Parashakti : రిలీజ్ ప్లాన్లో మార్పు చేసిన 'పరాశక్తి' టీమ్.. విజయ్తో నేరుగా తలపడనున్న శివకార్తికేయన్
ఈ వార్తాకథనం ఏంటి
వచ్చే ఏడాది సంక్రాంతి సీజన్లో కోలీవుడ్ బాక్సాఫీస్ వద్ద ఆసక్తికరమైన పోరు జరగనుంది. అగ్ర హీరోల సినిమాలు ఒకే సమయంలో థియేటర్లకు రావడంతో విడుదల తేదీల చుట్టూ భారీ చర్చ మొదలైంది. ముఖ్యంగా శివకార్తికేయన్ తన సినిమా విడుదల తేదీని మార్చుకుని, దళపతి విజయ్తో నేరుగా పోటీపడేందుకు సిద్ధమవ్వడం ప్రస్తుతం హాట్ టాపిక్గా మారింది. తమిళ స్టార్ హీరో శివకార్తికేయన్ నటిస్తున్న భారీ చిత్రం 'పరాశక్తి'. సుధా కొంగర దర్శకత్వంలో తెరకెక్కుతున్న ఈ సినిమాలో శ్రీలీల హీరోయిన్గా నటిస్తుండగా, రానా దగ్గుబాటి కీలక పాత్రలో కనిపిస్తున్నారు. ఈ చిత్రాన్ని ముందుగా సంక్రాంతి కానుకగా జనవరి 14న విడుదల చేయాలని భావించారు.
Details
జనవరి 10న రిలీజ్
అయితే డిస్ట్రిబ్యూటర్లు, ఎగ్జిబిటర్ల విజ్ఞప్తి మేరకు విడుదల తేదీని మారుస్తూ, నాలుగు రోజుల ముందుగానే అంటే జనవరి 10, 2026న ప్రపంచవ్యాప్తంగా రిలీజ్ చేయనున్నట్లు చిత్ర యూనిట్ అధికారికంగా ప్రకటించింది. ఇదిలా ఉండగా, దళపతి విజయ్ నటిస్తున్న చివరి సినిమా 'జన నాయగన్' జనవరి 9న థియేటర్లకు రానుంది. విజయ్ సినిమా విడుదలైన మరుసటి రోజే శివకార్తికేయన్ 'పరాశక్తి' బరిలోకి దిగుతుండటంతో ఈ క్లాష్ ఇప్పుడు చర్చనీయాంశంగా మారింది. రెండు స్టార్ హీరోల సినిమాలు వరుసగా విడుదలవుతుండటంతో థియేటర్ల కేటాయింపులు, షోలు సర్దుబాటు విషయంలో తీవ్ర పోటీ నెలకొనే అవకాశాలు కనిపిస్తున్నాయి. ఈ పరిణామాలు విజయ్ సినిమా వసూళ్లపై ప్రభావం చూపుతాయేమో అన్న ఆందోళన కూడా సోషల్ మీడియాలో వ్యక్తమవుతోంది.