ఆస్కార్ బరిలో అటు ఆర్ఆర్ఆర్ ఇటు చెల్లో షో..
ప్రతిష్టాత్మక ఆస్కార్ అవార్డుల మహోత్సవం మరో మూడు నెలల్లో ఉండనుంది. ఈ మూడు నెలల ముందు నుండే ఆస్కార్ సందడి మొదలైంది. ఈరోజు 10 విభాగాల్లో షార్ట్ లిస్టులను ప్రకటించింది. అందులో బెస్ట్ సాంగ్ విభాగంలో ఆర్ఆర్ఆర్ సినిమాలో నాటు నాటు పాట చోటు దక్కించుకుంది. అలాగే ఇంటర్నేషన్ ఫీఛర్ ఫిలిమ్ విభాగంలో ఇండియా నుండి పంపిన గుజరాతీ ఫిలిమ్ "ఛెల్లో షో" (లాస్ట్ ఫిలిమ్) కూడా షార్ట్ లిస్ట్ అయ్యింది. బెస్ట్ సాంగ్ విభాగంలో పదిహేను పాటలు షార్ట్ లిస్ట్ అయ్యాయి. అందులో అవతార్ 2 సినిమాలో నథింగ్ ఈజ్ లాస్ట్ తో పాటు టాప్ గన్ మావ్ రిక్ సినిమాలోని హోల్డ్ మై హ్యాండ్ కూడా ఉంది.
ఆర్ఆర్ఆర్ కి ఆస్కార్ అందుతుందా?
ప్రస్తుతానికి పది కేటగిరీల నుండి మాత్రమే షార్ట్ లిస్ట్ వచ్చింది. మిగిలిన విభాగాల నుండి ఇంకా రావాల్సి ఉంది. ఇదిలా ఉంటే, షార్ట్ లిస్ట్ అయిన సినిమాలకు జనవరి 12,13,14 తేదీల్లో ఓటింగ్ ఉంటుంది. ఏ సినిమాలకైతే ఎక్కువ ఓట్లు వస్తాయో అవి నామినేషన్ లో ఉంటాయి. జనవరి 24వ తేదీన నామినేట్ అయిన జాబితాను ప్రకటించనుంది ఆస్కార్. మార్చ్ 12వ తేదీన హాలీవుడ్ లో డాల్బీ థియేటర్ లో ఆస్కార్ అవార్డ్స్ ప్రకటించనున్నారు. ఆర్ఆర్ఆర్ సినిమా ఆస్కార్ అందుకుంటుందని అందరూ అనుకుంటున్నారు. ప్రస్తుతానికి ప్రపంచ సినిమా అవార్డుల వేదికల మీద ఆర్ఆర్ఆర్ తన సత్తా చాటింది. ఆస్కార్ కూడా అందుకుని ప్రపంచ వేదిక మీద తెలుగు సినిమా సత్తా చూపిస్తుందేమో చూడాలి.
