బాలయ్య 108వ సినిమా టైటిల్ లీక్: ఇంట్రెస్టింగ్ టైటిల్ ని ఫిక్స్ చేసిన అనిల్ రావిపూడి
వీరసింహారెడ్డి తర్వాత అనిల్ రావిపూడి దర్శకత్వంలో సినిమా చేస్తున్నాడు బాలకృష్ణ. తన కెరీర్లో 108వ సినిమాగా రూపుదిద్దుకుంటున్న ఈ చిత్రం గురించి ఇంటర్నెట్ లో అనేక వార్తలు వస్తున్నాయి. తాజాగా ఈ చిత్ర టైటిల్ లీక్ అయినట్లు తెలుస్తోంది. బాలయ్య 108వ సినిమాకు భగవత్ కేసరి అనే టైటిల్ ను అనిల్ రావిపూడి ఫిక్స్ చేసారని చెప్పుకుంటున్నారు. ప్రస్తుతానికి ఈ విషయమై ఎలాంటి అధికారిక సమాచారం రాలేదు. మరి ప్రచారంలో ఉన్న భగవత్ కేసరి టైటిల్ నే ఫిక్స్ చేస్తారా? లేదా మరో టైటిల్ తో వస్తారా అన్నది చూడాలి. ఈ సినిమాలో కాజల్ అగర్వాల్ హీరోయిన్ గా కనిపిస్తోంది. బాలకృష్ణ కూతురుగా హీరోయిన్ శ్రీలీల నటిస్తోంది.
భారీ బడ్జెట్ తో తెరకెక్కుతున్న చిత్రం
అనిల్ రావిపూడి సినిమాల తరహాలోనే ఈ సినిమాలోనూ వినోదం ఉంటుందని సమాచారం. అలాగే యాక్షన్ అంశాలు సరికొత్తగా ఉంటాయని చెబుతున్నారు. ఈ సినిమా నుండి రిలీజైన బాలయ్య ఫస్ట్ లుక్, అభిమానులను ఆకట్టుకుంది. ఇదివరకెన్నడూ చూడని అవతారంలో కొత్తగా కనిపించారు బాలయ్య. అత్యంత భారీ బడ్జెట్ తో ఈ సినిమా రూపొందుతుందని తెలుస్తోంది. షైన్ స్క్రీన్స్ బ్యానర్ పై సాహు గారపాటి, హరిష్ పెద్ది నిర్మిస్తున్నారు. థమన్ సంగీతం అందిస్తున్నాడు. ఈ సినిమా తర్వాత కన్నడ నటుడు శివరాజ్ కుమార్ తో కలిసి పాన్ ఇండియా రేంజ్ లో సినిమా చేయడానికి బాలయ్య ఆసక్తి చూపిస్తున్నారని వినిపిస్తోంది. రెండు భాగాలుగా రూపొందే ఈ సినిమాలో సూపర్ స్టార్ రజనీకాంత్ నటిస్తారని అంటున్నారు.
