Asian Games: అమన్ సెహ్రావత్ అదరగొట్టాడు.. భారత్‌కు 20వ స్వర్ణం!
ఈ వార్తాకథనం ఏంటి
ఆసియా క్రీడల్లో (Asian Games) శనివారం భారత్‌కు పసిడిపంట పండుతోంది. ఆర్చరీ, గోల్ఫ్‌, క్రికెట్‌లో స్వర్ణ పతకాలు సాధించిన భారత్.. తాజాగా రెజ్లింగ్‌లోనూ మరో బంగారు పతకాన్ని తన ఖాతాలో వేసుకుంది. భారత రెజ్లర్ అమన్ సెహ్రావత్ (Aman Sehrawat) అద్భుత ప్రదర్శనతో స్వర్ణం సాధించాడు. పురుషుల 57 కేజీల విభాగంలో జరిగిన ఫైనల్లో ఉత్తర కొరియాకు చెందిన ఆటగాడు, ప్రపంచ ఛాంపియన్ చాంగ్ సాంగ్ హాన్‌తో అమన్ సెహ్రావత్ తలపడ్డాడు. హోరాహోరీగా సాగిన ఈ పోరులో అమన్ 11-7 తేడాతో విజయం సాధించాడు. దీంతో ఆసియా క్రీడల్లో భారత్‌కు మరో స్వర్ణ పతకం దక్కింది.
వివరాలు
20కి చేరిన పతకాల సంఖ్య
అమన్ సెహ్రావత్ విజయంతో ఆసియా క్రీడల్లో భారత్ సాధించిన బంగారు పతకాల సంఖ్య 20కి చేరింది.
శనివారం ఆర్చరీ, గోల్ఫ్‌, క్రికెట్‌లో స్వర్ణాలు సాధించిన భారత్‌కు రెజ్లింగ్‌లో లభించిన ఈ పతకం పసిడి ఖాతాను మరింత పెంచింది.
ప్రస్తుతం పతకాల పట్టికలో భారత్ 5వ స్థానంలో కొనసాగుతోంది. ఇప్పటివరకు భారత్ 20 బంగారు, 26 రజత పతకాలతో కలిపి మొత్తం 82 పతకాలను సొంతం చేసుకుంది.
167 స్వర్ణ పతకాలతో చైనా అగ్రస్థానంలో కొనసాగుతోంది. భారత్ కంటే ముందు జపాన్, దక్షిణ కొరియా, ఉజ్బెకిస్థాన్‌ దేశాలు పతకాల పట్టికలో ఉన్నాయి.