Flydubai horror: బోయింగ్ 737 మ్యాక్స్‌కు పెను పరీక్ష.. 34 వేల అడుగుల నుంచి ఎలా బయటపడిందంటే?
ఈ వార్తాకథనం ఏంటి
బోయింగ్ మరోసారి వార్తల్లో నిలిచింది.అయితే ఈసారి ప్రమాదం లేదా సాంకేతిక లోపం కారణంగా కాదు.. తీవ్రమైన పరిస్థితుల్లోనూ ఓ విమానం ఎంతటి ఒత్తిడిని తట్టుకోగలదో చూపించిన ఘటనతో. బోయింగ్ 737 మ్యాక్స్ విమానాలపై గతంలో ఎన్నో విమర్శలు వచ్చిన విషయం తెలిసిందే. ముఖ్యంగా 2018, 2019లో జరిగిన రెండు ఘోర ప్రమాదాల తర్వాత ఈ విమానాలపై ప్రపంచవ్యాప్తంగా తీవ్ర ఆందోళన వ్యక్తమైంది. దీంతో 737 మ్యాక్స్ విమానాలను కొంతకాలం ప్రపంచవ్యాప్తంగా నిలిపివేశారు. ఆ ఘటనలు బోయింగ్ ప్రతిష్ఠపై కూడా ప్రభావం చూపించాయి. అయితే తాజాగా ఫ్లై దుబాయ్‌కు చెందిన బోయింగ్ 737 మ్యాక్స్ విమానంలో చోటుచేసుకున్న ఘటన.. అత్యంత తీవ్రమైన పరిస్థితుల్లోనూ ఆ విమానం నిర్మాణం ఎంతటి ఒత్తిడిని తట్టుకుందనే చర్చకు తెరతీసింది.
వివరాలు
34 వేల అడుగుల నుంచి ఒక్కసారిగా కిందికి..
ఫ్లై దుబాయ్‌కు చెందిన ఎఫ్‌జెడ్1073 విమానం 180 మంది ప్రయాణికులతో ప్రయాణిస్తుండగా తీవ్ర సమస్య ఎదురైంది.
విమానం సుమారు 34 వేల అడుగుల ఎత్తులో ఉండగా కో-పైలట్ ఆటోపైలట్‌ను నిలిపివేసి విమాన నియంత్రణలను అడ్డుకున్నట్లు సమాచారం.
ఈ క్రమంలో భారతీయ కెప్టెన్ స్మిత్ మచ్ఛర్‌పై కత్తితో దాడి చేసినట్లు తెలుస్తోంది.
దీంతో విమానం ఒక్కసారిగా అత్యంత వేగంగా కిందికి దూసుకెళ్లింది.
కేవలం ఒక నిమిషానికి పైగా సాగిన ఈ భీకర పతనంలో విమానం సుమారు 14,125 అడుగుల ఎత్తును కోల్పోయింది.
ఒక దశలో విమానం కిందికి దూసుకెళ్లే వేగం నిమిషానికి సుమారు 34 వేల అడుగులకు చేరినట్లు ఫ్లైట్ డేటా వెల్లడించింది.
వివరాలు
రడ్డర్ దెబ్బతిన్నా.. విమాన నియంత్రణ ఎలా సాధ్యమైంది?
ఈ ఆకస్మిక పతనం కారణంగా విమానంపై భారీ జీ-ఫోర్స్, ఏరోడైనమిక్ ఒత్తిడి ఏర్పడింది.
విమానం తోక భాగం కూడా తీవ్రంగా దెబ్బతింది. ముఖ్యంగా విమానం దిశను నియంత్రించే రడ్డర్‌లో (దిశ నియంత్రణ భాగం)పెద్ద భాగం ఊడిపోయినట్లు ల్యాండింగ్ తర్వాత తీసిన చిత్రాల్లో కనిపించింది.
రడ్డర్ అనేది విమానం నిలువు తోక భాగంలో ఉంటుంది. విమానం ముక్కును ఎడమ, కుడి వైపులకు తిప్పే యా (Yaw)కదలికను నియంత్రించడంలో ఇది కీలక పాత్ర పోషిస్తుంది.
అయితే విమానం పైకి ఎగరడం, కిందికి దిగడం మాత్రం రడ్డర్ ద్వారా జరగదు.
వాటిని ప్రధానంగా విమానం అడ్డంగా ఉన్న తోక భాగంలోని ఎలివేటర్లు నియంత్రిస్తాయి.
అందువల్ల రడ్డర్ దెబ్బతినడం వల్ల విమానంపై పూర్తి నియంత్రణ కోల్పోయినట్లు అర్థం కాదు.
వివరాలు
రడ్డర్‌పై భారీ ఒత్తిడి.. చివరకు సురక్షితంగా బయటపడిన విమానం
అయితే విమానం దిశను స్థిరంగా ఉంచడం, యా కదలికను నియంత్రించడం పైలట్లకు మరింత కష్టంగా మారుతుంది.
విమాన భద్రతా నిపుణుడు స్టీవ్ అరోయో మాట్లాడుతూ.. ఇంత తీవ్రమైన పతనం సమయంలో రడ్డర్‌పై భారీ ఏరోడైనమిక్ శక్తులు పనిచేసి ఉండొచ్చని, అందుకే అది దెబ్బతిన్నట్లు పేర్కొన్నారు.
అమెరికా మాజీ ఎన్‌టీఎస్‌బీ, ఎఫ్‌ఏఏ ప్రమాద దర్యాప్తుదారు జెఫ్ గుజెట్టి కూడా విమానం ఆ భీకర పతనం నుంచి బయటపడటం ఆశ్చర్యకరమని అన్నారు.
యితే విమానం వద్ద ఇంకా తగినంత ఎత్తు ఉండటమే పైలట్లకు దానిని అదుపులోకి తీసుకురావడానికి అవకాశం ఇచ్చిందని వివరించారు.
వివరాలు
పైలట్లకే షాక్ ఇచ్చిన ఘటన
దాదాపు అత్యంత వేగంతో కిందికి దూసుకెళ్లినప్పటికీ విమానం గాల్లోనే ముక్కలుగా విడిపోకుండా సురక్షితంగా ల్యాండ్ కావడం పలువురు పైలట్లను ఆశ్చర్యానికి గురిచేసింది.
మాజీ యునైటెడ్ ఎయిర్‌లైన్స్ పైలట్ స్టీవ్ అరోయో మాట్లాడుతూ.. విమానం వేగంగా కిందికి దూసుకెళ్లిన సమయంలో రడ్డర్‌పై గాలి నుంచి తీవ్రమైన ఒత్తిడి పడిందని, అయినప్పటికీ విమానం పూర్తిగా విడిపోకుండా ఉండటం ఆశ్చర్యంగా ఉందని అన్నారు.
సీ-17 రవాణా విమానాన్ని నడిపే అమెరికా సైనిక పైలట్ బజ్ ప్యాటర్సన్ కూడా ఇదే విషయాన్ని ప్రస్తావించారు. విమానం సాధారణ పరిమితులను, దాని కోసం లెక్కించిన భద్రతా పరిమితులను చాలా ఎక్కువగా అధిగమించినప్పటికీ అది తట్టుకుని నిలిచిందని ఆయన పేర్కొన్నారు.
ట్విట్టర్ పోస్ట్ చేయండి
బజ్ ప్యాటర్సన్ చేసిన ట్వీట్
From an active duty C-17 pilot. And Boeing builds good jets. https://t.co/MengYyfLJM pic.twitter.com/zzRadyCvRf
— Buzz Patterson (@BuzzPatterson) September 30, 2026
వివరాలు
బజ్ ప్యాటర్సన్ చేసిన ట్వీట్
"ఇది నేను గతంలో నడిపిన విమానం. ఈ విమానం గరిష్ఠంగా అనుమతించిన వేగాన్ని 100 నాట్ల మేర అధిగమించింది. అది చాలా ఎక్కువ. రడ్డర్ కూడా ఊడిపోయింది. అయినప్పటికీ విమానాన్ని తిరిగి అదుపులోకి తీసుకుని, స్థిరపరచి, మరో విమానాశ్రయానికి మళ్లించడం అద్భుతమే. విమానంలో అదనపు సిబ్బంది ఉండటం ఎంతో ఉపయోగపడింది. లేకపోతే పరిస్థితి పూర్తిగా భిన్నంగా ఉండేది" అని ఆ అమెరికా పైలట్ ఎక్స్‌లో రాశారు.
వివరాలు
2018, 2019లో ప్రమాదానికి గురైన 737 మ్యాక్స్ విమానాలు
ఈ ఘటనపై ఇంతగా చర్చ జరగడానికి బోయింగ్ 737 మ్యాక్స్‌కు ఉన్న గత చరిత్ర కూడా ఒక కారణం.
2018, 2019లో 737 మ్యాక్స్ విమానాలు వరుసగా ప్రమాదాలకు గురయ్యాయి.
విమానం అనూహ్యంగా ముక్కును కిందికి దించే కదలికలకు ఈ ప్రమాదాల్లో కీలక సంబంధం ఉంది.
బోయింగ్ 737 మ్యాక్స్‌లోని ఎంసీఏఎస్(Manoeuvring Characteristics Augmentation System)వ్యవస్థ దీనికి సంబంధించినదిగా గుర్తించారు.
విమానం ఏరోడైనమిక్ స్టాల్‌కు గురయ్యే పరిస్థితిని నివారించేందుకు అవసరమైనప్పుడు దాని ముక్కును కిందికి దించేలా పనిచేసే ఫ్లైట్ కంట్రోల్ వ్యవస్థగా ఎంసీఏఎస్‌ను రూపొందించారు.
2018, 2019లో జరిగిన రెండు ఘోర ప్రమాదాల తర్వాత ప్రపంచవ్యాప్తంగా బోయింగ్ 737 మ్యాక్స్ విమానాలను నిలిపివేశారు.
దీంతో బోయింగ్ ప్రతిష్ఠకు కూడా భారీ దెబ్బ తగిలింది.
వివరాలు
బోయింగ్‌ను అభినందించిన డొనాల్డ్ ట్రంప్
తాజాగా ఫ్లై దుబాయ్ విమానం తీవ్ర ప్రమాదం నుంచి సురక్షితంగా బయటపడటం.. బోయింగ్ 737 మ్యాక్స్ నిర్మాణ బలంపై మరోసారి చర్చకు తెరతీసింది.
ఈ ఘటనపై అమెరికా అధ్యక్షుడు డొనాల్డ్ ట్రంప్ కూడా బోయింగ్‌ను అభినందించారు.
అత్యంత తీవ్రమైన జీ-ఫోర్స్, ఒత్తిడిని తట్టుకుని విమానం నిలబడటాన్ని ఆయన ప్రస్తావించారు.
"బోయింగ్ 737 మ్యాక్స్‌ను రూపొందించిన బోయింగ్ సంస్థకు అభినందనలు. విమానం రూపొందించిన అంచనాలు,పరిమితులకు మించి జీ-ఫోర్స్, ఒత్తిడిని తట్టుకుంది" అని ట్రంప్ సోషల్ మీడియా వేదిక ట్రూత్ సోషల్‌లో పేర్కొన్నారు.
ఇలాంటి పరిస్థితిని తట్టుకునేలా విమానాన్ని రూపొందించడంలో బోయింగ్ ఇంజినీరింగ్, డిజైన్ సామర్థ్యం కనిపించిందని ఆయన ప్రశంసించారు.
బోయింగ్ అధినేత కెల్లీ ఓర్ట్‌బర్గ్‌తో పాటు సంస్థ అధికారులు, సిబ్బందిని కూడా ట్రంప్ అభినందించారు.