Thalapathy Vijay: జననాయగన్ విడుదలకు గ్రీన్ సిగ్నల్.. థియేటర్లలోకి ఎప్పుడు రానుందంటే?
ఈ వార్తాకథనం ఏంటి
తమిళ స్టార్ హీరో దళపతి విజయ్ రాజకీయాల్లోకి అడుగుపెట్టి తమిళనాడు ముఖ్యమంత్రిగా బాధ్యతలు నిర్వర్తిస్తున్న నేపథ్యంలో, ఆయన సినీ కెరీర్లో 69వ చిత్రం, అలాగే చివరి సినిమాగా రూపొందిన 'జననాయగన్' విడుదల కోసం అభిమానులు ఎంతో ఆసక్తిగా ఎదురుచూస్తున్నారు. తొలుత ఈ ఏడాది సంక్రాంతి సందర్భంగా ప్రేక్షకుల ముందుకు రావాల్సిన ఈ సినిమా, సెన్సార్కు సంబంధించిన సమస్యల కారణంగా పలుమార్లు వాయిదా పడింది. అయితే తాజాగా అందుతున్న సమాచారం ప్రకారం, అన్ని అడ్డంకులు తొలగిపోవడంతో ఈ నెలలోనే ఈ చిత్రం థియేటర్లలో విడుదలయ్యే అవకాశాలు కనిపిస్తున్నాయి.
వివరాలు
హై-వోల్టేజ్ పొలిటికల్ యాక్షన్ థ్రిల్లర్..
దర్శకుడు హెచ్. వినోద్ రూపొందించిన ఈ హై-వోల్టేజ్ పొలిటికల్ యాక్షన్ థ్రిల్లర్పై ప్రారంభం నుంచే భారీ అంచనాలు నెలకొన్నాయి. గత ఏడాది డిసెంబర్లోనే చిత్రబృందం సినిమాను సెన్సార్ బోర్డుకు సమర్పించినప్పటికీ, కొన్ని రాజకీయ అంశాలకు సంబంధించిన అభ్యంతరాలు, అలాగే సాంకేతిక కారణాల వల్ల సర్టిఫికేషన్ ప్రక్రియ నిలిచిపోయింది. దాదాపు ఏడు నెలల నిరీక్షణ అనంతరం ఆ సమస్యలన్నీ పరిష్కారమయ్యాయని, త్వరలోనే చిత్రానికి సెన్సార్ క్లియరెన్స్ సర్టిఫికేట్ జారీ కానుందని కోలీవుడ్ సినీ వర్గాలు చెబుతున్నాయి.
వివరాలు
థియేటర్లలో మరోసారి భారీ పండగ వాతావరణం..
సెన్సార్ సమస్యలు తొలగిపోవడంతో సినిమా విడుదలకు మార్గం సుగమమైంది. దీంతో విజయ్ అభిమానులు భారీ స్థాయిలో సంబరాలు చేసుకునేందుకు సిద్ధమవుతున్నారు. ముఖ్యంగా వెండితెరపై హీరోగా కనిపించిన విజయ్, నిజ జీవితంలో తమిళనాడు ముఖ్యమంత్రిగా ఎదిగిన రాజకీయ ప్రయాణాన్ని ప్రతిబింబించే అంశాలు ఈ చిత్రంలో ప్రధాన ఆకర్షణగా నిలుస్తాయని ప్రచారం సాగుతోంది. ఇప్పటికే సినిమా పూర్తి స్థాయిలో లీక్ అయినప్పటికీ, దళపతి విజయ్ను వెండితెరపై చివరిసారిగా చూసే అవకాశంగా భావిస్తున్న అభిమానుల్లో ఏమాత్రం ఉత్సాహం తగ్గలేదు. థియేటర్లలో మరోసారి భారీ పండగ వాతావరణాన్ని సృష్టించేందుకు వారు ఆసక్తిగా ఎదురుచూస్తున్నారు. ప్రముఖ సంగీత దర్శకుడు అనిరుధ్ రవిచందర్ సంగీతం అందించిన ఈ చిత్రాన్ని కేవీఎన్ ప్రొడక్షన్స్ నిర్మించింది.