Fauzi: ప్రభాస్ 'ఫౌజీ'లో నేతాజీగా నటించింది ఎవరో తెలుసా?
ఈ వార్తాకథనం ఏంటి
ప్రభాస్ హీరోగా, హను రాఘవపూడి దర్శకత్వంలో తెరకెక్కుతున్న పీరియాడిక్ వార్ డ్రామా 'ఫౌజీ'పై ప్రేక్షకుల్లో భారీ అంచనాలు నెలకొన్నాయి. ప్రభాస్ పుట్టినరోజు సందర్భంగా విడుదలైన ఈ సినిమా గ్లింప్స్ సోషల్ మీడియాలో వైరల్‌గా మారింది. ఇందులో అడాల్ఫ్ హిట్లర్‌తో పాటు భారత స్వాతంత్ర్య సమరయోధుడు నేతాజీ సుభాష్ చంద్రబోస్ రూపాలు కనిపించడంతో ప్రేక్షకుల్లో ఆసక్తి పెరిగింది. తొలుత ఈ విజువల్స్‌ను చాలామంది ఏఐతో రూపొందించిన గ్రాఫిక్స్‌గా భావించారు. కానీ అసలు నిజం అది కాదు. ఈ పాత్రలో కనిపించింది ప్రముఖ మరాఠీ నటుడు, దర్శకుడు సుబోధ్ భవే.
వివరాలు
'కింగ్ ఆఫ్ బయోపిక్స్'.. సుబోధ్ భవే
సుబోధ్ భవేకు చారిత్రక వ్యక్తుల పాత్రల్లో నటించిన అనుభవం ఉంది.
బయోపిక్స్‌లో తనదైన నటనతో గుర్తింపు తెచ్చుకున్న ఆయనను సినీ విశ్లేషకులు 'కింగ్ ఆఫ్ బయోపిక్స్'అని పిలుస్తుంటారు.
గతంలో 'బాల్ గంధర్వ' సినిమాలో ప్రముఖ రంగస్థల కళాకారుడు నారాయణ్ రావు రాజహంస్‌గా నటించి మెప్పించారు.
'లోకమాన్య:ఏక్ యుగ్ పురుష్' చిత్రంలో స్వాతంత్ర్య సమరయోధుడు బాలగంగాధర తిలక్ పాత్రను పోషించారు.
అలాగే 'డాక్టర్ కాశీనాథ్ ఘాణేకర్' సినిమాలో మరాఠీ నాటకరంగ ప్రముఖుడు కాశీనాథ్ ఘాణేకర్‌గా తన నటనతో ప్రేక్షకులను ఆకట్టుకున్నారు.
ఈ నేపథ్యంలో నేతాజీ సుభాష్ చంద్రబోస్ వంటి కీలక చారిత్రక వ్యక్తి పాత్రకు సుబోధ్ భవేను ఎంపిక చేయడం ప్రత్యేక ఆకర్షణగా నిలిచింది.
'ఫౌజీ' గ్లింప్స్‌లో ఆయన ఆహార్యం,గంభీరమైన రూపం ప్రేక్షకులను ఆకట్టుకుంటున్నాయి.
వివరాలు
సుబోధ్ భవేకు మరాఠీ సినీ ప్రముఖులు,సన్నిహితుల అభినందనలు
ప్రభాస్‌తో కలిసి ఆయన నటిస్తుండటంపై మరాఠీ సినీ పరిశ్రమకు చెందిన పలువురు ప్రముఖులు, సన్నిహితులు హర్షం వ్యక్తం చేస్తున్నారు.
మరోవైపు, తనకు వస్తున్న అభినందనలను సుబోధ్ భవే సోషల్ మీడియాలో పంచుకుంటున్నారు.
చరిత్ర నేపథ్యంతో రూపొందుతున్న ఈ చిత్రంలో బలమైన నటులను కీలక పాత్రలకు ఎంపిక చేయడం సినిమాపై ఆసక్తిని మరింత పెంచుతోంది.
కమర్షియల్ అంశాలతో పాటు కథ, పాత్రలకు ప్రాధాన్యం ఇవ్వడం 'ఫౌజీ' ప్రత్యేకతగా నిలవనుంది.