R Madhavan: ఆన్‌స్క్రీన్ కెమిస్ట్రీపై మాధవన్ వివాదాస్పద వ్యాఖ్యలు
ఈ వార్తాకథనం ఏంటి
ఆర్. మాధవన్, ఫాతిమా సనా షేఖ్ ప్రధాన పాత్రల్లో నటించిన ప్రేమకథా చిత్రం 'ఆప్ జైసా కోయి' విడుదలకు సిద్ధమైంది. ఈ చిత్రాన్ని వివేక్ సోని దర్శకత్వం వహించగా, బాలీవుడ్ ప్రముఖ నిర్మాత కరణ్ జోహర్ నిర్మించారు. జులై 11 నుంచి నెట్‌ఫ్లిక్స్ వేదికగా ప్రేక్షకుల ముందుకు రానున్న ఈ సినిమా, 30 ఏళ్ల మహిళ ఓ 40 ఏళ్ల వ్యక్తితో ప్రేమలో పడే కథ చుట్టూ తిరుగుతుంది. ప్రచార కార్యక్రమాల్లో భాగంగా మాధవన్ ఇచ్చిన ఇంటర్వ్యూలో చేసిన వ్యాఖ్యలు ఇప్పుడు చర్చనీయాంశంగా మారాయి. ఈ సందర్భంగా మాధవన్ మాట్లాడుతూ సహనటీనటుల మధ్య నిజమైన అనుబంధం ఉండాలి. అప్పుడే కెమిస్ట్రీ నెరవేరుతుంది.
Details
వయస్సు ముఖ్యం కాదు కథే ముఖ్యం
అది లేకపోతే ఏ రొమాంటిక్ సన్నివేశమూ సహజంగా ఉండదని తెలిపారు. అయితే, తన మాటలు కొన్ని వర్గాలకు నచ్చకపోవచ్చు అనే సందేహం కూడా వ్యక్తం చేశారు. వివాహితులు రొమాంటిక్ సన్నివేశాల్లో చక్కగా నటించలేరు. ఎందుకంటే మానసికంగా వారు పూర్తిగా ఓ వ్యక్తికి పరిమితమై ఉంటారు. అలాంటి పరిస్థితుల్లో మిగిలిన నటీనటులతో కెమిస్ట్రీ పండించడం కష్టమేనని చెప్పారు. అలాగే హీరో-హీరోయిన్ల మధ్య వయసు వ్యత్యాసం గురించి కూడా స్పందించిన మాధవన్ నటీనటుల వయసు అంత ముఖ్యమేమీ కాదు. కథే ముఖ్యం. సమాజంలో వయసు వ్యత్యాసంతో ఉన్న జంటలు ఎన్నో కనిపిస్తున్నాయి. అందువల్ల కథ పరంగా అవసరమైతే వయసు తేడా ఉన్న నటుల జోడీని చూపించడం తప్పు కాదని స్పష్టం చేశారు.
Details
SSMB29లోనూ మాధవన్ కీలక పాత్ర
ఇప్పటికే 'ఆప్ జైసా కోయి' టీజర్, ట్రైలర్‌కి మంచి స్పందన లభించగా, మాధవన్-ఫాతిమా సనా షేఖ్ మధ్య కెమిస్ట్రీ హైలైట్ కానుంది. మరోవైపు, రాజమౌళి-మహేశ్‌బాబు కాంబోలో రూపొందనున్న భారీ చిత్రం SSMB29లోనూ మాధవన్ కీలక పాత్ర పోషించనున్నట్లు వార్తలు వస్తున్నాయి. అందులో ఆయన మహేశ్‌బాబుకు తండ్రిగా కనిపించనున్నారని బాలీవుడ్ మీడియాలో టాక్ వినిపిస్తోంది. మొత్తానికి, 'ఆప్ జైసా కోయి' సినిమాతో మాధవన్ మరోసారి తన అభినయ శైలిని మరో కోణంలో చూపించబోతున్నారు. మాధవన్ వ్యాఖ్యలు సినిమాపై ఆసక్తిని పెంచడమే కాక, బాలీవుడ్‌లో సున్నిత అంశాలపై ఓ నూతన చర్చకు దారి తీస్తున్నాయి.