మసూద హీరోకు భళ్ళాలదేవుడి సాయం, ఆ హిట్ సినిమాల జాబితాలో చేరుతుందా?
రానా దగ్గుబాటి అటు హీరోగా సినిమాలు చేస్తూనే, తెలుగు ప్రేక్షకులకు కొత్త కొత్త సినిమాలను పరిచయం చేస్తుంటాడు. కేరాఫ్ కంచరపాలెం, 777చార్లీ, గార్గి, క్రిష్ణ అండ్ హిస్ లీల వంటి చిత్రాలకు రానా దగ్గుబాటి సమర్పకుడిగా ఉన్నారు. ఈ సినిమాలను తెలుగులో రిలీజ్ చేసింది రానానే. పైన చెప్పుకున్న చిత్రాలన్నీ మంచి విజయాన్ని అందుకున్నాయి. ఐతే చాలా రోజుల తర్వాత మరోమారు సమర్పకుడిగా వ్యవహరిస్తూ సినిమాను రిలీజ్ చేసేందుకు సిద్ధమవుతున్నారు రానా దగ్గుబాటి. మసూద వంటి హార్రర్ చిత్రంలో నటించిన తిరువీర్, ఈసారి పరేషాన్ అనే చిత్రంతో వస్తున్నాడు. పరేషాన్ చిత్రానికి ప్రజెంటర్ గా రానా ఉంటున్నాడు. ఈ మేరకు రానా దగ్గుబాటి స్వయంగా వెల్లడి చేసాడు.
హిట్ సినిమాల జాబితాలో పరేషాన్ నిలుస్తుందా?
ట్విట్టర్ వేదికగా ఈ విషయాన్ని తెలియజేసిన రానా, చిన్నపాటి వీడియోను రిలీజ్ చేసాడు. ఈ వీడియో చాలా ఇంట్రెస్టింగ్ గా ఉంది. ఇప్పటివరకు రానా ప్రెజెంట్ చేసిన సినిమాలు బాక్సాఫీసు వద్ద మంచి ప్రభావాన్ని చూపడంతో పాటు విమర్శకుల నుండి మంచి ప్రశంసలు తెచ్చుకున్నాయి. మరి పరేషాన్ కూడా అదే రేంజ్ లో నిలుస్తుందా లేదా అనేది చూడాలి. పావని కర్ణాన్ హీరోయిన్ గా కనిపిస్తున్న పరేషాన్ చిత్రంలో, సాయి ప్రసన్న, బుడ్డెర ఖాన్, రవి, రాజు బెడిగల ప్రధాన పాత్రల్లో కనిపిస్తున్నారు. యశ్వంత్ నాగ్ మ్యూజిక్ అందిస్తున్న ఈ చిత్రాన్ని సిద్ధార్థ్ రాళ్ళపల్లి నిర్మిస్తున్నారు. రిలీజ్ ఎప్పుడు అవుతుందనే విషయాలు మరికొద్ది రోజుల్లో వెల్లడి చేస్తారు.
ఈ టైమ్ లైన్ ని షేర్ చేయండి