ఆరెంజ్ రీ రిలీజ్ కలెక్షన్స్: రిలీజ్ టైమ్ లో ఫ్లాప్ చేసారు, రీ రిలీజ్ టైమ్ లో హిట్ చేస్తున్నారు
ఈ వార్తాకథనం ఏంటి
కొన్ని మంచి సినిమాలు థియేటర్ల దగ్గర ఎందుకు ఫెయిలవుతాయో అర్థం కాదు. అలా అర్థం కాకుండా మిగిలిపోయిన చిత్రమే ఆరెంజ్. రామ్ చరణ్, జెనీలియా జంటగా నటించిన ఈ చిత్రం 2010లో రిలీజై బాక్సాఫీసు వద్ద బోల్తా కొట్టింది.
థియేటర్లలో ఈ సినిమాకు పరాజయం ఎదురైనా, ఆ తర్వాత టీవీల్లో చూసి, చాలామంది ఫిదా అయ్యారు.
అయితే అప్పుడు థియేటర్లలో ఫ్లాప్ అయిన ఆరెంజ్, ఇప్పుడు మళ్ళీ విడుదలై రికార్డు స్థాయిలో కలెక్షన్లు రాబడుతోంది. రామ్ చరణ్ 38వ పుట్టినరోజును పురస్కరించుకుని ఆరెంజ్ సినిమాను మూడు రోజుల పాటు థియేటర్లలో రిలీజ్ చేసారు.
మార్చ్ 25వ తేదీన మళ్ళీ రిలీజైన ఈ చిత్రం, ఇప్పటివరకు సుమారు 75లక్షలు వసూలు చేసింది.
రామ్ చరణ్
నైజాం ఏరియాల్లో ఎక్కువగా ఉన్న కలెక్షన్లు
ముఖ్యంగా హైదరాబాద్, నైజాం ఏరియాల్లో ఆరెంజ్ కలెక్షన్లు చాలా ఎక్కువగా ఉన్నాయి.
ఈ మేరకు అధికారిక లెక్కలు చెబుతున్నాయి. ఈ కలెక్షన్లు రీ రిలీజ్ లెక్కల్లో మంచి వసూళ్ళని చెప్పుకుంటున్నారు.
ప్రేమ కొంతకాలమే బాగుంటుందని నమ్మే ఒక యువకుడు, జీవితాంతం ప్రేమ కావాలని నమ్మే అమ్మాయిని ప్రేమిస్తే ఎలా ఉంటుందన్న కాన్సెప్ట్ తో వచ్చిన ఆరెంజ్ చిత్రం, అందరి మనసుల్లో నిలిచిపోయింది.
రామ్ చరణ్ కెరీర్లో చెప్పుకోదగ్గ సినిమాల్లో ఆరెంజ్ ఎప్పటికీ నిలిచిపోతుంది. బొమ్మరిల్లు భాస్కర్ దర్శకత్వం వహించిన ఈ సినిమాను అంజనా ప్రొడక్షన్స్ బ్యానర్ లో నాగబాబు నిర్మించారు.
ప్రభు, బ్రహ్మానందం, సమీర్, పవిత్రా లోకేష్ నటించిన ఈ చిత్రానికి హారీష్ జయరాజ్ సంగీతం అందించారు.