కార్తీ ఖైదీ సినిమా అభిమానులకు గుడ్ న్యూస్: సీక్వెల్ పై క్లారిటీ ఇచ్చిన లోకేష్ కనగరాజ్
ఈ వార్తాకథనం ఏంటి
కార్తీ హీరోగా తెరకెక్కిన ఖైదీ చిత్రం తెలుగులో మంచి విజయాన్ని అందుకుంది. 2019లో రిలీజ్ అయిన ఈ చిత్రం బాక్సాఫీస్ వద్ద మంచి వసూళ్లను నమోదు చేసింది.
ఈ సినిమాతో దర్శకుడు లోకేష్ కనగరాజ్ పేరు మారుమోగిపోయింది. హీరోయిన్ లేకుండా కేవలం ఒకే ఒక్క రాత్రి జరిగే కథతో రూపొందిన ఖైదీ చిత్రం ప్రేక్షకులను విపరీతంగా ఆకట్టుకుంది.
అయితే ఈ సినిమాకు సీక్వెల్ ఉంటుందని ఎప్పటినుండో వార్తలు వస్తున్నాయి. ఖైదీ సినిమాను అభిమానించిన వారంతా ఈ సీక్వెల్ కోసం ఎంతగానో ఎదురు చూస్తున్నారు.
తాజాగా ఖైదీ సీక్వెల్ పై లోకేష్ కనగరాజ్ క్లారిటీ ఇచ్చారు.
Details
రజనీకాంత్ సినిమా తర్వాత తెరపైకి రానున్న ఖైదీ సీక్వెల్
ఖైదీ సినిమా సీక్వెల్ ఎప్పుడు మొదలవుతుందనేది లోకేష్ కనగరాజ్ చెప్పుకొచ్చారు.
ప్రస్తుతం దళపతి విజయ్ హీరోగా నటించిన లియో సినిమా ప్రమోషన్లలో బిజీగా ఉన్న లోకేష్ కనగరాజ్, ఖైదీ సినిమా సీక్వెల్ పై పెదవి విప్పారు.
లియో తర్వాత రజనీకాంత్ హీరోగా తాను తెరకెక్కించే సినిమా పూర్తయిన తర్వాత ఖైదీ సినిమా సీక్వెల్ ఉండబోతుందని, ఆ సినిమా కోసం తాను కూడా ఎంతగానో ఎదురు చూస్తున్నానని లోకేష్ కనగరాజ్ వెల్లడి చేశారు.
అదలా ఉంచితే, దళపతి విజయ్ హీరోగా నటించిన లియో సినిమా దసరా కానుకగా అక్టోబర్ 19వ తేదీన ప్రేక్షకుల ముందుకు వస్తుంది.