CULT Movie Review: రివ్యూ: విశ్వక్‌సేన్‌ 'కల్ట్‌'.. రెండున్నర గంటల రక్తపాతం.. ప్రేక్షకులను మెప్పించిందా?
ఈ వార్తాకథనం ఏంటి
టాలీవుడ్ సినీ పరిశ్రమలో ప్రతిభావంతులైన నటులకు కొదవలేదు. ఒకవైపు హీరోలుగా నటిస్తూనే.. మరోవైపు మెగాఫోన్‌ పట్టి దర్శకులుగానూ తమ సత్తా చాటుతున్న యువ నటులు ఉన్నారు. అలాంటి వారిలో విశ్వక్‌సేన్‌ ఒకరు. 'ఫలక్‌నుమా దాస్‌', 'దాస్‌ కా దమ్కీ' సినిమాలతో తనలోని దర్శకుడిని ప్రేక్షకులకు పరిచయం చేసిన ఆయన.. కొంతకాలం తర్వాత మళ్లీ '#కల్ట్‌' చిత్రంతో మెగాఫోన్‌ పట్టారు. మరి ఈ సినిమా ఎలా ఉంది? ప్రేక్షకులకు ఎలాంటి థ్రిల్‌ను అందించింది? విశ్వక్‌సేన్‌ దర్శకుడిగా మరోసారి ఆకట్టుకున్నారా?
వివరాలు
కథేంటంటే?
గోవా హోం మినిస్టర్‌ (మురళీ శర్మ) కుమారుడు ఎల్విన్‌ (తారక్‌ పొన్నప్ప)తన పుట్టినరోజు వేడుకను చాలా గ్రాండ్‌గా నిర్వహించాలని పట్టుబడతాడు.
అయితే ఎన్నికల సమయంలో డ్రగ్స్‌, మద్యంతో పార్టీ నిర్వహిస్తే ఇబ్బందులు ఎదురవుతాయని తండ్రి హెచ్చరించినా అతడు పట్టించుకోడు.
దీంతో ఓ ఫామ్‌హౌస్‌లో తన స్నేహితులందరితో కలిసి భారీ పార్టీ ఏర్పాటు చేస్తాడు. పార్టీ జరుగుతున్న సమయంలో స్క్రీన్‌పై ఓ వింత బొమ్మ కనిపిస్తుంది.
అక్కడికి వచ్చిన వారందరినీ సరదాగా కొన్ని ఆటలు ఆడాలని సూచిస్తుంది. ఇదంతా ఈవెంట్‌ మేనేజ్‌మెంట్‌ బృందం ఏర్పాటు చేసిన కార్యక్రమమేనని అందరూ భావిస్తారు.
మొదట కుర్చీలాట ప్రారంభిస్తారు. పాట ఆగిపోగానే అందరూ తమకు దొరికిన కుర్చీల్లో కూర్చోవాలి. అలా కూర్చోలేని వారు ఆట నుంచి ఎలిమినేట్‌ అవుతారు.
వివరాలు
పోటీలో హత్యలు
అయితే చిన్నపిల్లలు ఆడుకునే ఆటలే కదా అని కొందరు ఈ పోటీని తేలిగ్గా తీసుకుని పాల్గొనరు. కానీ, వారికి అత్యంత దారుణమైన మరణం ఎదురవుతుంది.
దీంతో పార్టీలో ఉన్న వారంతా భయంతో వణికిపోతారు. ఆ తర్వాత ఫోకస్‌ లైట్‌, మ్యూజిక్‌, డ్యాన్స్‌ అంటూ ఒక్కో ఆటను ప్రారంభిస్తారు.
ప్రతి ఆటలో ఓడిపోయిన వారిని దారుణంగా హత్య చేస్తుంటారు. ఇదే పార్టీలో డీఎస్పీ సంకల్ప్‌ నాయక్‌ (విశ్వక్‌సేన్‌) కూడా ఉంటాడు.
అసలు ఈ ప్రాణాంతక ఆటలను ఆడిస్తున్నది ఎవరు? కనిపించకుండా ఒక్కొక్కరినీ ఊచకోత కోస్తున్న వ్యక్తులెవరు? వారి ఆచూకీని సంకల్ప్‌ ఎలా కనిపెట్టాడు? వారిని ఎలా అడ్డుకున్నాడు? అనేది మిగతా కథ.
వివరాలు
సినిమా ఎలా ఉందంటే?
ఒకవైపు నటిస్తూనే మరోవైపు దర్శకత్వం వహించడం కత్తిమీద సాము లాంటిదే. నటుడిగా ఉన్నప్పుడు తన పాత్ర, నటనపై ప్రధానంగా దృష్టి పెడితే సరిపోతుంది.
కానీ దర్శకుడిగా మారితే సినిమా మొత్తంలోని అన్ని విభాగాలపైనా దృష్టి పెట్టాల్సి ఉంటుంది. వీటిలో ఏ ఒక్కటి సరిగా లేకపోయినా సినిమా ఫలితంపై ప్రభావం పడుతుంది.
అయితే విశ్వక్‌సేన్‌కు నటనతో పాటు దర్శకత్వం కూడా కొత్తేమీ కాదు. '#కల్ట్‌'తో మరోసారి తన ప్రతిభను నిరూపించుకోవాలని ప్రయత్నించారు.
కానీ ఆ ప్రయత్నంలో కొంతవరకే విజయం సాధించారు. ఒక రొటీన్‌ రివెంజ్‌ డ్రామాకు భారీగా రక్తపాతం జోడించి ప్రేక్షకుల ముందుకు తీసుకొచ్చారు.
వివరాలు
హింసాత్మక సన్నివేశాలు
విశ్వక్‌సేన్‌ ముందుగానే చెప్పినట్లు ఇది కుటుంబంతో కలిసి చూసే సినిమా అయితే కాదు.
సినిమాలో కాళ్లు, చేతులు, తలలు, వేళ్లు.. ఇలా మనిషి శరీరంలోని ప్రతి అవయవం ముక్కలై పడేలా హింసాత్మక సన్నివేశాలను చూపించారు.
తెరంతా రక్తసిక్తంగా కనిపిస్తుంది. రెండున్నర గంటల నిడివి ఉన్న ఈ సినిమాలో దాదాపు రెండు గంటల పాటు రక్తపాతం కనిపిస్తుందంటే హింస ఏ స్థాయిలో ఉందో అర్థం చేసుకోవచ్చు.
కథ, కథనాల కంటే యాక్షన్‌, రక్తపాతంపైనే ఎక్కువగా ఆధారపడి తెరకెక్కించిన చిత్రమిది.
మద్యం, డ్రగ్స్‌కు అలవాటుపడి జులాయిగా తిరిగే హోం మినిస్టర్‌ కుమారుడు ఎల్విన్‌ వ్యవహారశైలి, అతడి పుట్టినరోజు పార్టీ హంగామాతో సినిమా ప్రారంభమవుతుంది.
వివరాలు
హత్యలు మొదలైనప్పుడే అసలు కథ మొదలవుతుంది
అయితే ఇన్ని సన్నివేశాలు జరుగుతున్నా కథ మాత్రం ముందుకు కదలదు. గోవా వీధులు, గంజాయి పొగల చుట్టూనే సినిమా తిరుగుతుంటుంది.
ప్రారంభంలో వచ్చే సన్నివేశాలు ప్రేక్షకుల సహనానికి పరీక్ష పెడతాయి. పార్టీలో ప్రాణాంతక ఆటలు, హత్యలు మొదలైనప్పుడే అసలు కథ మొదలవుతుంది.
డీఎస్పీ సంకల్ప్‌ ఎంట్రీతో కథ కీలక మలుపు తిరుగుతుంది. అయితే అప్పటికే గంటకు పైగా సినిమా పూర్తయిపోతుంది.
డీఎస్పీ సంకల్ప్‌, మాస్క్‌ మ్యాన్‌ మధ్య జరిగే ముఖాముఖి పోరుతో ఇంటర్వెల్‌ ఇచ్చిన దర్శకుడు.. ద్వితీయార్ధంపై ఆసక్తిని పెంచే ప్రయత్నం చేశారు.
వివరాలు
ద్వితీయార్ధంలో ఆసక్తికరమైన మలుపులు
సెకండాఫ్‌లో యాక్షన్‌ సన్నివేశాలతో పాటు కథలోని పలు అంశాలను ఆవిష్కరించే ప్రయత్నం చేశారు.
ఓవైపు అకస్మాత్తుగా వచ్చి హత్యలు చేస్తున్న ఆగంతుకులను అడ్డుకుంటూనే.. మరోవైపు ఈ దారుణ ఘటనల వెనుక ఉన్నది ఎవరో తెలుసుకునేందుకు సంకల్ప్‌ ప్రయత్నిస్తుంటాడు. ఈ క్రమంలో వచ్చే కొన్ని సన్నివేశాలు ఆసక్తికరంగా సాగుతాయి.
కథలోని చిక్కుముడులను ఒక్కొక్కటిగా విప్పుతూ వెళ్లే సన్నివేశాలు ప్రేక్షకులను కొంతవరకు ఆకట్టుకుంటాయి. ముఖ్యంగా చివరి అరగంట సినిమాకు కీలకంగా నిలుస్తుంది.
మాస్క్‌ మ్యాన్‌ నేపథ్యం ఏమిటి? హోం మినిస్టర్‌ కుమారుడి పుట్టినరోజు వేడుకనే అతడు ఎందుకు లక్ష్యంగా చేసుకున్నాడు? వంటి ప్రశ్నలకు సమాధానాలు ఇచ్చేందుకు ప్రయత్నించారు.
అయితే ఫ్లాష్‌బ్యాక్‌ ఎపిసోడ్‌ అంతగా ఆకట్టుకోదు. క్లైమాక్స్‌ కూడా ప్రేక్షకులకు ఆశించిన స్థాయిలో థ్రిల్‌ ఇవ్వదు.
వివరాలు
ఎవరెలా చేశారంటే?
సీక్వెల్‌కు అవకాశం కల్పిస్తూ కథను ముగించారు. '#కల్ట్‌' యూనివర్స్‌ కొనసాగుతుందని కూడా స్పష్టం చేశారు. '#కల్ట్‌' సినిమాలో దర్శకుడిగా కంటే నటుడిగానే విశ్వక్‌సేన్‌కు ఎక్కువ మార్కులు పడతాయి.
సినిమా ఆద్యంతం స్టైలిష్‌గా కనిపిస్తూ.. ఒకవైపు యాక్షన్‌ పంచ్‌లు, మరోవైపు కామెడీ పంచ్‌లతో ప్రేక్షకులను అలరించే ప్రయత్నం చేశారు.
అయితే ఆయన పాత్ర తెరపై కనిపించడానికి దాదాపు గంట సమయం పట్టడం కథపై ప్రభావం చూపించింది.
సినిమా చూడటానికి వచ్చే ప్రేక్షకులు పోస్టర్‌పై కనిపించే హీరోను తెరపై చూసి, ఆయన చేసే సాహసాలను ఆస్వాదించాలని ఆశిస్తారు.
అలాంటిది హీరోనే చాలా ఆలస్యంగా తెరపైకి వస్తే ప్రేక్షకులకు నిరాశ కలగవచ్చు. ఈ విషయంలో దర్శకుడిగా విశ్వక్‌సేన్‌ మరింత జాగ్రత్త తీసుకుని ఉంటే బాగుండేది.
వివరాలు
కొంత వైవిధ్యం చూపించే ప్రయత్నం
తారక్‌ పొన్నప్ప, గాయత్రి భరద్వాజ్‌, మురళీ శర్మ, శ్రీకాంత్‌ అయ్యంగార్‌ తదితరులు తమకు అలవాటైన పాత్రల్లో నటిస్తూ ముందుకు సాగారు.
మాస్క్‌ మ్యాన్‌గా కనిపించిన నటుడు మాత్రం తన పాత్రలో కొంత వైవిధ్యం చూపించే ప్రయత్నం చేశాడు.
సాంకేతికంగా సినిమా ఓకే అనిపిస్తుంది. రవి బస్రూర్‌ అందించిన నేపథ్య సంగీతం చాలా సన్నివేశాలకు బలాన్నిచ్చింది.
యాక్షన్‌ సన్నివేశాలను మరింత ప్రభావవంతంగా చూపించడంలో బీజీఎం కీలక పాత్ర పోషించింది. దర్శకుడిగా విశ్వక్‌సేన్‌ ఎంచుకున్న కథాంశం తెలుగు ప్రేక్షకులకు కొత్తగా అనిపించవచ్చు.
అయితే ప్రస్తుతం ఓటీటీ ట్రెండ్‌ నడుస్తున్న నేపథ్యంలో 'స్క్విడ్‌ గేమ్‌' వంటి వెబ్‌ సిరీస్‌లను ఇప్పటికే చూసిన వారికి ఈ తరహా ఆటలు, హత్యల కాన్సెప్ట్‌ అంత కొత్తగా అనిపించకపోవచ్చు.
వివరాలు
బలాలు
విశ్వక్‌సేన్‌ నటన
యాక్షన్‌ సీక్వెన్స్‌లు
ద్వితీయార్ధం
బలహీనతలు
ప్రథమార్ధం
రొటీన్‌ ఫ్లాష్‌బ్యాక్‌
అంతగా ఆకట్టుకోని క్లైమాక్స్‌
చివరిగా: '#కల్ట్‌'.. రక్తసిక్తమైన రివెంజ్‌ డ్రామా!