ప్రాజెక్ట్ కె గ్లింప్ల్స్ రిలీజ్: అధర్మం రాజ్యమేలినపుడు ఆవిర్భవించే కల్కి అవతారంలో ప్రభాస్
ప్రభాస్ అభిమానులు ఎప్పుడెప్పుడా అని ఎదురుచూస్తున్న సమయం వచ్చేసింది. ప్రాజెక్ట్ కె గ్లింప్స్ రిలీజ్ అయ్యింది. కామిక్ కాన్ ఈవెంట్ వేదికగా ప్రాజెక్ట్ కె టైటిల్ ని రివీల్ చేస్తూ గ్లింప్స్ వదిలారు. 1నిమిషం 15సెకన్ల నిడివి గల గ్లింప్స్ వీడియోలో దర్శకుడు నాగ్ అశ్విన్ ప్రేక్షకులందరినీ కొత్త ప్రపంచంలోకి తీసుకెళ్ళాడు. ఇంతకు ముందెన్నడూ చూడని విజువల్స్ ని తెరమీద చూపించాడు. సైన్స్ ఫిక్షన్ ని పురాణాలను జోడించి సరికొత్త కథను చెప్పబోతున్నాడని గ్లింప్స్ వీడియోలో తెలుస్తోంది. హాలీవుడ్ రేంజ్ మూవీ అని చెప్పుకుంటున్న ప్రేక్షకులకు నిజంగా హాలీవుడ్ స్థాయి విజువల్స్ ని గ్లింప్స్ లో చూపించాడు దర్శకుడు.
కల్కి 2898 AD అనే టైటిల్ తో సినిమా
ప్రాజెక్ట్ కె వర్కింగ్ టైటిల్ తో ఇప్పటి దాకా కొనసాగిన ఈ సినిమాకు కల్కి 2898 AD అనే టైటిల్ ను ఫిక్స్ చేసారు. అంటే 2898సంవత్సరంలో జరిగే కథను ఈ సినిమాలో చూపించబోతున్నారని అర్థమవుతోంది. ఇదివరకు దీపికా పదుకొణె, ప్రభాస్ ఫస్ట్ లుక్స్ చూసి నిరాశ చెందిన సినిమా అభిమానులు అందరికీ గ్లింప్స్ వీడియోతో హమ్మయ్య అనుకున్నారు. గ్లింప్స్ లో ప్రభాస్ లుక్స్ అదిరిపోయాయి. చివరి షాట్ లో సైడ్ యాంగిల్ నుండి ప్రభాస్ ఫేస్ కనిపించడం, ఎక్స్ ప్రెషన్స్.. అభిమానులకు పూనకాలు తెప్పించేలా ఉన్నాయి. నాగ్ అశ్విన్ దర్శకత్వం వహిస్తున్న ఈ సినిమాను వైజయంతీ మూవీస్ బ్యానర్ పై సి అశ్వనీదత్ నిర్మిస్తున్నారు.
