ప్రభాస్ సలార్ నుండి సాలిడ్ అప్డేట్
ప్రభాస్ - ప్రశాంత్ నీల్ క్రేజీ కాంబినేషన్లో రూపుదిద్దుకుంటున్న సలార్ పై అభిమానుల్లో అంచనాలు ఆకాశంలో ఉన్నాయి. కేజీఎఫ్ తో రికార్డులు తిరగరాసిన ప్రశాంత్ నీల్, ప్రభాస్ ని ఎలా చూపిస్తాడోనన్న ఆతృత అందరిలోనూ ఉంది. గతకొన్ని రోజులుగా ఈ సినిమా నుండి ఎలాంటి అప్డేట్ రాలేదు. ప్రస్తుతం ప్రభాస్ అభిమానులు ఊగిపోయే అప్డేట్ బయటకు వచ్చింది. సలార్ మూవీ షూటింగ్ మరికొద్ది రోజుల్లో పూర్తవనుందని తెలుస్తోంది. ఈ నెలలో ఫైనల్ షెడ్యూల్ మొదలవుతుందని, ఇదే నెలాఖర్లో షూటింగ్ పూర్తవుతుందని సమాచారం. ఆ తర్వాత పోస్ట్ ప్రొడక్షన్ పనులు వేగంగా జరుగుతాయని అంటున్నారు. ఏదేమైనా ఈ సంవత్సరంలో సినిమాను ప్రేక్షకుల ముందుకు తీసుకురావాలని ప్లాన్ చేస్తున్నారట.
సెప్టెంబర్ లో విడుదలకు సిద్ధం అవుతున్న సలార్
ఈ సంవత్సరం ప్రభాస్ నుండి మూడు సినిమాలు విడుదలయ్యే అవకాశం కనిపిస్తోంది. ఓం రౌత్ దర్శకత్వంలోని ఆదిపురుష్ మూవీ జూన్ 16వ తేదీన రిలీజ్ అవుతుందని ప్రకటన వచ్చింది. అలాగే సలార్ మూవీని సెప్టెంబర్ 18వ తేదీన ప్రేక్షకుల ముందుకు తీసుకువస్తామని తెలియజేసారు. ఇంకా మారుతి దర్శకత్వంలో తెరకెక్కుతోన్న రాజా డీలక్స్ మూవీ కూడా ఇదే సంవత్సరం విడుదలయ్యే అవకాశాలు కనిపిస్తున్నాయి. అనుకున్న ప్రకారం అన్నీ రిలీజ్ అయితే ప్రభాస్ అభిమానులకు పండగనే అని చెప్పాలి. యాక్షన్ థ్రిల్లర్ గా వస్తున్న సలార్ సినిమాను హోంబలే మూవీస్ బ్యానర్ పై విజయ్ కిరంగదూర్ నిర్మిస్తున్నారు. శృతి హాసన్ హీరోయిన్ గా చేస్తుండగా మరిన్ని ప్రధాన పాత్రల్లో పృథ్వీరాజ్ సుకుమారన్, జగపతిబాబు కనిపిస్తున్నారు.
