Loading...
IND vs NZ: తొలి టెస్టుకు టీమిండియా అంచనా జట్టు ఇదే.. ఏడుగురు బ్యాటర్లు, నలుగురు పేసర్లు!
తొలి టెస్టుకు టీమిండియా అంచనా జట్టు ఇదే.. ఏడుగురు బ్యాటర్లు, నలుగురు పేసర్లు!

IND vs NZ: తొలి టెస్టుకు టీమిండియా అంచనా జట్టు ఇదే.. ఏడుగురు బ్యాటర్లు, నలుగురు పేసర్లు!

వ్రాసిన వారు Jayachandra Akuri
Nov 17, 2026
11:49 am

ఈ వార్తాకథనం ఏంటి

టీమిండియా, న్యూజిలాండ్ జట్ల మధ్య రెండు మ్యాచ్‌ల కీలక టెస్టు సిరీస్ గురువారం (నవంబర్ 19) వెల్లింగ్టన్‌లోని బేసిన్ రిజర్వ్ వేదికగా ప్రారంభం కానుంది. ఈ నేపథ్యంలో తొలి టెస్టులో టీమిండియా తుది జట్టు కూర్పుపై ఆసక్తి నెలకొంది. 2020 మార్చి తర్వాత న్యూజిలాండ్ గడ్డపై భారత్ ఆడనున్న తొలి టెస్టు మ్యాచ్ ఇదే కావడం విశేషం. మంగళవారం వెల్లింగ్టన్‌లో మీడియాతో మాట్లాడిన భారత టెస్టు కెప్టెన్ శుభ్‌మన్ గిల్.. తొలి మ్యాచ్‌లో జట్టు కూర్పుపై స్పష్టతనిచ్చాడు. ఏడుగురు బ్యాటర్లు, నలుగురు ఫాస్ట్ బౌలర్ల కాంబినేషన్‌తో భారత్ బరిలోకి దిగనున్నట్లు ధృవీకరించాడు. అయితే ఆ నలుగురు పేసర్లు ఎవరనే విషయాన్ని మాత్రం వెల్లడించలేదు.

వివరాలు

పేస్ విభాగంలో తీవ్ర పోటీ

ఈ రెండు టెస్టుల సిరీస్‌లో తప్పక గెలవాలనే లక్ష్యంతో బరిలోకి దిగుతున్న భారత్.. 16 మంది సభ్యుల జట్టులో ఆరుగురు స్పెషలిస్ట్ ఫాస్ట్ బౌలర్లకు చోటు కల్పించింది.

స్టార్ పేసర్ జస్‌ప్రీత్ బుమ్రా తుది జట్టులో ఆడటం ఖాయంగా కనిపిస్తోంది. మిగిలిన మూడు స్థానాల కోసం తీవ్ర పోటీ నెలకొంది.

బుమ్రా తర్వాత జట్టులో అత్యంత అనుభవజ్ఞుడైన మహ్మద్ సిరాజ్‌తో పాటు ప్రసిద్ కృష్ణ, ఆకాశ్ దీప్, అన్షుల్ కాంబోజ్, గుర్నూర్ బ్రార్ రేసులో ఉన్నారు. అన్షుల్ కాంబోజ్ ఇప్పటివరకు భారత్ తరఫున ఒకే టెస్టు ఆడగా, గుర్నూర్ బ్రార్ ఇంకా అరంగేట్రం చేయాల్సి ఉంది.

అయితే ఆదివారం ముగిసిన వన్డే సిరీస్‌లో వీరిద్దరూ బంతితో ఆకట్టుకున్నారు.

వివరాలు

బుమ్రా నేతృత్వంలో పేస్ దళం

దీంతో తొలి టెస్టులో వీరిలో ఒకరికి చోటు దక్కే అవకాశాలున్నాయి. ఇద్దరికీ అవకాశం ఇచ్చినా ఆశ్చర్యపోనక్కర్లేదు.

చివరిసారిగా 2025 నవంబర్‌లో గువాహటిలో దక్షిణాఫ్రికాతో టెస్టు ఆడిన బుమ్రా.. ఈ మ్యాచ్‌లో భారత పేస్ దళాన్ని నడిపించనున్నాడు.

అతడికి తోడుగా సిరాజ్, ఆకాశ్ దీప్, గుర్నూర్ బ్రార్ బరిలోకి దిగే సూచనలు కనిపిస్తున్నాయి. జట్టులో ఆంధ్రా పేస్ ఆల్‌రౌండర్ నితీశ్ కుమార్ రెడ్డి ఉన్నప్పటికీ.. బ్యాటింగ్ చేయగల సామర్థ్యంతో పాటు మెరుగైన పేసర్‌గా ఉన్న ఆకాశ్ దీప్‌కే ప్రాధాన్యం దక్కవచ్చని అంచనా.

ప్రసిద్ కృష్ణ, అన్షుల్ కాంబోజ్ రూపంలోనూ మంచి ప్రత్యామ్నాయాలు ఉన్నాయి. అయితే ప్రస్తుత ఫామ్‌ను పరిగణనలోకి తీసుకుంటే పంజాబ్ యువ పేసర్ గుర్నూర్ బ్రార్‌కు అవకాశం దక్కే అవకాశాలు ఎక్కువగా కనిపిస్తున్నాయి.

ADVERTISEMENT

వివరాలు

బ్యాటింగ్ ఆర్డర్‌లో పడిక్కల్‌కు ప్రాధాన్యం

ఇటీవల ముగిసిన ఐదు మ్యాచ్‌ల వన్డే సిరీస్‌లో భారత్ తరఫున అత్యధిక వికెట్లు పడగొట్టిన బ్రార్.. 'ప్లేయర్ ఆఫ్ ది సిరీస్' అవార్డును కూడా అందుకున్నాడు.

బ్యాటింగ్ విభాగంలో మూడో స్థానం కోసం బీ సాయి సుదర్శన్, దేవ్‌దత్ పడిక్కల్ మధ్య పోటీ నెలకొంది. అయితే సుదర్శన్ కంటే పడిక్కల్‌కే తుది జట్టులో చోటు దక్కడం దాదాపు ఖాయంగా కనిపిస్తోంది.

గతంలో శ్రీలంకతో జరిగిన టెస్టు సిరీస్‌లో మూడో స్థానంలో బ్యాటింగ్ చేసిన సుదర్శన్ రెండు సెంచరీలు సాధించాడు.

ఇటీవల లింకన్‌లో న్యూజిలాండ్‌-ఏతో జరిగిన తొలి అనధికారిక టెస్టు రెండో ఇన్నింగ్స్‌లోనూ 199 పరుగులతో ఆకట్టుకున్నాడు.

అయినప్పటికీ జట్టు యాజమాన్యం పడిక్కల్ వైపే మొగ్గు చూపుతున్నట్లు తెలుస్తోంది.

ADVERTISEMENT

వివరాలు

ఏడో స్థానం కోసం జురెల్, సుందర్ మధ్య పోటీ

రిషబ్ పంత్ జట్టుతో చేరడంతో అతడు స్పెషలిస్ట్ వికెట్‌కీపర్‌-బ్యాటర్‌గా ఐదో స్థానంలో బరిలోకి దిగనున్నాడు.

మాజీ ప్రపంచ నంబర్‌ వన్‌ టెస్టు ఆల్‌రౌండర్ రవీంద్ర జడేజా కూడా తుది జట్టులో ఉండటం ఖాయంగా కనిపిస్తోంది.

అయితే ఏడో స్థానం కోసం ధ్రువ్ జురెల్, వాషింగ్టన్ సుందర్ మధ్య గట్టి పోటీ నెలకొంది.

ఇటీవల న్యూజిలాండ్‌-ఏతో జరిగిన మూడు అనధికారిక టెస్టుల్లో భారత్‌-ఏ జట్టుకు సారథ్యం వహించిన జురెల్.. చివరి రెండు మ్యాచ్‌ల్లో ఒక సెంచరీ, ఒక అర్ధసెంచరీతో తన సత్తా చాటాడు.

మరోవైపు సుందర్ బ్యాటింగ్‌తో పాటు బౌలింగ్‌లోనూ రాణించగలడు. ఈ బహుముఖ నైపుణ్యం అతడికి కలిసొచ్చే అంశం.

వివరాలు

తొలి టెస్టుకు టీమిండియా అంచనా తుది జట్టు

ఒకవేళ వీరిద్దరిలో ఎవరికీ అవకాశం ఇవ్వకపోతే.. ఏడో స్థానంలో నితీశ్ కుమార్ రెడ్డిని ఆడించే ప్రత్యామ్నాయాన్ని కూడా జట్టు యాజమాన్యం పరిశీలించే అవకాశం ఉంది.

యశస్వి జైస్వాల్, కేఎల్ రాహుల్, దేవ్‌దత్ పడిక్కల్, శుభ్‌మన్ గిల్ (కెప్టెన్), రిషబ్ పంత్ (వికెట్ కీపర్), రవీంద్ర జడేజా, ధ్రువ్ జురెల్, ఆకాశ్ దీప్, గుర్నూర్ బ్రార్, మహ్మద్ సిరాజ్, జస్‌ప్రీత్ బుమ్రా.

ADVERTISEMENT