Peddi: చరణ్ 'పెద్ది'లో మృణాల్ ఠాకూర్ స్పెషల్ సాంగ్.. ఫిల్మ్నగర్లో హాట్ టాక్!
ఈ వార్తాకథనం ఏంటి
'సీతా రామం' సినిమాతో తెలుగు ప్రేక్షకుల మనసులు గెలుచుకున్న నటి మృణాల్ ఠాకూర్ మరోసారి ఫిల్మ్నగర్లో హాట్ టాపిక్గా మారారు. ఆమె ఇప్పుడు ఓ భారీ పాన్ ఇండియా చిత్రంలో ప్రత్యేక గీతంలో మెరవనున్నారనే వార్తలు జోరుగా వినిపిస్తున్నాయి. మెగా పవర్స్టార్ రామ్ చరణ్ కథానాయకుడిగా నటిస్తున్న ప్రతిష్ఠాత్మక పాన్ ఇండియా చిత్రం 'పెద్ది'లో మృణాల్ ఠాకూర్ ఓ ఐటెం సాంగ్లో కనిపించనున్నట్లు ఇండస్ట్రీ వర్గాల్లో ప్రచారం జరుగుతోంది. ఈ ప్రత్యేక గీతం కోసం చిత్ర నిర్మాతలు ఇప్పటికే మృణాల్ను సంప్రదించారని, ఇది ప్రతిష్ఠాత్మక పాన్ ఇండియా ప్రాజెక్ట్ కావడంతో ఆమె వెంటనే అంగీకరించినట్లు సమాచారం. ఈ పాటను భారీ హంగులతో, అద్భుతమైన సెట్లో తెరకెక్కించేందుకు చిత్ర బృందం సన్నాహాలు చేస్తోంది.
Details
ఇప్పటికే టూన్ సిద్ధం చేసినట్లు టాక్
ఇక ఈ ఐటెం సాంగ్కు సంగీత దర్శకుడు ఏ.ఆర్. రెహమాన్ ఓ హుషారైన ట్యూన్ను ఇప్పటికే సిద్ధం చేశారని పరిశ్రమ వర్గాలు చెబుతున్నాయి. ఈ పాట చిత్రానికి ప్రత్యేక ఆకర్షణగా నిలుస్తుందని అంచనా వేస్తున్నారు. ఇటీవలి కాలంలో అగ్ర కథానాయికలు ప్రత్యేక గీతాల్లో నటించడం సినిమా ఇండస్ట్రీలో ఓ ట్రెండ్గా మారింది. తక్కువ రోజుల కాల్షీట్లకే భారీ పారితోషికం లభించడం, అలాగే యువతలో ఐటెం సాంగ్స్కు ఉన్న క్రేజ్ను దృష్టిలో పెట్టుకుని స్టార్ హీరోయిన్లు ఈ తరహా పాటలకు ఆసక్తి చూపుతున్నారని సినీ విశ్లేషకులు అభిప్రాయపడుతున్నారు. అల్లు అర్జున్-అట్లీ కాంబినేషన్లో రూపొందుతున్న పాన్ వరల్డ్ చిత్రంలో కూడా ఆమె ఓ కీలక పాత్రలో నటిస్తున్న విషయం తెలిసిందే.