Konaseema ONGC Gas Leak:కోనసీమలో భారీగా ఓఎన్జీసీ గ్యాస్ లీకేజీ.. ప్రజలను తరలించాలని సీఎం చంద్రబాబు ఆదేశం
ఈ వార్తాకథనం ఏంటి
బీఆర్ అంబేడ్కర్ కోనసీమ జిల్లాలో ఓఎన్జీసీ గ్యాస్ లీకేజీ ఘటన కలకలం రేపింది. రాజోలు నియోజకవర్గం మామిడికుదురు మండలంలోని గెద్దాడ, నగరం గ్రామాల సమీపంలో ఉన్న తాడివారిమెరక వద్ద గ్యాస్ బావి నుంచి భారీగా గ్యాస్ వెలువడుతోంది. ఈ ఘటనపై సమాచారం అందుకున్న వెంటనే పోలీసులు, అగ్నిమాపక సిబ్బంది ఘటనా స్థలానికి చేరుకున్నారు. సహాయక చర్యలు చేపట్టడంతో పాటు పరిసర ప్రాంతాల ప్రజలను అప్రమత్తం చేశారు. గ్యాస్ లీకేజీ ప్రభావిత ప్రాంతాల్లో నివసిస్తున్న వారిని వెంటనే సురక్షిత ప్రాంతాలకు తరలించాలని ముఖ్యమంత్రి చంద్రబాబు అధికారులను ఆదేశించారు.
వివరాలు
సురక్షిత ప్రాంతాలకు ప్రభావిత ప్రాంతాల్లోని ప్రజలు
గ్యాస్ లీకేజీ నేపథ్యంలో పరిసర గ్రామాల ప్రజలు ఎలాంటి ప్రమాదానికి గురికాకుండా అధికారులు ముందస్తు జాగ్రత్తలు తీసుకుంటున్నారు.
ప్రభావిత ప్రాంతాల్లోని ప్రజలను సురక్షిత ప్రాంతాలకు తరలిస్తున్నారు.
గ్యాస్ వ్యాపించే అవకాశం ఉన్న ప్రాంతాల్లో విద్యుత్ దీపాలు, లైట్లు, అగ్నికి సంబంధించిన పరికరాలను ఉపయోగించవద్దని అధికారులు హెచ్చరించారు.
మరోవైపు గ్యాస్ లీకేజీని అరికట్టేందుకు ఓఎన్జీసీ అధికారులు యుద్ధప్రాతిపదికన చర్యలు చేపట్టారు.
వివరాలు
అధికారులతో మాట్లాడి పరిస్థితిని తెలుసుకున్న సీఎం చంద్రబాబు
కోనసీమ జిల్లాలో గ్యాస్ లీకేజీ ఘటనపై ముఖ్యమంత్రి చంద్రబాబు స్పందించారు.
అధికారులతో మాట్లాడి ఘటనకు సంబంధించిన వివరాలను అడిగి తెలుసుకున్నారు.
మామిడికుదురు మండలం నగరం గ్రామ పరిధిలోని తాడివారిమెరక వద్ద ఉన్న ఓఎన్జీసీ గ్యాస్ డ్రిల్లింగ్ బావి నుంచి లీకేజీ జరుగుతున్నట్లు అధికారులు సీఎంకు వివరించారు.
మంగళవారం తెల్లవారుజామున 4.30 గంటల సమయంలో పెద్ద శబ్దం రావడంతో ఒక్కసారిగా గ్యాస్ వెలువడినట్లు తెలిపారు.
మరో నాలుగు నుంచి ఐదు గంటల్లో లీకేజీని పూర్తిగా అదుపులోకి తీసుకురాగలమని ఓఎన్జీసీ అధికారులు వెల్లడించారు.
వివరాలు
అధికారులతో మాట్లాడి పరిస్థితిని తెలుసుకున్న సీఎం చంద్రబాబు
గ్యాస్ లీకేజీ ప్రభావిత ప్రాంతాల్లోని ప్రజలను తక్షణమే సురక్షిత ప్రాంతాలకు తరలించాలని చంద్రబాబు ఆదేశించారు.
ప్రజల భద్రతకు అత్యంత ప్రాధాన్యం ఇవ్వాలని స్పష్టం చేశారు.
గ్యాస్ లీకేజీని నియంత్రించేందుకు ఓఎన్జీసీ ప్రత్యేక సాంకేతిక నిపుణుల బృందాలతో వెంటనే చర్యలు చేపట్టాలని సూచించారు.
రాష్ట్రంలో ఇటీవల ఇలాంటి ఘటనలు తరచూ చోటుచేసుకుంటున్న నేపథ్యంలో ఓఎన్జీసీ అధికారులను తక్షణమే సంప్రదించాలని సంబంధిత అధికారులకు తెలిపారు.
సంస్థ ఛైర్మన్తో పాటు ఉన్నతాధికారులతో మాట్లాడి భద్రతా చర్యలపై సమీక్షించాలని ఆదేశించారు.
వివరాలు
కిలోమీటరు పరిధిలోని నివాస ప్రాంతాలు ఖాళీ
గ్యాస్ బావి చుట్టూ కిలోమీటరు పరిధిలో ఉన్న నివాస ప్రాంతాల్లోని ప్రజలను అధికారులు ఇప్పటికే ఖాళీ చేయించారు.
ఇప్పటివరకు ఎలాంటి మంటలు చెలరేగలేదని, గ్యాస్ బావి ముఖద్వారం పటిష్టంగానే ఉందని ఓఎన్జీసీ అధికారులు తెలిపారు.
గ్యాస్ భూమికి సమీపంలో వ్యాపించకుండా అవసరమైన చర్యలు తీసుకుంటున్నారు.
ప్రమాద తీవ్రత పెరగకుండా ముందుజాగ్రత్తగా డీజిల్ జనరేటర్లు, ఇతర పరికరాలను నిలిపివేశారు. వాటిని సమీప ప్రాంతాల నుంచి కూడా తరలిస్తున్నారు.
మరోవైపు బావి నుంచి గ్యాస్ లీకేజీని పూర్తిగా అరికట్టేందుకు సిమెంటింగ్ బృందం ఘటనా స్థలానికి చేరుకుంది.
సాంకేతిక నిపుణులు లీకేజీని నియంత్రించేందుకు అవసరమైన చర్యలు చేపడుతున్నారు.
పరిస్థితిని ఎప్పటికప్పుడు పర్యవేక్షిస్తూ ప్రజలకు ఎలాంటి ప్రమాదం జరగకుండా అధికారులు అప్రమత్తంగా వ్యవహరిస్తున్నారు.