రామ్ చరణ్-శంకర్ మూవీ: లీకైన ఫోటోలతో పెరుగుతున్న ఆసక్తి
ఆర్ఆర్ఆర్ తర్వాత శంకర్ దర్శకత్వంలో సినిమా చేస్తున్నాడు రామ్ చరణ్. తన 15వ సినిమాగా రూపొందుతున్న ఈ సినిమా నుండి బయటకు వస్తున్న లీకులు సినిమా మీద ఆసక్తిని మరింత పెంచుతున్నాయి. ఇప్పటివరకు కొన్ని ఫోటోలు లీక్ అయ్యాయి. అందులో రామ్ చరణ్, ఒక రాజకీయ నాయకుడిగా కనిపించాడు. ఐతే గతంలో ఎప్పుడూ రాజకీయ నాయకుడి పాత్రలో రామ్ చరణ్ కనిపించలేదు. దాంతో రామ్ చరణ్ 15వ మూవీపై అంచనాలు పెరుగుతున్నాయి. దీనికి మరో కారణం కూడా ఉంది. రాజకీయ నేపథ్యంతో శంకర్ తీసిన సినిమాలు మంచి విజయం సాధించాయి. సామాజిక అంశాలను కమర్షియల్ కథలుగా మలిచి ఒకే ఒక్కడు, జెంటిల్ మేన్, శివాజీ చిత్రాలతో శంకర్ ఎంతటి విజయం అందుకున్నాడో తెలిసిందే.
పాటల విషయంలో ఆసక్తిగా రామ్ చరణ్ అభిమానులు
ఇంటర్నెట్ లో లీకవుతున్న ఫోటోలు చూసి కొందరు సంతోషిస్తుంటే మరికొందరు ఆ సినిమాలోని సాంగ్స్ ఎలా ఉంటాయన్న ఆసక్తితో చూస్తున్నారు. సాంగ్స్ నుండి ఏదైనా లీక్ అయితే బాగుంటుందని ఆశిస్తున్నారు. ఎందుకంటే శంకర్ సినిమాల్లో పాటలకు ప్రత్యేక స్థానం ఉంటుంది. అదీగాక రామ్ చరణ్ 15వ సినిమా పాటలను అత్యద్భుతంగా చిత్రీకరిస్తున్నారట. పాటలకు పెట్టిన బడ్జెట్ తోనే చిన్నపాటి సినిమాలను తీసేయొచ్చని వార్తలు వచ్చాయి. అందుకే పాటల మీద జనాలకు ఇంట్రెస్ట్ కలిగింది. దిల్ రాజు నిర్మాతగా ఉన్న ఈ సినిమాలో కియారా అద్వానీ హీరోయిన్ గా కనిపించనుంది. సునీల్, జయరాం, నవీన్ చంద్ర ప్రధాన పాత్రల్లో కనిపించనున్నారు. ఎస్ ఎస్ థమన్ సంగీతం అందిస్తున్నారు.
