Pushpa2: పుష్ప 2 నుండి 'పీలింగ్స్' సాంగ్ ప్రోమో రిలీజ్ చేసిన మేకర్స్
ఐకాన్‌ స్టార్ అల్లు అర్జున్ కథానాయకుడిగా, సుకుమార్ దర్శకత్వంలో రూపొందుతున్న ప్రతిష్టాత్మక చిత్రం పుష్ప 2. మైత్రీ మూవీ మేకర్స్ పతాకంపై నవీన్ ఎర్నేని, యలమంచిలి రవిశంకర్ నిర్మిస్తున్న ఈ చిత్రం, డిసెంబర్ 5న ప్రపంచవ్యాప్తంగా విడుదల కానుంది. తొలి భాగం "పుష్ప: ది రైజ్" సృష్టించిన సంచలనాల నేపథ్యంలో, రెండో భాగంపై భారీ అంచనాలు నెలకొన్నాయి. సినిమా కంటెంట్ కూడా అదే స్థాయిలో, మరింత ప్రభావవంతంగా ఉండబోతుందని సినీ వర్గాల్లో చర్చ జరుగుతోంది.
సాంగ్స్‌లో మరో మ్యాజిక్
"పుష్ప: ది రైజ్"లో సాంగ్స్ ఎంతటి విజయాన్ని సాధించాయో తెలిసిందే. ఇప్పుడు "పుష్ప-2"లో కూడా సంగీత దర్శకుడు దేవిశ్రీ ప్రసాద్ అదే స్థాయిలో పాటలను ప్లాన్ చేశారు. సుకుమార్ సినిమాల్లో ప్రత్యేకంగా నిలిచే స్పెషల్ సాంగ్స్‌లో, ఇటీవల విడుదలైన 'కిస్సిక్' లిరికల్ సాంగ్ దక్షిణ భారతంలో అత్యధిక వ్యూస్ సాధించిన రికార్డును క్రియేట్ చేసింది. తాజాగా, చిత్రబృందం మరో పాటను ప్రోమోగా విడుదల చేసింది.ప్రత్యేకంగా మలయాళ ప్రేక్షకుల కోసం కొచ్చిలో జరిగిన భారీ ప్రీ-రిలీజ్ ఈవెంట్‌లో ఈ ప్రకటన చేశారు. "పుష్ప-2"లో 'పీలింగ్' లిరికల్ సాంగ్ ప్రోమో విడుదల చేయగా,డిసెంబర్ 1న ఫుల్ సాంగ్ విడుదల చేయనున్నారు. ఈ పాటలో అల్లు అర్జున్ డాన్స్ స్టెప్స్ ప్రేక్షకులను మంత్రముగ్ధులను చేయనున్నాయని యూనిట్ చెబుతోంది.
భారీ ప్రచారంలో మేకర్స్
అల్లు అర్జున్‌కి కేరళలో ప్రత్యేకమైన అభిమానులు ఉన్నారు. అందుకే ఈసారి మలయాళ మార్కెట్‌ను దృష్టిలో ఉంచుకుని ప్రత్యేక కార్యక్రమాలు నిర్వహిస్తున్నారు. సినిమా విడుదలకు ముందే ఈ పాటలు, ఈవెంట్స్ ద్వారా మంచి బజ్ క్రియేట్ చేసిన మేకర్స్, సినిమా ప్రేక్షకుల మనసుల్ని గెలుచుకోవడంలో విజయం సాధిస్తారని ఆశిస్తున్నారు.
