడి శస్త్రచికిత్స చేయించుకున్నట్టు సమాచారం.
అభిమానులు సోషల్ మీడియాలో ఆమె ఆరోగ్యంపై ప్రశ్నించినా తాను ఆరోగ్యంగా ఉన్నట్లు మిచెల్ వెల్లడించారు. కానీ కాలేయ మార్పిడి విఫలమై ఉండొచ్చని పోలీసులు అనుమానిస్తున్నారు.
ఈ ఘటన వెనుక ఎలాంటి కుట్ర లేదని ప్రాథమిక దర్యాప్తులో వెల్లడయింది.
Details
1996లో బాలనటిగా గుర్తింపు
మిచెల్ 1996లో వచ్చిన 'హ్యారియెట్ ది స్పై' చిత్రంతో గుర్తింపు పొందారు.
'బఫీ ది వాంపైర్ స్లేయర్' సిరీస్ ఆమె కెరీర్‌కు కీలక మలుపుగా మారింది. 2000 నుండి 2003 వరకు ఈ షోలో డాన్ పాత్రను పోషించి ప్రేక్షకుల అభిమానాన్ని చూరగొన్నారు.
అనంతరం 2008 నుండి 2012 వరకు ప్రసారమైన 'గాసిప్ గర్ల్' సిరీస్‌లో సోషలైట్ విలన్ జార్జినా స్పార్క్స్ పాత్రను పోషించి మరింత గుర్తింపు పొందారు.
బ్లేక్ లైవ్లీ, పెన్ బాడ్గ్లే, లైటన్ మీస్టర్ వంటి నటులతో కలిసి ఆమె ఈ ప్రాజెక్టులో పనిచేశారు. యూరోట్రిప్, 17 ఎగైన్, ది స్క్రిబ్లర్ వంటి సినిమాల్లోనూ ఆమె తన ప్రతిభను చాటుకున్నారు.