Rajeev Kanakala: భూ లావాదేవీ వివాదంలో సినీ నటుడు రాజీవ్ కనకాల.. నోటీసులు పంపిన రాచకొండ పోలీసులు
ఈ వార్తాకథనం ఏంటి
తెలుగు సినిమా నటుడు రాజీవ్ కనకాల ఓ భూ లావాదేవీ వివాదంలో చిక్కుకున్నారు. ఈ కేసు సంబంధించి రాచకొండ పోలీసులు ఆయనకు నోటీసులు పంపించారు. మరోవైపు, అదే కేసులో, సినీ నిర్మాత విజయ్ చౌదరిపై హయత్‌నగర్ పోలీస్ స్టేషన్‌లో కేసు నమోదైంది. వివరాల్లోకి వెళితే..హైదరాబాద్ శివార్లలో ఉన్న పెద్ద అంబర్‌పేట మున్సిపాలిటీ పరిధిలో, పసుమాముల రెవెన్యూ సర్కిల్‌కు చెందిన సర్వే నంబర్ 421 లోని ఓ వెంచర్‌లో రాజీవ్ కనకాలకు ఒక ఫ్లాట్ ఉంది. ఆ ఫ్లాట్‌ను కొన్ని నెలల క్రితం ఆయన నిర్మాత విజయ్ చౌదరికి విక్రయించారు. ఈ కొనుగోలు అధికారికంగా రిజిస్ట్రేషన్ అయ్యిందన్న సమాచారమూ బయటకు వచ్చింది.
వివరాలు
ఎల్బీనగర్‌కు చెందిన శ్రవణ్ రెడ్డికి ఫ్లాట్ అమ్మిన విజయ్ చౌదరి
అయితే, తరువాతి పరిణామాల్లో విజయ్ చౌదరి అదే ఫ్లాట్‌ను ఎల్బీనగర్‌కు చెందిన శ్రవణ్ రెడ్డి అనే వ్యక్తికి రూ.70 లక్షలకు తిరిగి అమ్మారు. ఈ లావాదేవీతో వ్యవహారం ముగిసిందనుకున్న సమయంలోనే అసలు సమస్య మొదలైంది. శ్రవణ్ రెడ్డి తన ఫ్లాట్‌ను పరిశీలించేందుకు వెళ్లిన సమయంలో, అక్కడ ఫ్లాట్‌కి సంబంధించిన ఎలాంటి గుర్తులూ లేకపోవడం గమనించి,తనను నకిలీ స్థలంతో మోసం చేశారన్న అనుమానంతో విజయ్ చౌదరిని సంప్రదించాడు. కానీ విజయ్ చౌదరి దీనిపై స్పష్టత ఇవ్వకపోవడంతో పాటు, ఇదంతా వివాదాస్పదమైన విషయమని చెప్పి తప్పించుకున్నాడు. దానితోపాటు, మళ్లీ పదేపదే అడిగితే గట్టిగా చూస్తానంటూ బెదిరించాడని శ్రవణ్ పోలీసులకు ఇచ్చిన ఫిర్యాదులో పేర్కొన్నారు.
వివరాలు
ఫ్లాట్ లావాదేవీలో రాజీవ్ పాత్రపై ఆరా
ఈ నేపథ్యంలో హయత్‌నగర్ పోలీసులు కేసు నమోదు చేసి విచారణ ప్రారంభించారు. దర్యాప్తులో భాగంగా,మొదటగా ఆ ఫ్లాట్‌ను విక్రయించిన రాజీవ్ కనకాల పాత్రను స్పష్టంగా తెలుసుకోవడానికి ఆయనకు నోటీసులు జారీ చేశారు. ఫ్లాట్ లావాదేవీలో రాజీవ్ పాత్ర ఏ మేరకు ఉందన్న విషయం ఇంకా తెలియాల్సి ఉంది. దీనిపై మ్యూటేషన్ రికార్డులు, అధికారిక పత్రాలు, భూమి పరిమితి తదితర అంశాలపై విచారణ కొనసాగుతోంది. ఈ వివాదం సినీ వర్గాల్లో, అభిమానుల మధ్య చర్చనీయాంశంగా మారింది.
వివరాలు
సినిమాలు,వెబ్ సిరీస్‌లలో బిజీగా రాజీవ్ కనకాల
రాజీవ్ కనకాల ఈ నోటీసులకు ఎలా స్పందిస్తారు? విచారణలో ఏమేమి నిజాలు వెలుగులోకి వస్తాయి? అన్న ఆసక్తికరమైన అంశాలపై అందరి దృష్టి ఉంది. ఇదిలా ఉండగా, రాజీవ్ కనకాల ప్రస్తుతానికి పలు సినిమాలు, వెబ్ సిరీస్‌లలో ముఖ్యమైన పాత్రల్లో నటిస్తూ బిజీగా ఉన్నారు. ఇటీవల ఆయన ప్రధాన పాత్రలో నటించిన 'హోమ్‌టౌన్' అనే వెబ్ సిరీస్ ఆహా ఓటీటీ ప్లాట్‌ఫారంలో విడుదలై మంచి గుర్తింపు పొందింది. ఇందులో ఝాన్సీతో కలిసి నటించిన ఆయన, తన నటన ద్వారా మంచి ప్రశంసలు అందుకున్నారు.