Salman Khan: సల్మాన్ ఖాన్ 'కర్ణ' మూవీ ఖరారు.. 'రంగ్ దే బసంతి' దర్శకుడితో భారీ సినిమా!
ఈ వార్తాకథనం ఏంటి
బాలీవుడ్ స్టార్ హీరో సల్మాన్ ఖాన్ కెరీర్లో మరో ప్రతిష్ఠాత్మక చిత్రం చేరనుంది. 'రంగ్ దే బసంతి' వంటి క్లాసిక్ సినిమాతో ప్రత్యేక గుర్తింపు తెచ్చుకున్న దర్శకుడు రాకేష్ ఓంప్రకాష్ మెహ్రా తెరకెక్కించనున్న'కర్ణ'లో సల్మాన్ ఖాన్ టైటిల్ రోల్లో నటించనున్నారు. దాదాపు ఐదేళ్లుగా చర్చల్లో ఉన్న ఈ ప్రాజెక్ట్ ఇప్పుడు అధికారికంగా ఖరారైనట్లు సమాచారం. దీంతో బాలీవుడ్లో ఈ సినిమా మరోసారి హాట్ టాపిక్గా మారింది. ప్రముఖ సినీ పత్రిక 'ఫిల్మ్ఫేర్' కథనం ప్రకారం..'కర్ణ' చిత్రంలో సల్మాన్ ఖాన్ ప్రధాన పాత్ర పోషించనున్నారు. జూన్లో రాకేష్ ఓంప్రకాష్ మెహ్రా సల్మాన్కు కథ వినిపించగా, స్క్రిప్ట్ నచ్చడంతో నటుడు ఈ ప్రాజెక్ట్కు అంగీకరించినట్లు తెలుస్తోంది.
వివరాలు
భారీ బడ్జెట్తో రెండు భాగాలుగా 'కర్ణ'..
దీంతో ఇంతకాలంగా చర్చలకే పరిమితమైన ఈ సినిమా ఇప్పుడు కార్యరూపం దాల్చే దిశగా అడుగులు వేస్తోంది.
మహాభారతంలోని కీలక పాత్రల్లో ఒకరైన కర్ణుడి జీవితకథ ఆధారంగా ఈ చిత్రాన్ని రూపొందించనున్నారు.
కర్ణుడి దాతృత్వం, అస్త్రవిద్య, వ్యక్తిగత జీవితంలో ఎదుర్కొన్న సంఘర్షణలు వంటి అంశాలను కథలో ప్రధానంగా చూపించనున్నట్లు సమాచారం.
సల్మాన్ ఖాన్ తొలిసారి ఇలాంటి పౌరాణిక నేపథ్యంలోని పాత్రలో కనిపించనుండటం సినిమాపై ఆసక్తిని మరింత పెంచుతోంది.
ఈ చిత్రాన్ని ఎక్సెల్ ఎంటర్టైన్మెంట్ నిర్మించనుంది. భారీ బడ్జెట్తో రూపొందనున్న 'కర్ణ'ను రెండు భాగాలుగా తెరకెక్కించే ఆలోచనలో చిత్రబృందం ఉన్నట్లు తెలుస్తోంది.
అంతర్జాతీయ స్థాయి విజువల్స్ను తెరపై ఆవిష్కరించేందుకు విస్తృతమైన ప్రీ ప్రొడక్షన్, వీఎఫ్ఎక్స్ పనులను చేపట్టాలని ప్లాన్ చేస్తున్నట్లు సమాచారం.
వివరాలు
2027లో షూటింగ్.. లుక్పై ప్రత్యేక దృష్టి
'కర్ణ' రెగ్యులర్ షూటింగ్ 2027 ఆగస్టులో ప్రారంభమయ్యే అవకాశం ఉందని తెలుస్తోంది.
అప్పటివరకు రాకేష్ ఓంప్రకాష్ మెహ్రా, విక్రాంత్ మాస్సేతో ఓ చిన్న లవ్స్టోరీని పూర్తి చేయనున్నారు.
అదే సమయంలో 'కర్ణ'కు సంబంధించిన ప్రీ ప్రొడక్షన్ పనులు కూడా ప్రారంభం కానున్నట్లు సమాచారం.
కర్ణుడి పాత్రకు తగినట్లుగా సల్మాన్ ఖాన్ లుక్, శారీరక రూపాంతరంపై చిత్రబృందం ప్రత్యేక దృష్టి పెట్టనుందని తెలుస్తోంది.
అయితే హీరోయిన్, ఇతర నటీనటులు, పూర్తి తారాగణం వంటి వివరాలపై ఇంకా అధికారిక ప్రకటన రావాల్సి ఉంది.
ఐదేళ్లుగా చర్చల్లో ఉన్న ఈ డ్రీమ్ ప్రాజెక్ట్ ఇప్పుడు సెట్స్పైకి వెళ్లే దిశగా కదులుతుండటంతో సల్మాన్ అభిమానులతో పాటు సినీ వర్గాల్లోనూ దీనిపై ఆసక్తికరమైన చర్చ సాగుతోంది.