రెమ్యునరేషన్ విషయంలో నిర్మాతల గురించి ఆసక్తికర కామెంట్స్ చేసిన సమంత
శాకుంతలం సినిమా ప్రమోషన్లలో భాగంగా పలు ఇంటర్వ్యూల్లో పాల్గొంటూ వస్తోంది సమంత. మయోసైటిస్ తో బాధపడుతున్న కారణంగా గతేడాది మొత్తం సినిమాలకు, షూటింగులకు దూరమైన సమంత, ఈ మధ్య వరుసగా సినిమాలను మొదలెట్టింది. మయోసైటిస్ బారి నుండి మెల్లమెల్లగా కోలుకుంటున్న సమంత, ప్రస్తుతం విజయ్ దేవరకొండ తో ఖుషి సినిమాలో, బాలీవుడ్ లో సిటడెల్ సిరీస్ లోనూ నటిస్తుంది. తాజాగా గుణ శేఖర్ దర్శకత్వంలో రూపొందిన శాకుంతలం సినిమాను ప్రేక్షకుల ముందుకు తీసుకొచ్చేందుకు రెడీ అయ్యింది. శాకుంతలం ప్రమోషన్లలో మాట్లాడిన సమంత, రెమ్యునరేషన్ పై ఆసక్తికర వ్యాఖ్యలు చేసింది. రెమ్యునరేషన్ విషయంలో ఎవర్నీ అడుక్కోనని, తన కష్టాన్ని చూసి నిర్మాతలే రెమ్యునరేషన్ ఇవ్వాలని ఆమె అంది.
రెమ్యునరేషన్ పై నిర్మాతలే నిర్ణయం తీసుకోవాలంటున్న సమంత
ఇంత కష్టపడుతున్నారు కాబట్టి మీకు రెమ్యునరేషన్ ఇంత ఇస్తానని చెప్పి నిర్మాతలే అంటే బాగుంటుందని, తనకు తానుగా వెళ్ళి ఇంత రెమ్యునరేషన్ ఇవ్వండని అడగడం తనకు నచ్చదని పేర్కొంది. నిర్మాతలను అలా అనేలా చేయాలంటే, పని చేయడంలో కష్టపడాలనీ సమంత మాట్లాడింది. శాకుంతలం సినిమా, తెలుగు తో పాటు తమిళం, హిందీ, కన్నడ, మళయాలం భాషల్లోనూ విడుదల అవుతుంది. ఇది సమంతకు మొట్టమొదటి పాన్ ఇండియా చిత్రం. గుణ టీమ్ వర్క్స్, శ్రీ వెంకటేశ్వర్ క్రియేషన్స్ సంయుక్తంగా నిర్మించిన ఈ సినిమాకు నీలిమా గుణ, నిర్మాతగా వ్యవహరిస్తున్నారు. మణిశర్మ సంగీతం అందించిన ఈ సినిమా, ఏప్రిల్ 14వ తేదీన ప్రపంచ వ్యాప్తంగా సినిమా రిలీజ్ అవుతోంది.
