Shahrukh khan: షారుఖ్ ఖాన్ రూ.18 కోట్లకు కొన్న ఇల్లు.. ఇప్పుడు వందల కోట్ల విలువ..!
ఈ వార్తాకథనం ఏంటి
బాలీవుడ్ బాద్షా షారుఖ్ ఖాన్ మూడు దశాబ్దాలుగా తన నటనతో ప్రేక్షకులను అలరిస్తున్నారు. ఒకప్పుడు వరుస సినిమాలతో బిజీగా ఉన్న ఆయన, ఇప్పుడు మాత్రం సినిమా సినిమాకు కొంత విరామం తీసుకుంటూ ముందుకు సాగుతున్నారు. 'డంకీ' సినిమా తర్వాత ఇప్పటివరకు కొత్త సినిమా విడుదల కాలేదు. ప్రస్తుతం కుటుంబంతో సమయం గడుపుతున్న షారుఖ్ ఖాన్ గురించి ఆయన సినిమాలే కాకుండా వ్యక్తిగత జీవితానికి సంబంధించిన విషయాలు కూడా ఎప్పుడూ బాలీవుడ్లో చర్చనీయాంశంగానే ఉంటాయి. అందులో ముఖ్యంగా షారుఖ్ నివాసం 'మన్నత్' గురించి తెలుసుకోవాలనే ఆసక్తి అభిమానుల్లో ఎక్కువగా కనిపిస్తుంది. ముంబైలోని అత్యంత విలాసవంతమైన నివాసాల్లో ఒకటిగా గుర్తింపు పొందిన ఈ బంగ్లా గురించి నిత్యం సోషల్ మీడియాలో చర్చ జరుగుతూనే ఉంటుంది.
వివరాలు
'మన్నత్'గా పేరొందిన బంగ్లా..
ఈ ఇంటి ఇంటీరియర్ను షారుఖ్ భార్య, ప్రముఖ ఇంటీరియర్ డిజైనర్ గౌరీ ఖాన్ స్వయంగా డిజైన్ చేశారు.
1920ల నాటి నిర్మాణ శైలికి అనుగుణంగా ఈ బంగ్లాను ఆమె అందంగా తీర్చిదిద్దారు.
ప్రస్తుతం 'మన్నత్'గా పేరొందిన ఈ బంగ్లా గతంలో 'విల్లా వియన్నా' పేరుతో ఉండేది.
షారుఖ్ ఖాన్ తన కెరీర్ ప్రారంభ దశలోనే, 1995లో ఈ బంగ్లాను రూ.18.32 కోట్లకు కొనుగోలు చేశారు.
అంతకుముందు ఆయన ఈ ఇంటికి సమీపంలోనే నివసించేవారని, ఈ బంగ్లాను సొంతం చేసుకోవాలనే కోరిక ఆయనకు చాలా కాలంగా ఉండేదని చెబుతుంటారు.
ఈ భవనంలో గతంలో పలు బాలీవుడ్ చిత్రాల షూటింగ్లు కూడా జరిగాయి.
వివరాలు
పలు సినిమాలు కూడా చిత్రీకరణ..
సన్నీ డియోల్ నటించిన 'నరసింహ', గోవిందా హీరోగా డేవిడ్ ధావన్ తెరకెక్కించిన 'షోలా ఔర్ షబ్నం' వంటి సినిమాల చిత్రీకరణ కూడా ఇక్కడే జరిగింది.
బంగ్లాను కొనుగోలు చేసిన తర్వాత షారుఖ్ దాని పేరును 'మన్నత్'గా మార్చారు.
తొలుత 'జన్నత్' అని పేరు పెట్టాలని భావించినప్పటికీ, చివరికి షారుఖ్, గౌరీ ఇద్దరూ కలిసి 'మన్నత్' అనే పేరును ఖరారు చేశారు.
ఈ విలాసవంతమైన బంగ్లాలో ఐదు బెడ్రూమ్లు, మల్టీప్లెక్స్ తరహా లివింగ్ ఏరియా, ఆధునిక జిమ్, ప్రశాంతమైన లైబ్రరీతో పాటు అత్యాధునిక సౌకర్యాలు ఉన్నాయి.
షారుఖ్ కొనుగోలు చేయడానికి ముందు ఈ భవనానికి గుజరాత్కు చెందిన కికు గాంధీ యజమానిగా ఉండేవారు.
ఆయన ముంబైలోని ప్రముఖ కెమౌల్డ్ ఆర్ట్ గ్యాలరీ వ్యవస్థాపకుడు కూడా.
వివరాలు
షారుఖ్ ఖాన్ ప్రతీకగా నిలిచిన బంగ్లా..
బంగ్లాను కొనుగోలు చేసిన అనంతరం షారుఖ్ ఖాన్ ఇందులో పలు మార్పులు చేయించారు.
ఇంటి ఇంటీరియర్, స్టైలింగ్ పనులను పూర్తి చేయడానికి గౌరీ ఖాన్ దాదాపు నాలుగేళ్ల సమయం తీసుకున్నారు.
ప్రస్తుతం ఈ బంగ్లా విలువ సుమారు రూ.200 కోట్ల వరకు ఉంటుందని సమాచారం.
ముంబైలో ఇది కేవలం ఓ విలాసవంతమైన ఇల్లు మాత్రమే కాదు.. నగరంలోని ప్రముఖ గుర్తింపుగా, షారుఖ్ ఖాన్ ప్రతిష్ఠకు ప్రతీకగా కూడా నిలిచిందని బాలీవుడ్ విశ్లేషకులు చెబుతున్నారు.