సమంత, నయనతార, రష్మిక బాటలో సాయి పల్లవి: బాలీవుడ్ లో ఎంట్రీ ఇవ్వనున్న ఫిదా ఫేమ్?
ఈ మధ్య దక్షిణాది సినిమా హీరోయిన్లు అందరూ బాలీవుడ్ బాట పడుతున్నారు. ది ఫ్యామిలీ మ్యాన్ వెబ్ సిరీస్ తో సమంత, జవాన్ సినిమాతో నయనతార, మిషన్ మజ్ను సినిమాతో రష్మిక మందన్న బాలీవుడ్ బాట పట్టారు. తాజాగా ఆ లిస్టులోకి సాయి పల్లవి కూడా చేరబోతుంది. ఫిదా సినిమాతో తెలుగు ప్రేక్షకులను ఫిదా చేసిన సాయి పల్లవి, ఆ తర్వాత ఎంసీఏ, పడి పడి లేచే మనసు, లవ్ స్టోరీ, విరాటపర్వం వంటి చిత్రాలతో ఆకట్టుకుంది. విరాట పర్వం తర్వాత సాయి పల్లవి తెలుగులో నటించలేదు. ప్రస్తుతం బాలీవుడ్ హీరో అమీర్ ఖాన్ కొడుకు జునైద్ ఖాన్ హీరోగా నటిస్తున్న ప్రేమకథా చిత్రంలో సాయి పల్లవి ఎంపికైనట్లు తెలుస్తోంది.
సునీల్ పాండే దర్శకత్వంలో సాయి పల్లవి బాలీవుడ్ ఎంట్రీ?
ఈ సినిమాలో హీరోయిన్ పాత్రకు ప్రాధాన్యం ఎక్కువగా ఉండబోతుందని, సాయి పల్లవి అయితే బాగుంటుందని మేకర్స్ భావించినట్లు సమాచారం అందుతుంది. జునైద్ ఖాన్, సాయి పల్లవి నటించబోతున్న సినిమాకు సునీల్ పాండే దర్శకత్వం వహిస్తున్నాడని సమాచారం. ప్రస్తుతానికి సాయి పల్లవి బాలీవుడ్ ఎంట్రీ పై అధికారిక సమాచారం రాలేదు. మరి ఈ విషయమై అధికారికంగా సాయి పల్లవి ఎప్పుడు స్పందిస్తుందో చూడాలి. అదలా ఉంచితే, సాయి పల్లవి ప్రస్తుతం తమిళంలో శివ కార్తికేయన్ నటిస్తున్న సినిమాలో హీరోయిన్ గా కనిపిస్తోంది. ఇటువైపు ప్రస్తుతం జునైద్ ఖాన్, రొమాంటిక్ డ్రామాగా రూపొందుతున్న మహారాజా సినిమాలో నటిస్తున్నాడు.
