Loading...
Kaka Movie: కాకా సీక్రెట్‌ను మళ్లీ లీక్‌ చేసిన మెగాస్టార్
కాకా సీక్రెట్‌ను మళ్లీ లీక్‌ చేసిన మెగాస్టార్

Kaka Movie: కాకా సీక్రెట్‌ను మళ్లీ లీక్‌ చేసిన మెగాస్టార్

వ్రాసిన వారు Balachander Sharma
Nov 18, 2026
10:06 am

ఈ వార్తాకథనం ఏంటి

మెగాస్టార్ చిరంజీవి మరోసారి తన 'చిరు లీక్స్‌'తో అభిమానులకు ఆసక్తికరమైన ట్రీట్ ఇచ్చారు. మంగళవారం జరిగిన 'ఇట్లు అర్జున' సక్సెస్ మీట్‌లో పాల్గొన్న ఆయన.. తన తదుపరి చిత్రం 'కాకా'లో అనస్వర రాజన్ పోషిస్తున్న పాత్రపై చిన్న హింట్ ఇచ్చారు. అనస్వరను ఉద్దేశించి ''తను మాట్లాడదు.. మాట్లాడలేదు. నేను చెప్పింది ఇంటికెళ్లి ఆలోచించుకోండి'' అంటూ చిరు నవ్వేశారు. ఈ ఒక్క మాటతోనే సోషల్ మీడియాలో అభిమానుల డీకోడింగ్ మొదలైంది. అసలు అనస్వర పాత్ర ఏంటి అనే ప్రశ్నకు ఈ వ్యాఖ్యతో సమాధానం దొరికినట్లేనని నెటిజన్లు భావిస్తున్నారు.

Details

అనస్వర పాత్రపై హింట్‌ ఇదేనా?

బాబీ కొల్లి దర్శకత్వంలో తెరకెక్కుతున్న 'కాకా'లో అనస్వర రాజన్ కీలక పాత్రలో నటిస్తున్నారు.

ఇప్పటికే ఆమె ఇందులో 'అమ్ములు' అనే పాత్రలో చిరంజీవి కూతురిగా కనిపించనున్నట్లు ప్రచార చిత్రాల ద్వారా తెలుస్తోంది.

అయితే పాత్ర స్వభావం మాత్రం ఇప్పటివరకు సస్పెన్స్‌గా ఉంది. తాజాగా చిరు చేసిన వ్యాఖ్యలతో అనస్వర సినిమాలో మాటలు రాని అమ్మాయి పాత్రలో కనిపించబోతున్నారనే చర్చ మొదలైంది.

అయితే చిత్రబృందం దీనిపై అధికారికంగా ఎలాంటి ప్రకటన చేయలేదు. దీంతో మెగాస్టార్ ఇచ్చిన ఈ చిన్న క్లూ ఇప్పుడు సినిమాపై ఆసక్తిని మరింత పెంచుతోంది.

Details

'చిరు లీక్స్‌'కు మరో ఉదాహరణ

సినిమా వేడుకల్లో చిరంజీవి సరదాగా మాట్లాడుతూనే తన సినిమాలకు సంబంధించిన విషయాలను అనుకోకుండా బయటపెట్టడం అభిమానులకు కొత్తేమీ కాదు. అందుకే 'చిరు లీక్స్‌' అనే మాట కూడా ఫ్యాన్స్‌లో ప్రత్యేకంగా పాపులర్ అయింది.

ఈసారి కూడా యాంకర్ ప్రశ్నలు అడగొద్దంటూ సరదాగా చెప్పిన చిరు.. ఆ వెంటనే అనస్వర పాత్ర గురించి మాట్లాడారు. తాను చెప్పిన మాటను ఇంటికి వెళ్లి ఆలోచించుకోవాలని చెప్పడంతో అభిమానులు ఒక్కొక్క క్లూను జోడిస్తూ అసలు కథను ఊహించుకుంటున్నారు.

ADVERTISEMENT

Details

సంక్రాంతికి 'కాకా' సందడి

'వాల్తేరు వీరయ్య' తర్వాత చిరంజీవి, బాబీ కొల్లి కలయికలో వస్తున్న సినిమా కావడంతో 'కాకా'పై ఇప్పటికే భారీ అంచనాలు ఉన్నాయి.

కేవీఎన్ ప్రొడక్షన్స్ నిర్మిస్తున్న ఈ చిత్రంలో యాక్షన్‌తో పాటు తండ్రీకూతుళ్ల అనుబంధం, భావోద్వేగాలకు కూడా ప్రాధాన్యం ఉన్నట్లు తెలుస్తోంది.

అనస్వర నిజంగానే మాటలు రాని పాత్రలో నటిస్తే.. ఆమె హావభావాలే కథలో కీలకంగా మారే అవకాశం ఉంది. 2027 సంక్రాంతి కానుకగా జనవరి 13న ఈ చిత్రాన్ని ప్రపంచవ్యాప్తంగా విడుదల చేసేందుకు మేకర్స్ సిద్ధమవుతున్నారు.

చిరు లీక్ చేసిన ఈ రహస్యం థియేటర్లలో ఎలా బయటపడుతుందో చూడాలి.

ADVERTISEMENT